ފ.ފީއަލީ ބަނދަރުގައި އޮތް ތެއޮ ބޯޓެއްގައި ހިނގާދިޔަ އަލިފާނުގެ ހާދިސާގެ ކަންކަން ގާތުން ބަލަމުންދާކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީން ބަލަމުންގެންދާކަމަށް އެ އިދާރާއިން ބުނެފިއެވެ.
އެންޑީއެމްއޭއިން އެކްސްގައި ކުރި ޕޯސްޓެއްގައި ބުނެފައިވަނީ، ފީއަލީގައި އަލިފާނުގެ ހާދިސާއެއް ހިނގައިގެން އުޅޭ ކަމުގެ މައުލޫމަތު އެރަށު ކައުންސިލުން އޮތޯރިޓީއާ ވަނީ ހިއްސާކޮށްފައިވާކަމަށެވެ. އަދި އަލިފާންގަނޑު ކޮންޓްރޯލް ކުރުމަށް އެފް.އާރް.އެސް އިން ދަނީ ހަރަކާތްތެރިވަމުންދާަ ކަމަށްވެސް މައުލޫމާތު ލިބިފައިވާކަމަށެވެ.
އެންޑީއެމްއޭއިން ބުނެފައިވަނީ އެ ހާދިސާ އާ ގުޅިގެން އެ އިދާރާއިން ކުރަންޖެހޭ ކަންކަން ކުރުމުގެ މަސައްކަތް ފަށާފައިވާކަމަށެވެ.
ފީއަލީގައި މިއަދު އެ ހާދިސާ ހިނގިކަމުގެ ރިޕޯޓް ލިބިފައިވަނީ ހެނދުނު 09:15 ހާއިރުކަމަށް ފުލުހުން ވަނީ ބުނެފައެވެ. އަލިފާން ރޯވުމާއެކު އަލިފާންގަނޑު ނިއްވާލުމަށް އެސަރަހައްދުގައި ފުލުހުންނާއި ކަމާގުޅުން ހުރި އިދާރާތަކުން ވަނީކޮށްފައެވެ.
މި ހާދިސާގެ މައުލޫމާތު ވޮއިސްއާ ހިއްސާކުރި އެރަށު މީހަކު ބުނީ، މި ހާދިސާ ހިނގި އިރު ބޯޓުގައި ދެމީހުން ތިބިކަމަށެވެ. އެތަނުން އެކަކު ފިހިފައިވާއިރު، ބޯޓުގައި އަލިފާން ރޯވުމާއެކު ދެމީހުންވެސް މޫދަށް ފުންމާލީ ކަމަށް އޭނާ ބުންޏެވެ.
ފުލުހުން ފަހުން ހިއްސާކުރި މައުލޫމާތުގައި ވާގޮތުން މި ހާދިސާގައި ފިހިގެން ހާލުދެރަވި ބިދޭސީމީހާއަށް ވަނީ އެރަށު ސިއްހީ މަރުކަޒުގައި ފަރުވާދޭން ފަށާފައެވެ. މައުލޫމާތު ލިބިފައިވާ ގޮތުގައި މި ހާދިސާގައި ފިހިގެން ސީރިއަސް އަނިޔާތައް ލިބުނު އެކަކު މާލެ ގެނައުމުގެ މަސައްކަތްވެސް ވަނީ ފަށާފައެވެ.
މި ހާދިސާގައި ތެއޮ ބޯޓާ ކައިރީގައި އޮތް ދެ ދޯންޏަކަށާއި ޑިންގީއަށް ވަނީ އެކިވަރުގެ ގެއްލުންތައް ލިބިފައެވެ. އަދި އެ ސަރަހައްދުގައި ހުރި އައިސް ޕްލާންޓަށްވެސް ވަނީ، އަލިފާން ހިފައި ގެއްލުން ލިބިފައެވެ.
Advertisement
This content is created and paid for by advertisers and does not involve Voice Journalists
