އިސްރާއީލުގެ އިސްތިޢުމާރީ ބާރުތަކުން މަސްޖިދުލް އަޤްޞާ 40 ދުވަހަށް ބަންދުކުރުމަށްފަހު، މިއަދު ހުޅުވާލައިފިއެވެ.

ފަލަސްތީނުގެ އިސްލާމިކް ވަޤުފް އިދާރާއިން ކަށަވަރުކޮށްދޭ ގޮތުގައި، އެއްވެސް ޢަދަދެއްގެ ހިފެހެއްޓުމެއް ނެތި މުސްލިމުންނަށް އަޤްޞާ މިއަދު ވަނީ ހުޅުވާލާފައެވެ. ނަމަވެސް، މި ނިންމުމުގެ ފަހަތުގައި ޔަހޫދީންގެ ނުރައްކާތެރި އެޖެންޑާއެއް އޮތްކަމަށް މަޝްރަޙް ދިރާސާކުރާ ފަރާތްތަކުން އަންނަނީ ބުނަމުންނެވެ. 

އެގޮތުން މި ނިންމުމާއެކު، ޔަހޫދީ "ޓެމްޕަލް ގްރޫޕްތަކުން" ވަނީ އެމީހުންގެ ސަޕޯޓަރުން އަޤްޞާ މިސްކިތަށް ވަދެގަތުމަށް ގޮވާލާފައެވެ. އަދި މިސްކިތަށް ވަދެގަންނަ ވަގުތުތައް އިތުރުކޮށްފައިވާކަން ވެސް އެ ޖަމާޢަތްތަކުން ވަނީ އިޢުލާންކޮށްފައެވެ.

މިކަމާ ގުޅޭގޮތުން ފަލަސްޠީނުގެ މަސްދަރުތަކުން ފާހަގަކުރާ ގޮތުގައި، މިސްކިތް އިއްޔެ ހަވީރު ހުޅުވާލުމުގެ ބަދަލުގައި މާދަމާއަށް ލަސްކުރީ، ހަނގުރާމަ ހުއްޓާލުމުގެ އުފަލުގައި މުސްލިމުންނަށް އެކަނި މިސްކިތަށް ވަނުމުގެ ފުރުޞަތު ނުދިނުމަށެވެ. މިއަދު ހުޅުވާލަނީ މުސްލިމުންނާއި ޔަހޫދީ ވަޒަންވެރިންނަށް އެއްފަހަރާ ވަދެވޭ ގޮތަށެވެ.

މިއަދަކީ ޔަހޫދީންގެ "ޕާސްއޯވަރ" ފާހަގަކުރާ ފަހު ދުވަހެވެ. މި ދުވަހާ ދިމާކޮށް މިސްކިތަށް ވަދެގަންނަ ވަގުތުތައް ވަނީ ހެނދުނު 6:30 އިން 11:30 އަށް އަދި މެންދުރުފަހު 1:30 އިން 3:00 އަށް އިތުރުކޮށްފައެވެ. މިއީ 2008 ވަނަ އަހަރު އޮތް 3 ގަޑިއިރުގެ ބަދަލުގައި، ޖުމްލަ 6 ގަޑިއިރާއި ބައިގެ ވަގުތެކެވެ. މީގެ ބޭނުމަކީ އަޤްޞާގެ ވަގުތުތައް މުސްލިމުންނާއި ޔަހޫދީންގެ މެދުގައި އެއްވަރަކަށް ބަހާލުމެވެ.

މީގެ އިތުރުން، ރަމަޟާން މަހުގެ ކުރިން ހެނދުނު 7:00 ގައި ޔަހޫދީން އަޤްޞާއަށް ވަދެގަންނަ ގޮތަށް އޮތް ނަމަވެސް، މިހާރު އެ ވަގުތު 6:30 އަށް އަވަސްކޮށް، އެއީ ދާއިމީ ވަގުތެއްގެ ގޮތުގައި ހަމަޖެއްސުމަށް ވަނީ މަސައްކަތް ފަށާފައެވެ.

ހަމައެހެންމެ އިސްރާއީލުގެ "ހޯމް ފްރަންޓް ކޮމާންޑުން" މިސްކިތުގެ ކަންކަމުގައި ގޮތް ނިންމަން ފެށުމަކީ، އަޤްޞާގެ ހަމައެކަނި ޝަރުޢީ ބެލެނިވެރިޔާ ކަމުގައިވާ އިސްލާމިކް ވަޤުފްގެ ބާރު ކަނޑުވާލުމަށް ކުރާ މަސައްކަތުގެ ބައެއްގެ ކަމަށް ފަލަސްތީނުގެ މަސްދަރުތަކުން ބުނެއެވެ.

މީގެ އިތުރުން ޔަހޫދީ ހަރުކަށި ގްރޫޕްތަކުން އަޤްޞާ މިސްކިތުގެ އެތެރޭގައި ނުވަތަ އެ ސަރަޙައްދުގައި ޖަނަވާރު ކަތިލައި ޤުރުބާން ކުރުމަށް ކުރާ މަސައްކަތްތައް މާދަމާ އިތުރުވާނެ ކަމަށްވެސް މަސްދަރުތަކުން ބުނެއެވެ. 

މި ހުރިހާ ކަމަކީ އަޤްޞާ މިސްކިތުގެ މިހާރުގެ ހާލަތު ބަދަލުކޮށް، ޔަހޫދީންގެ ފުރިހަމަ ކޮންޓްރޯލްގެ ދަށަށް އެތަން ގެނައުމަށް ހިންގާ ނުރައްކާތެރި ޙަރަކާތްތަކެއް ކަމަށް މުޙައްލިލުން އިންޒާރު ދެއެވެ. އެހެންކަމުން މިއީ ފަލަސްޠީނުގެ ރައްޔިތުންނާއި މުޅި އިސްލާމީ އުންމަތާ ދެކޮޅަށް ހިންގޭ ބޮޑު ޖަރީމާއެއްގެ ގޮތުގައި އެފަރާތްތަކުން ސިފަކުރެވެއެވެ.