ސަރުކާރު ހިންގާ ކޮންގްރެސް ޕާޓީގެ ފަރާތުން ކުރިއަށް އޮތް ލޯކަލް ކައުންސިލް އިންތިހާބުގައި ގަލޮޅު އުތުރު ދާއިރާއަށް ކުރިމަތިލާ މަރިޔަމް ރީހާން ނާޒިމްގެ ކެމްޕެއިން ޖަގަހަ ހުޅުވުމުގެ ޖަލްސާގައި ކުރީގެ އެޑިއުކޭޝަން މިނިސްޓަރު އަދި މާލޭ ސިޓީގެ ކުރީގެ މޭޔަރު ޝިފާ މުހައްމަދު ބައިވެރިވުމުން އަމާޒުވަމުންދާ ފާޑުކިޔުންތަކާއި ތުހުމަތުތަކަށް އޭނާ ރައްދު ދީފި އެވެ.
ރީހާން އަކީ މިހާރު ގަލޮޅު މެދު ދާއިރާގެ ކައުންސިލަރެވެ. އޭނާ ގެންދަނީ މި ފަހަރު ކޮންގްރެސްގެ ޓިކެޓްގައި އަލުން އިންތިހާބު ވުމަށް ކެމްޕެއިން ކުރަމުންނެވެ.
މީގެ ދެ ރޭ ކުރީން އޮތް ހަފްލާއެއްގައި އޭނާގެ ކެމްޕެއިން ޖަގަހަ ވަނީ ހުޅުވާފަ އެވެ. އެ ޖަގަހަ ހުޅުއްވައިދެއްވީ ފަސްޓްލޭޑީ ސާޖިދާ މުހައްމަދު އެވެ. އެރޭގެ ހަފްލާގައި ޝިފާ ވެސް ބައިވެރިވި އެވެ.
އެ ހަފްލާގައި ޝިފާ ބައިވެރިވެ ރީހާންއާ އަދި މެޑަމް ސާޖިދާއާ ސަލާމް ކުރާ ފޮޓޯއާއެކު ބައެއް މީހުން ވަނީ ޝިފާވެސް އެމްޑީޕީ ދޫކޮށްލީ ކަމަށް ބުނެ އެކިކަހަލަ ޕޯސްޓްތައް ކޮށްފަ އެވެ. އެމްޑީޕީގެ ބައެއް އެކްޓިވިސްޓުން ވެސް ވަނީ އެކިކަހަލަ ތުހުމަތުތައް ކޮށްފަ އެވެ.
އެ ތުހުމަތުތަކަށް ރައްދުދީ ޝިފާ ވިދާޅުވީ ރީހާން އަކީ އޭނާއަށް ބޮޑުދައިތަ ކިޔާ މީހެއް ކަމަށެވެ. އަދި ރީހާންގެ ޖަގަހަ ހުޅުވުމައް ދިޔުމުން ގިނަބަޔަކު ކަންބޮޑުވާކަށް ނުޖެހޭ ކަމަށެވެ.
ދެން ވިދާޅުވީ ގަލޮލުގައި ކުރިއަށް ގެންދަން ޖެހިފައިވާ ކަންކަން ކުރިއަށް ދާތަން ފެންނާތީ އުފާކުރާ ކަމަށެވެ.
Advertisement
This content is created and paid for by advertisers and does not involve Voice Journalists
