ނިރުބަވެރި އިސްރާއިލުން ޣައްޒާގައި ހިނގަމުންދާ ލާއިންސާނީ އަމަލުތަކުގެ ތެރެއިން، ފަލަސްތީނުގެ އެއް އަހަރުގެ ތުއްތު ކުއްޖަކަށް ބޮޑެތި އަނިޔާތަކެއް ދީފި ކަމަށް ފަލަސްތީން ޓީވީން ރިޕޯޓްކޮށްފިއެވެ.

ފަލަސްތީނުގެ ނޫސްވެރިޔާ އުސާމާ އަލް-ކަހްލޫތާ ހަވާލާދީ ނޫސްތަކުން ރިޕޯޓް ކޮށްފައިވާ ގޮތުން، މި އަނިޔާތައް ދީފައިވަނީ އެ ކުއްޖާގެ ބައްޕަގެ ފަރާތުން އިއުތިރާފު ބަޔާނެއް ހޯދުމަށް މަޖުބޫރު ކުރުވުމުގެ ގޮތުންނެވެ.

މި ހާދިސާ ހިނގާފައިވަނީ ޣައްޒާގެ މެދުތެރޭގައި އޮންނަ އަލް-މަޣާޒީ ރެފިއުޖީ ކޭމްޕް ކައިރިންނެވެ. އަނިޔާ ލިބުނު ޖަވާދު ނަމަކަށް ކިޔާ 18 މަހުގެ މި ކުއްޖާގެ ހަށިގަނޑުގައި ހުރި ޒަޚަމްތައް ފަލަސްތީން ޓީވީން ވަނީ ދައްކާލާފައެވެ.

މަންޒަރު ދުށް މީހުން ކިޔައިދިން ގޮތުގައި، ޖަވާދު ބައްޕަ އުސާމާ އަބޫ ނައްޞާރަކީ އޭނާގެ އާމްދަނީ ހޯދުމަށް ބޭނުންކުރާ އަސް މަރުވުމުގެ ސަބަބުން ނަފްސާނީ ގޮތުން ވަރަށް ބޮޑަށް އަސަރުކޮށްފައި ހުރި މީހެކެވެ.

އޭނާ ދަރިފުޅު ގޮވައިގެން ބައެއް ސާމާނު ގަންނަން ދަނިކޮށް، ގޭ ކައިރިން އިސްރާއީލު ސިފައިންގެ ބަޑީގެ ހަމަލާތަކެއް ކުރިމަތިވިއެވެ. އެވަގުތު އިސްރާއީލު ސިފައިން އޭނާއަށް މަޖުބޫރު ކުރީ ތުއްތު ދަރިފުޅު ބިންމަތީގައި ބޭއްވުމަށްފަހު، ކައިރީގައި ހުރި އަސްކަރީ ޗެކްޕޮއިންޓަކަށް ދިޔުމަށެވެ.

އެއަށްފަހު، އެތަނުން އޭނާ ބޯޑަރު ހުރަސްކޮށް ގެންގޮސް، އޭނާގެ އަންނައުނު ބާލުވައި، އައުރަ އެއްކޮށް ކަޝްފުކުރުމަށްފަހު ސުވާލުކުރަން ފެށިއެވެ.

އެ ސުވާލުތަކުގެ ޖަވާބު ހޯދައި، އިސްރާއިލުން ބޭނުންވާ ކަންކަން ގަދަކަމުން ކުރުވުމަށްޓަކައި އުސާމާގެ ކުރިމަތީގައި އޭނާގެ ދަރިފުޅަށް އިސްރާއީލު ސިފައިން ވަނީ ވަރަށް ރަހުމުކުޑަ ގޮތަކަށް އަނިޔާކޮށްފައެވެ.

މެޑިކަލް ރިޕޯޓްތަކުން ކަށަވަރުވާ ގޮތުގައި، ސިފައިން ވަނީ ސިގިރޭޓުން އެ ކުއްޖާގެ ފައި ފިއްސާލައި، ފަޔަށް މޮހޮރުވެސް ޖަހާފައެވެ. މި އަނިޔާތަކުގެ ނިޝާންތައް ކުއްޖާގެ ހަށިގަނޑުން ފެންނަން ހުރި ކަމަށް ރިޕޯޓްތައް ބުނެއެވެ.

ގާތްގަނޑަކަށް 10 ގަޑިއިރު ވަންދެން ހިފަހައްޓާފައި ބެހެއްޓުމަށްފަހު، ބައިނަލްއަގުވާމީ ރެޑް ކްރޮސް މެދުވެރިކޮށް ތުއްތު ޖަވާދު ވަނީ އޭނާގެ އާއިލާއާ ހަވާލުކޮށްފައެވެ.

ނަމަވެސް، ޖަވާދުގެ ބައްޕަ އަދިވެސް ހުރީ އިސްރާއީލުގެ ބަންދުގައެވެ. އާއިލާއިން ވަނީ ބައްޕަ މިނިވަންކޮށް، އޭނާއަށް ބޭނުންވާ ސިއްހީ ފަރުވާ ފޯރުކޮށްދިނުމަށް ބައިނަލްއަގުވާމީ ޖަމިއްޔާތަކަށް އިލްތިމާސްކޮށްފައެވެ.

2023 ވަނަ އަހަރުގެ އޮކްޓޯބަރު މަހުން ފެށިގެން އިސްރާއީލުން ހިންގަމުންދާ ގަތުލުއާންމުގައި މިހާތަނަށް 72,000 އަށްވުރެ ގިނަ ފަލަސްތީނު ރައްޔިތުން ވަނީ ޝަހީދުކޮށްލާފައެވެ. މީގެ ތެރޭގައި ގިނައީ އަންހެނުންނާއި ކުޑަކުދިންނެވެ.

މީގެ އިތުރުން 171,000 އަށްވުރެ ގިނަ މީހުން ޒަޚަމްވެފައިވާއިރު، ޣައްޒާގެ ބޮޑު ބައެއް ވަނީ ސުންނާފަތިކޮށްލާފައެވެ. މި ހަމަލާތަކުގެ ތެރޭގައި އިސްރާއީލުން ދަނީ ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފުވަމުންނެވެ.