ދިވެހި ފުލުހުންގެ ޚިދުމަތުގެ އެންޓި ސްކޭމް ސެންޓަރު އުފެއްދި ފަހުން ވޭތުވެދިޔަ އެއް އަހަރު ދުވަހުގެ ތެރޭގައި 10 މިލިއަނަށްވުރެ ގިނަ ރުފިޔާ އަނބުރާ ހޯދައިފިއެވެ.

ފުލުހުންގެ އެންޓި ސްކޭމް ސެންޓަރު ވުޖޫދަށް އައުމަށްފަހު އެތަނުން ކުރަމުންގެންދާ މަސައްކަތްތަކާ ގުޅޭގޮތުން ޕީއެސްއެމަށް ހިއްސާކުރި މައުލޫމާތުގައި ބުނެފައިވަނީ އެ ސެންޓަރުގެ ހިދުމަތް ދޭންފެށިފަހުން ކާމިޔާބުކަމާއެކު ސްކޭމްތަކާ ގުޅޭ މައްސަލަތައް ބަލަމުން އަންނަކަމަށެވެ. މިދިޔަ އަހަރުގެ މާޗްމަހުގެ 17 ވަނަ ދުވަހުން ފެށިގެން މިއަހަރުގެ އެދުވަހާ ހަމަޔަށް އެންޓި ސްކޭމް ސެންޓަރަށް ޖުމްލަ 2،259 މައްސަލަ ވަނީ ހުށަހަޅާފައެވެ. އެ މުއްދަތުގައި ސްކޭމްތަކުގެ ސަބަބުން ޖުމުލަ 27,564,410 ރުފިޔާ ގެއްލިފައިވެއެވެ. މީގެ ތެރެއިން މިހާތަނަށް 10,190,879 ރުފިޔާ އަނބުރާ ހޯދުނުކަމަށް ފުލުހުން ބުނެފައި ވެއެވެ.

ފުލުހުން ބުނީ މިހާތަނަށް ހުށަހެޅުނު މައްސަލަތަކުގެ ތެރެއިން 785 މައްސަލައެއް ހައްލުކުރެވިފައިވާއިރު، ސްކޭމްތަކާ ގުޅުންހުރި 3,852 ބޭންކިން އެކައުންޓް ފްރީޒްކޮށްފައިވާކަމަށެވެ. އަދި މި މައްސަލަތަކާ ގުޅިގެން 36 މީހަކު ހައްޔަރުކޮށް، ސްކޭމް ހިންގުމަށް ބޭނުންކުރި ރާއްޖޭގައި ރަޖިސްޓްރީކޮށްފައިވާ 235 ނަންބަރަކާއި 452 ޑިވައިސެއް ބްލޮކްކޮށްފައިވާކަމަށެވެ.

ފުލުހުން ހާމަކުރި ގޮތުގައި، ހުށަހެޅޭ މައްސަލަތަކުގެ %50 އަކީ އީ-ކޮމާރސް ނުވަތަ އޮންލައިން ވިޔަފާރިތަކާ ގުޅުންހުރި މައްސަލަތަކެވެ.

ފޔުލުހުން ބުނީ އެންޓި ސްކޭމް ސެންޓަރުގެ މަސައްކަތްތައް ޤާނޫނީ އޮނިގަނޑެއްގެ ދަށުން ބައްޓަން ކުރެވިފައިވުމަކީ، ބޭންކުތަކާއި މާލީ އިދާރާތަކާއެކު ސީދާ މުއާމަލާތްކޮށްގެން އަވަސް ފިޔަވަޅުތައް އެޅުމަށް ލިބުނު ބޮޑު ފަސޭހައެއް ކަމަށެވެ. ނަމަވެސް، ސްކޭމް ކުރާ ފައިސާ ރާއްޖެއިން ބޭރުގެ ބޭންކުތަކަށް ފޮނުވުމަކީ ފައިސާ އަނބުރާ ހޯދުމުގައި ކުރިމަތިވާ އެންމެ ބޮޑު ގޮންޖެހުމެވެ. މީގެ އިތުރުން، މައްސަލަ ރިޕޯޓު ކުރުން 48 ގަޑިއިރަށްވުރެ ލަސްވުމަކީވެސް ފައިސާ ހޯދުމަށް އޮތް ހުރަހެއްކަމަށް ފުލުހުން ވަނީ ބުނެފައެވެ.