ޑޮކްޓަރީ ބޭހާއި މެޑިކަލް ކޮންޒިއުމަބަލްސް ފޯރުކޮށްދިނުމަށް އުފެއްދި ކުންފުނި ސްޓޭޓްފާމާއިން ބޭސް ހޯދުމަށް ގުޅާނޭ ހޮޓްލައިން 1505 އަދި ސްޓޭޓްފާމާ ޕޯޓަލް ތައާރަފްކޮށްފިއެވެ.

ސްޓޭޓްފާމާއިން ބުނީ މި ހޮޓްލައިންއިން ހަފްތާއަކު ހަތް ދުވަހު 24 ގަޑިއިރު ހިދުމަތް ލިބިގެންދާނޭކަމަށެވެ.

އެގޮތުން ރާއްޖޭގެ ކޮންމެ ރަށަކުންވެސް މި ނަންބަރަށް ގުޅައިގެން ޚިދުމަތް ހޯދުމުގެ އިންތިޒާމުތައް ވަނީ ހަމަޖައްސާފައެވެ. މި ހޮޓްލައިން މެދުވެރިކޮށް ބޭސް އޯޑަރުކުރުމާއި، ޒަރޫރީ ސިއްހީ ސާމާނު ހޯދުމުގައި އެހީތެރިކަން ލިބޭނެއެވެ. އަދި، ސްޓޭޓްފާމާ ޕޯޓަލް މެދުވެރިކޮށް ކޮންމެ ރައްޔިތަކަށްވެސް، އީފާސް ބޭނުންކޮށްގެން ބޭހަށް އޯޑަރުކުރުމާއި، ބޭހުގެ ސްޓޭޓަސް އަދި ޑެލިވެރީގެ ކަންތައް ވަގުތުން ބަލާލެވޭނެއެވެ. 

ސްޓޭޓް ފާމާ ޕޯޓަލް ލިންކު:https://portal.statepharma.mv/ 

މިކަމާއި ގުޅޭގޮތުން މައުލޫމާތު ހިއްސާކުރަމުން ސްޓޭޓްފާމާގެ މެނޭޖިންގ ޑިރެކްޓަރު ޑރ. ޝާހް ޢަބްދުﷲ މާހިރު ވިދާޅުވީ، ދެމެހެއްޓެނިވި ގޮތެއްގައި ބޭސް ފަސޭހައިން ހޯދޭނެ މަގު ފަހިކޮށްދިނުމަކީ އެކުންފުނިން އެންމެ ބޮޑަށް އިސްކަންދޭ އެއް ކަންތައްކަމަށެވެ.

"1505ހޮޓްލައިނާއި ސްޓޭޓްފާމާ ޕޯޓަލް ތައާރަފުކުރުމުގެ މައިގަނޑުމަގުސަދަކީ، ކޮންމެ ވަގުތަކު އަދި ކޮންމެ ތަނެއްގައި ހުރެގެންވެސް، ބޭސްލިބުމުގައި ދިމާވާ ދަތިތައް ރައްޔިތުންނަށް ފަސޭހަކަމާއިއެކު ހުށަހެޅޭނެނިޒާމެއް ގާއިމުކުން. މި ވަސީލަތްތަކުގެ ސަބަބުން ރައްޔިތުންގެބޭނުންތައް ދެނެގަނެވި، ރާއްޖޭގެ ހުރިހާ ސަރަހައްދަކަށް ބޭސްފޯރުކޮށްދިނުމުގެ ހިދުމަތް މިހާރަށްވުރެ ހަރުދަނާކުރެވޭނެ ކަމަށް ޤަބޫލުކުރެވޭ" ސްޓޭޓްފާމާގެ މެނޭޖިންގ ޑިރެކްޓަރު ޑރ. ޝާހް ޢަބްދުﷲ މާހިރު ވިދާޅުވިއެވެ.

މުހިންމު ބޭހާއި ސިއްހީ ސާމާނު ހޯދުމުގައި އެހީ ބޭނުންވާ ކޮންމެ ވަގުތެއްގައިވެސް 1505 އަށް ގުޅުމަށް ނުވަތަ ޕޯޓަލް މެދުވެރިކޮށް އޯޑަރުކުރުމަށް ސްޓޭޓްފާމާއިން ވަނީ ރައްޔިތުންނަށް އިލްތިމާސްކޮށްފައެވެ.

ސްޓޭޓްފާމާއަކީ ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން 2025 އުފެއްދެވި ކުންފުންޏެކެވެ. މި ކުންފުނި އުފެއްދުމުގެ މައިގަނޑު މަޤްސަދަކީ ރައްޔިތުންނަށް ބޭނުންވާ ބޭހާއި މެޑިކަލް ސާމާނު ވީހާވެސް ފަސޭހައިން ރައްޔިތުންނަށް ފޯރުކޮށްދިނުމެވެ. 

ބޭހާއި އެނޫންވެސް މެޑިކަލް އާލާތްތައް ފަސޭހަކަމާއެކު ލިބެން ނެތުމަކީ މިއަދު ރައްޔިތުންގެ ވަރަށް ބޮޑު ޝަކުވާއަކަށް ވެފައި އޮންނަ ކަމެއްކަން ފާހަގަކޮށްލެވެއެވެ.