ޑޮކްޓަރުންނަށް ދެއްކުމަށާއި ޓެސްޓުތައް ހެދުމަށް އާސަންދައިގެ ޚިދުމަތް ލިބުމުގައި ދަތިތަކާ ކުރިމަތިލާންޖެހޭ ކަމަށް ވިދާޅުވެ، ހުށަހެޅި ކުއްލި މައްސަލަ އަނބުރާ ފޮނުވައިލައިފިއެވެ.
މި މައްސަލަ ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީ މެންބަރު މުޙައްމަދު އިބްރާހީމް (ކުޑޫ)އެވެ.
އެ ކުއްލި މައްސަލައިގައި ބުނެފައިވާގޮތުން، ހޮސްޕިޓަލުތަކާއި ކުލިނިކްތަކުން ޑޮކްޓަރުންނަށް ދެއްކުމަށާއި ޓެސްޓުތައް ހެދުމަށް ލިބެމުން އައި އާސަންދައިގެ ޚިދުމަތް އެ ތަންތަނުން އަންނަނީ ހުއްޓައިލަމުންނެވެ. ސް ސިޓީތަކަށް ބޭސް ނުލިބުމާއި، ފުރާނަ ސަލާމަތްކުރުމަށް ކޮންމެހެން ބޭނުންވާ ތަކެތި ފޯރުކޮށްނުދެވޭ މައްސަލަތައް ފެންމަތިވާކަމަށްވެސް ބުނެފައިވެއެވެ.
އެގޮތުން، ފީޑިންގް ޓިޔުބް ލިބުން ލަސްވި މައްސަލަ ފާހަގަކުރައްވާފައިވެއެވެ.
”އެފަދަ ކަންކަން ދިމާވަނީ ބޭސް އެތެރެކުރުމުގެ މުއާމަލާތްތަކުން ކޮރަޕްޝަން ހިންގައި ނާޖާއިޒު ފައިދާ ނެގުމަށް އެންސްޕާއާއި އެސްޓީއޯގެ އުސޫލުތަކަށް ސަރުކާރުން ބަދަލު ގެނެސް، ބޭހާއި މެޑިކަލް ސާމާނު ވަކި ބަޔަކު އަތުން ގަތުމަށް ރާވައިފައިވުމުން ކަމަށް މައުލޫމާތު ލިބޭ“ މައްސަލާގައި ބުނެފައިވެއެވެ.
މި މައްސަލައާ ގުޅޭގޮތުން، މިއަދުގެ ޖަލްސާގެ ރިޔާސަތުގައި އިންނެވި މަޖިލީހުގެ ނައިބު ރައީސް އަޙްމަދު ނާޒިމް ވިދާޅުވީ، މަޖިލީހަށް ހުށަހެޅޭ ކުއްލި މައްސަލައެއް ވާންވާނީ ހަގީގަތެއްގެ މައްޗަށް ބިނާކޮށް ހުށަހެޅޭ މައްސަލައަކަށް ކަމަށެވެ.
"އެހެން ނަމަވެސް، އިއްޒަތްތެރި މެންބަރު ހުށަހެޅުއްވި މައްސަލައިގައި ބަޔާންކޮށްފައިވާ ކަންކަން ދިމާވަނީ ބޭސް އެތެރެކުރުމުގެ މުއާމަލާތްތަކުން ކޮރަޕްޝަން ހިންގައި ނާޖާއިޒު ފައިދާ ނެގުމަށް ސަރުކާރުން އެންސްޕާއާއި އެސްޓީއޯގެ އުސޫލުތަކަށް ބަދަލު ގެނެސްގެން ބޭހާއި މެޑިކަލް ސާމާނު ވަކިބައެއްގެ އަތުން ގަތުމަށް ރާވައިފައިވާ ކަމަށް މައުލޫމާތު ލިބިފައިވާކަމަށް ބަޔާންކޮށްފައިވާއިރު، އެއީ ހަގީގަތެއްކަން އިއްޒަތްތެރި މެންބަރަށް ދައްކުވައިދެވިފައެއް ނުވޭ،" އޭނާ ވިދާޅުވިއެވެ.
މީގެ އިތުރުން ކުއްލި މައްސަލާގައި ބަޔާންކޮށްފައިވާ ކަމެއް ދިމާވާންޖެހޭނީ ކުއްލިއަކަށް ކަން ގަވާއިދުގައިވާއިރު، އެ ޝަރުތުވެސް ފުރިހަމަނުވާ ކަމަށް، ނާޒިމް ވިދާޅުވިއެވެ.
”ކުއްލި މައްސަލައަކީ ވޭތުވެދިޔަ 7 ދުވަސްތެރޭގައި ހިނގާފައިވާ ކަމަކާ ގުޅޭ މައްސަލައަކަށްވާންވާނެ ކަމަށް ބަޔާންކޮށްފައިވާއިރު، މެންބަރު ފޮނުއްވި މައްސަލާގައި އެ ޝަރުތުފުރިހަމަ ނުވާކަމުގައި ދަންނަވަން. ވީމާ އެ މައްސަލަ ކުއްލި މައްސަލައެއްގެ ގޮތުގައި ހުށަހެޅެން ނެތް ކަމުގައި ދަންނަވަން.“ ނާޒިމް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
