އދ ގެ ސަލާމަތީ މަޖިލީހުގެ ރިޔާސަތު ބެލެހެއްޓުމަށް ފުރަތަމަ ލިބުނު ދުވަހު، އެމެރިކާގެ ރައީސް ޑޮނާލްޑް ޓްރަމްޕްގެ އަނބިކަނބަލުން، މެލާނިއާ ޓްރަމްޕް، އެކަމަނާގެ ފިރިމީހާ ދިފާއުކުރައްވައި ވާހަކަދައްކަވައިފިއެވެ.

ސަލާމަތީ މަޖިލީހުގެ ރިޔާސަތާ ހަވާލުވުމަށްފަހު ފުރަތަމަ ފަހަރަށް ވާހަކަދައްކަވަމުން މެލާނިއާ ވަނީ އެންމެ ފުރަތަމަވެސް އީރާނު ހަނގުރާމާގައި މަރުވެދިޔަ އެމެރިކާ ސިފައިންގެ ހަނދާންތައް އާކުރައްވައި އެއީ ޤައުމީ ބަތަލުންކަން ފާަހަގަކުރައްވާފައެވެ. 

އެމެރިކާ އާއި އިސްރާއީލުން އިސްވެ މިދިޔަ މަހުގެ 28 ހުން ފެށިގެން އީރާނަށް ވައިގެ ހަމަލާތައް ދެމުން އަންނައިރު، މި ހަމަލާތަކުގައި އީރާނުގެ އަންހެންކުދިންނަށް ހާއްސަ ސްކޫލަކަށް ބޮންއަޅައި އެތަނުގައި ތިބި 160 ހަށްވުރެ ގިނަ ދަރިވަރުންގެ ފުރާނަ ވަނީ ގެއްލުވާލާފައެވެ. މި މައްސަލަ ހޫނުވެފައިވަނިކޮށް ސަލާމަތީ މަޖިލީހުގައި ވާހަކަދައްކަވަމުން މެލާނިއާ ވަނީ އެވާހަކަތަކުގެ މިޝްރާބު ބަދަލުވާނޭ މޭރުމުން ވާހަކަދައްކަވާފައެވެ. މެލީނާ ވިދާޅުވީ، ޤައުމުން ބޭރުގައި އެމެރިކާ ސިފައިން ވަމުންދަނީ ވަރަށް މަތިވެރި ޤުރުބާނީއެއް ކަމަށެވެ.

މެލީނާ ވިދާޅުވީ ދެމެހެއްޓެވި ގޮތެއްގައި ޤައުމުތަކުގައި ސުލްހަ ޤާއިމްކުރެވޭނީ، އިލްމާއި ހޭލުންތެރިކަމަށް އިސްކަންދީގެން ކަމަށެވެ. އިލްމާއި ހިކުމަތުގެ މައްޗަށް ބިނާވެފައިވާ ތަންތަން ފެންނާނީ އަމާން ތަންތަނުގެ ގޮތުގައިކަމަށެވެ. ކުޑަކުދިންނަށް ދޭ އަހަމިއްޔަތުކަން ފާހަގަކުރައްވަމުން މެލާނިއާ ވިދާޅުވީ، އެމެރިކާ އޮތީ ދުނިޔޭގެ ހުރިހާ ކުޑަކުދިންނާއެކު ކަމަށާއި، ކައިރި މުސްތަގުބަލެއްގައި އެ ކުދިންނަށް ސުލްހަ ލިބޭނެ ކަމަށް އުއްމީދުކުރައްވާ ކަމަށެވެ.

އދ ގެ ސަލާމަތީ މަޖިލީހުގައި މެނީލާ މިމޭރުމުން ވާހަކަދެއްކެވުމުން އީރާނުން އދ. އަށް ކަނޑައަޅާފައި ހުންނަވާ ސަފީރު އާމިރު ސައީދު އިރަވާނީ އެވާހަކަތަކަށް ވަރަށްބޮޑަށް ފާޑުވިދާޅުވެ ވާހަކަދައްކަވާފައެވެ. އޭނާ ވިދާޅުވީ ސަލާމަތީ މަޖިލީހާ ހަވާލުވި ފުރަތަމަ ދުވަހުވެސް ކުޑަކުދިންގެ ހިމާޔަތާ ގުޅޭގޮތުން ދެއްކެވީ ލަދުވެތިކަމުން ފުރިގެންވާ ވާހަކަތަކެއް ކަމަށެވެ.

ސަލާމަތީ މަޖިލީހުގެ ރިޔާސަތު މެނީލާ ޓްރަމްޕް ބެލެހެއްޓެވިއިރު، މިއީ ޤައުމެއްގެ ރައީސެއްގެ އަނބިކަނބަލަކު މި މަޤާމާ ހަވާލުވެލެއްވި ފުރަތަމަ ފަހަރެވެ.