ގްރޭޓާ މާލެ ސަރަހައްދުން ބޯހިޔާވަހިކަމަށް އެދި ހުށަހަޅާ ފަރާތްތަކުން ކުރިން ލިބިފައިވާ ބިމާއި ފުލެޓު ދޫކޮށްލުމުގައި އަމަލުކުރާނެ ގޮތުގެ އައު އުސޫލު އާންމުކޮށްފިއެވެ.

ރޭ ގެޒެޓްކުރި މި ލިޔުމުގައި ބިމާއި ފުލެޓް ދޫކުރެވޭނެ ޙާލަތްތަކާއި، ދޫކުރެވޭނެ ޢާއިލާގެ ފަރާތްތައް ވަނީ ކަނޑައަޅާފައެވެ. 

މި އައު އުސޫލުތަކުގެ ދަށުން، ގޯތި ލިބޭ ފަރާތްތަކުން، ގޯތި ހަވާލުކުރާ ތާރީޚުން ފެށިގެން ގިނަވެގެން 5 އަހަރު ދުވަހުގެ ތެރޭގައި، ލިބިފައިވާ ނުވަތަ ލިބެން އޮންނަ ބިން، އެއްވެސް އަގަކާ ނުވަތަ ބަދަލަކާ ނުލައި ދޫކޮށްލަންޖެހޭ ގޮތަށް ވަނީ ކަނޑައަޅައިފައެވެ. އެގޮތުން ބިން ދޫކޮށްލެވޭނީ އަންނަނިވި ޢާއިލާގެ މެންބަރުންނަށެވެ. 

ބިން ދޫކޮށްލާ ފަރާތްތައް

އުފަން ދަރިން،

މަންމަ ނުވަތަ ބައްޕަ،

އަނބިމީހާ ނުވަތަ ފިރިމީހާ،

އެއްބަނޑުއެއްބަފާ، އެއްބަފާ ނުވަތަ އެއްބަނޑު މީހުން.

މީގެ ތެރެއިން އެއްވެސް ފަރާތެއް ނެތް ހާލަތެއްގައި، ބިން ދޫކޮށްލާނީ ދައުލަތަށް ނުވަތަ ސަރުކާރުން ކަނޑައަޅާ ފަރާތަކަށެވެ.

ގޯތި ލިބޭ ފަރާތުގެ ނަމުގައިވާ ބިމަކީ، އެކަކަށް ވުރެ ގިނަ ބައެއްގެ ނަމުގައި ރަޖިސްޓަރީ ކޮށްފައިވާ ބިމެއް ނަމަ، ގޯތި ލިބޭ ފަރާތަށް ލިބިފައިވާ ބައި ދޫކޮށްލާނީ ވެސް، ކަނޑައެޅިފައިވާ ތަރުތީބުން، ގާތްތިމާގެ ފަރާތްތަކަށެވެ. ނަމަވެސް، ދޫކޮށްލެވޭ ބިން ލިބޭ ފަރާތަކީ، 400 އަކަފޫޓަށް ވުރެ ބޮޑު ގޯއްޗެއް، ނުވަތަ ސަރުކާރުގެ ބޯހިޔާވަހިކަމުގެ ޕްރޮގްރާމެއްގެ ދަށުން ގޯއްޗެއް، ފްލެޓެއް، ހައުސިންގ ޔުނިޓެއް ނުވަތަ އެއްމެދު އިމާރާތަކުން ފްލެޓެއް ލިބިފައިވާ ފަރާތަކަށް ވެގެން ނުވާނެ ކަމަށް ވެސް ވަނީ ކަނޑައަޅައިފައެވެ.

ގޯތި ލިބޭ ފަރާތަށް، މައިންބަފައިންގެ ފަރާތުންނާއި، އުފަން ދަރިއެއްގެ ފަރާތުންނާއި، އަނބިމީހާ ނުވަތަ ފިރިމީހާގެ ފަރާތުން ތަރިކައިން ނުވަތަ ވަސިއްޔަތަކުން ލިބެން އޮންނަ ބިމެއް ވާ ހާލަތުގައި، ބިމުގެ މިލްކުވެރިޔާ ނިޔައުވުމުން، ތަރިކައިގެ މައްސަލަ ޝަރުޢީ ކޯޓަށް ހުށަހަޅައި، ކޯޓުގެ ތެރެއިން ލިބޭ ބައި ދޫކޮށްލަންވާނީ އެ މީހެއްގެ އުފަން ދަރިއަކަށް ނުވަތަ އެއްބަނޑުއެއްބަފާ، އެއްބަފާ ނުވަތަ އެއްބަނޑު މީހުންގެ ތެރެއިން ފަރާތަކަށް ކަމަށް އުސޫލުގައިވެއެވެ.

މީގެ އިތުރުން، އުސޫލުގައުވާގޮތުން މާލޭގެ ހަނި ގޯޅިތަކުގައި ހުރި ބިންތަކާއި، ބިމުގެ ކުޑަބޮޑުމިނުގެ ސަބަބުން އިމާރާތްކުރުމަށް ދަތިވާ ބިންތައް ދޫކޮށްލަން އެދޭ ފަރާތްތަކުން ވެސް، ގޯތި ލިބޭ ތާރީޚުން ފެށިގެން 5 އަހަރުގެ ތެރޭގައި އެ ބިން އެއްވެސް އަގަކާ ނުވަތަ ބަދަލަކާ ނުލައި ދައުލަތަށް ދޫކޮށްލަންވާނެއެވެ.

އަދި "ބިންވެރިޔާ" ޚާއްޞަ ސްކީމުގެ ކެޓަގަރީ 1 ގެ ދަށުން ގޯތި ދޫކުރާ ހާލަތުގައި ވެސް، ކުރިން ލިބިފައިވާ ބިން ދައުލަތަށް ދޫކޮށްލުމުން ނޫނީ އައު ގޯތި ހަވާލެއް ނުކުރެވޭނެއެވެ.

މީގައި ވާގޮތުން، ސަރުކާރުގެ ބޯހިޔާވަހިކަމުގެ ޕްރޮގްރާމެއްގެ ދަށުން ކުރިން ލިބިފައިވާ 1 ކޮޓަރީގެ ނުވަތަ 2 ކޮޓަރީގެ ފްލެޓް، އައު ފްލެޓް ހަވާލުކުރުމާ ގުޅިގެން ދައުލަތަށް ނުވަތަ ސަރުކާރުން ކަނޑައަޅާ ފަރާތަކަށް ދޫކޮށްލަންވާނެއެވެ.

އަދި "ބިންވެރިޔާ" ސްކީމުގެ ކެޓަގަރީ 2 ގެ ދަށުން ގޯތި ލިބޭ ފަރާތްތަކަށް ގޯތި ހަވާލުކުރާ ތާރީޚުން ފެށިގެން 5 އަހަރުގެ ތެރޭގައި، ކުރިން ލިބިފައިވާ ފްލެޓް ދައުލަތަށް ދޫކޮށްލަންވާނެއެވެ.

ފްލެޓް ދޫކޮށްލާއިރު، އެ ތަނެއް ހަވާލުކުރެވުނުއިރު ހުރިގޮތަށް، އެކަށީގެންވާ ފެންވަރެއްގައި ހުންނަންވާނެއެވެ. އާންމު ދިރިއުޅުމުގެ ތެރޭގައި ތަނަށް އައިސްފައިވާ ބަދަލުތައް ފިޔަވައި، އެހެނިހެން ގެއްލުންތައް ހުރިނަމަ އެ ތަނެއް މަރާމާތުކުރުމަށް ފަހު ނޫނީ ދައުލަތާ ހަވާލެއް ނުކުރެވޭނެއެވެ.

ބިން ދޫކޮށްލުމުގެ އުސޫލެކޭ އެއްފަދައިން، މި މާއްދާގެ ދަށުން ދޫކޮށްލާ ފްލެޓް ލިބޭ ފަރާތަކީ ވެސް، އަމިއްލަ ނަމުގައި 400 އަކަފޫޓަށް ވުރެ ބޮޑު ގޯއްޗެއް ނުވަތަ ސަރުކާރުގެ އެހެން ބޯހިޔާވަހިކަމުގެ މަޝްރޫޢަކުން ބިން ނުވަތަ ފްލެޓް ލިބިފައިވާ ފަރާތަކަށް ވެގެން ނުވާނެއެވެ.