ކޮރަޕްޝަނުގެ މައްސަލަތަކެއް ސާބިތުވެ ޖަލުގައި ހުރި އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް، ވަގުތީ ގޮތުން ގޭބަންދަށް ބަދަލުކޮށްފިއެވެ.
ކަރެކްޝަންސުން މައުލޫމާތު ދިން ގޮތުގައި ބައްސާމް ގެއަށް ބަދަލުކޮށްފައިވަނީ އޭނާގެ ސިއްހީ ހާލަތު ހުރިގޮތުން މެޑިކަލް ބޯޑުގެ ލަފާގެ މަތިން ވަގުތީ ގޮތުންނެވެ.
ކޮރަޕްޝަންގެ މައްސަލަތަކެއް ސާބިތުވެ ދިގު މުއްދަތުގެ ޖަލު ހުކުމެއް ތަންފީޒު ކުރައްވަމުން ގެންދަވާ ބައްސާމް މީގެ ކުރިންވެސް ވަނީ ގެއަށް ބަދަލުކޮށްފައެވެ. އެގޮތުން މީގެ ކުރިން ކުރި ސާޖަރީއަކަށްފަހު އެންމެ ފަހުން ޖަލަށް ބަދަލުކުރީ މިއަހަރުގެ މާޗް މަހުގެ ތެރޭގައެވެ.
ބައްސާމްގެ މައްޗަށް ޖަލު ހުކުމެއް އައީ ފީފާއިން އެފްއޭއެމަށް ދިން 1.2 މިލިއަން ޑޮލަރު އުސޫލުތަކާ ހިލާފަށް އަމިއްލަ ކަންކަމުގައި ބޭނުންކުރި މައްސަލައިގައެވެ. އެ މައްސަލައިގައި އޭނާގެ މައްޗަށް އުފުލި މަނީ ލޯންޑަރިންގގެ ދައުވާ ސާބިތުވެ، 23 އަހަރަށް ޖަލަށްލުމާއެކު 44.7 މިލިއަން ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ހުކުމް އިއްވީ މިއަހަރުގެ ޖެނުއަރީ މަހުގެ ތެރޭގައެވެ.
މީގެ އިތުރުން ވެސް، އެންޓި ކޮރަޕްޝަން ކޮމިޝަން (އޭސީސީ) އިން ވަނީ ބައްސާމްގެ މައްޗަށް މަނީ ލޯންޑްރިންގ ކުށުގެ އިތުރު ދައުވާތަކެއް ކޮށްދިނުމަށް އެދި ޕްރޮސިކިއުޓަރ ޖެނެރަލްގެ އޮފީހަށް މައްސަލަ ފޮނުވާފައެވެ.
Advertisement
This content is created and paid for by advertisers and does not involve Voice Journalists
