ހުސްވި ފެބުރުއަރީމަހު ދައުލަތަށް އާމްދަނީގެ ގޮތުގައި 2.80 ބިލިއަން ރުފިޔާ ލިބިފައިވާކަމަށް މޯލްޑިވްސް އިންލަންޑް ރެވެނިއު އޮތޯރިޓީގެ ތަފާސްހިސާބުތަކުން ދައްކައިފިއެވެ.

ދައުލަތުގެ ޓެކްސް އިދާރާ، މީރާއިން މިއަދު ނެރެފައިވާ ފެބުރުއަރީމަހު ދައުލަތަށް ލިބުނު އާމްދަނީ ރިޕޯޓަށް ބަލާއިރު، މި މުއްދަތުގެ ތެރޭގައި ޓެކްސްގެ ގޮތުގައި 2.4 ބިލިއަން ރުފިޔާ ލިބުނުއިރު ޓެކްސް ނޫން އާމްދަނީގެ ގޮތުގައި ވަނީ 394.8 މިލިއަން ރުފިޔާ ލިބިފައެވެ.

ފެބުރުއަރީމަހު 2.8 ބިލިއަން ރުފިޔާ ލިބުނުއިރު މިއީ ލިބޭނޭކަމަށް ކުރިން ލަފާކުރި މިންވަރަށްވުރެ 11.6 އިންސައްތަ ދަށް އަދަދެކެވެ. އަދި އެއީ މިދިޔަ އަހަރުގެ ފެބުރުއަރީ މަހާ އަޅާބަލާއިރު، 0.8 އިންސައްތަ ދަށްވުމެކެވެ. މިދިޔަ މަހު މީރާއަށް ލިބޭނޭކަމަށް ލަފާކުރި އާމްދަނީ ދަށަށްދިއުމުގެ މަިއގަނޑު ސަބަބަކީ ޖީއެސްޓީ، އެއާޕޯޓް ޓެކްސް، އަދި ގްރީން ޓެކްސްއިން ލިބުނު އާމްދަނީ ދަށްވުމެވެ.

މިދިޔަ މަހު މީރާއަށް އެންމެ ގިނައިން އާމްދަނީ ލިބިފައިވަނީ ޖީއެސްޓީ، އިންކަމްޓެކްސް، ގްރީންޓެކްސް އަދި ޑިޕާޗާ ޓެކްސްއިންނެވެ. ޖީއެސްޓީގެ ގޮތުގައި 1.4 ބިލިއަން ރުފިޔާ ލިބުނުއިރު، މިދިޔަ މަހު އިންކަމް ޓެކްސްގެ ގޮތުގައި 599 މިލިއަން ރުފިޔާ ލިބުނެވެ. އަދި ގްރީން ޓެކްސްގެ ގޮތުގައި 200 މިލިއަން ރުފިޔާ، ޑިޕާޗާ ޓެކްސްގެ ގޮތުގައި 134 މިލިއަން ރުފިޔާ ލިބުނެވެ.

ދައުލަތަށް އާމްދަނީ ލިބުނު ދާއިރާތައް... މައުލޫމާތު: މީރާ

ތަފާސްހިސާބުތަކުން ދައްކާ ގޮތުގައި މިއަހަރުގެ ޖެނުއަރީ އަދި ފެބުރުއަރީ މަހު ދައުލަތަށް އާމްދަނީގެ ގޮތުގައި ޖުމްލަ 7.2 ބިލިއަން ރުފިޔާ ވަނީ ލިބިފައެވެ. މިއީ މިދިޔަ އަހަރާ އަޅާބަލާއިރު، 1.12 ބިލިއަން ރުފިޔާގެ އިތުރުވުމެކެވެ. މިދިޔަ އަހަރުގެ ފުރަތަމަ ދެމަހުގެ ތެރޭގައި ދައުލަތަށް އާމްދަނީގެ ގޮތުގައި ލިބިފައިވަނީ، 6.1 ބިލިއަން ރުފިޔާއެވެ.