ވެރިކަންކުރާ ޕާޓީ، ޕީއެންސީގެ ހުސްވެފައިވާ ސެކެރެޓަރީ ޖެނެރަލްގެ މަޤާމަށް މޫސާ ފަތުޙީ އާދަމް އައްޔަނުކޮށްފިއެވެ.
މޫސާ ފަތުޙީ އެ މަޤާމަށް އައްޔަނުކޮށްފައިވާކަން އިއުލާންކޮށް ޕީއެންސީން މިއަދު ކުރި ޕޯސްޓެއްގައިވަނީ އޭނާ އަށް މަރުޙަބާ ކިޔާފައެވެ.
މޫސާ ފަތުޙީ އަކީ ކެބިނެޓަށް ގެނައި ބަދަލާއެކު އުވާލެވުނު ސިޓީތަކާ ބެހޭ ވުޒާރާގެ ސްޓޭޓް މިނިސްޓަރަކަށް ހުންނެވި ބޭފުޅެކެވެ.
ޕީއެންސީގެ އެސްޖީގެ މަގާމު ހުސްވީ ކުރިން އެ މަގާމުގައި ހުންނެވި މުއާޒް ހަލީމް މަގާމުން އިސްތިއުފާދެއްވުމާ ގުޅިގެންނެވެ.
މުއާޒް ހަލީމް މަގާމުން އިސްތިއުފާދެއްވީ، މިމަހު 18 ވަނަ ދުވަހުއެވެ.
އެކްސްގައި ކުރެއްވި ޕޯސްޓެއްގައި އޭނާ ވިދާޅުވީ މަގާމުން އިސްތިއުފާ ދެއްވީ، ރައްޔިތުންގެ ވިންދާ އެއްގޮތަށް ޕާޓީގެ މަސައްކަތްތައް ބައްޓަންކުރައްވައި، ފުރިހަމަ ނަތީޖާ ޙާޞިލް ކުރެވޭ ޕާޓީއަކަށް ޕާޓީ ހެއްދެވުމަށް ޕާޓީގެ ރައީސް، ރައީސުލްޖުމްހޫރިއްޔާ ޑރ.މުހައްމަދު ފައްޓަވާފައިވާ ހަރުދަނާ މަސައްކަތްޕުޅުތަކަށް ފުރިހަމަ އެއްބާރުލުން ދިނުމަށް ބޭނުންވާތީކަމަށެވެ.
މީގެ އިތުރުން މަގާމުގައި ކުރަންޖެހޭ މަސައްކަތްތައް ކުރުމަށް ފުރިހަމައަށް ވަގުތު ދެވޭނެ ބޭފުޅަކު ހުރުމަކީ މުހިންމު ކަމެއްކަމަށްވެސް އެކްސްގައި ކުރެއްވި ޕޯސްޓްގައި މުއާޒް ހަލީމް ވަނީ ފާހަގަކުރައްވާފައެވެ.
ޕީއެންސީގެ ސެކެޓްރީކަމުގެ މަގާމުގެ އިތުރުން އޭނާ އޭނާއަކީ ޑިފެންސް މިނިސްޓްރީގެ ސްޓޭޓް މިނިސްޓަރކަމުގެ މަގާމުވެސް ފުރުއްވަމުންނެވެ.
Advertisement
This content is created and paid for by advertisers and does not involve Voice Journalists
