ކުރީގެ ސަރުކާރުގެ ދުވަސްވަރު، 2021 އާއި 2023 އާ ދެމެދު އެމް.ޑަބްލިޔު.އެސް.ސީ އިން އޮޑިދޯނިފަހަރު ކުއްޔަށް ހިފުމަށް ޖުމްލަ 42,044,050 ރުފިޔާ ހޭދަކޮށްފައިވާކަން އޮޑިޓަރ ޖެނެރަލްގެ އޮފީހުން ނެރުނު ރިޕޯޓަކުން ހާމަވެއްޖެއެވެ.

މި ރިޕޯޓުގައި ބަޔާންކޮށްފައިވާ ގޮތުގައި، ކުންފުނީގެ އަމިއްލަ އުޅަނދުތައް ބޭނުންކުރެވެން ހުރިތޯ ބަލާނެ އެއްވެސް ނިޒާމެއް ގާއިމުކޮށްފައި ނުވާއިރު، މި ހުރިހާ ޚަރަދެއްވެސް ކޮށްފައިވަނީ ކުންފުނީގެ އަމިއްލަ އުޅަނދުތައް ބޭނުންކުރެވެން ނެތް ކަމަށް ބަލައިގެންނެވެ.

އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، 2022 އަދި 2023 ވަނަ އަހަރު އުޅަނދުތައް ކުއްޔަށް ހިފާފައިވަނީ "ކުއްލި ހާލަތުގެ" ޕްރޮކިއުމަންޓް އުސޫލުގެ ދަށުންނެވެ. ނަމަވެސް، ބައެއް މަސައްކަތްތައް ނިންމިތާ 8 މަސް ދުވަސް ފަހުންވެސް ޕްރޮކިއުމަންޓް ފޯމުތައް ހުށަހަޅާފައިނުވާކަން ވަނީ ފާހަގަކުރެވިފައެވެ. އަދި ބައެއް ފޯމުތަކުގައި ޕްރޮކިއުމަންޓް ސެކްޝަނުގެ ސޮއި ނެތުމުގެ ސަބަބުން، އެ ފޯމުތައް ލިބުނު ސީދާ ތާރީޚެއް އެނގޭކަށް ނެތެވެ.

އުޅަނދުތައް ކުއްޔަށް ހިފުމުގައި ވަކި ކުންފުންޏަކަށް ބަރޯސާވެފައިވާ މިންވަރު ބޮޑުކަންވެސް އޮޑިޓުން ދައްކައެވެ. ހާއްސަކޮށް "ވައިޓް ސްޓާ ޕްރައިވެޓް ލިމިޓެޑް" އަށް ދީފައިވާ މަސައްކަތްތަކުގައި، އަގުތައް ވަނީ ބޮޑުތަނުން އުފުލިފައެވެ. 2021 ވަނަ އަހަރު ދަތުރަކަށް އެވްރެޖްކޮށް 81,037 ރުފިޔާ ހޭދަވި ނަމަވެސް، 2023 ވަނަ އަހަރު މި އަގު ވަނީ 317,038 ރުފިޔާއަށް އުފުލިފައެވެ. މިއީ ދެ އަހަރު ތެރޭގައި ގާތްގަނޑަކަށް ތިން ގުނައިގެ އިތުރުވުމެކެވެ.

އުޅަނދުތައް ކުއްޔަށް ހިފުމަށް "ކުއްލި ހާލަތު" ބޭނުންކުރި ސަބަބެއް ކަމަށް ކުންފުނިން ބުނެފައިވަނީ މަޝްރޫއުތައް ލަސްވިޔަ ނުދިނުމަށެވެ. ނަމަވެސް، އޮޑިޓް ރިޕޯޓުގައިވާ ތަފާސްހިސާބުތަކުން ފެންނަ ގޮތުގައި ގިނަ މަޝްރޫއުތައް ވަނީ އިންތިހާއަށް ލަސްވެފައެވެ. މީގެ ތެރޭގައި ފަޔަރ ހައިޑްރަންޓް ސިސްޓަމް ފަދަ މަސައްކަތްތައް ނިންމަން ކަނޑައެޅި ތާރީޚަށްވުރެ 1,331 ދުވަސް އިތުރަށް ހޭދަވެފައިވާކަން ފާހަގަކުރެވެއެވެ.

އޮޑިޓް ރިޕޯޓުގެ ނިންމުމުގައި ބަޔާންކޮށްފައިވަނީ، ކުންފުނީގެ ޕްލޭނިންގ ބަލިކަށިވުމުގެ ސަބަބުން މިފަދަ ބޮޑެތި ޚަރަދުތަކެއް ހިނގަން މެދުވެރިވި ކަމަށެވެ. އަދި ކުރިއާލާ ރަނގަޅަށް ރޭވުންތެރިކަމާއެކު މަސައްކަތް ކުރިނަމަ، ލީސިންގ އެގްރީމެންޓްތަކެއްގެ ދަށުން ނުވަތަ ގިނަ ބަޔަކަށް ހުޅުވާލައިގެން މިއަށްވުރެ މާ އަގުހެޔޮކޮށް މި ޚިދުމަތް ހޯދޭނެ ކަމަށް އޮޑިޓަރ ޖެނެރަލް ވަނީ ލަފާދެއްވާފައެވެ.