ދ. ކުޑަހުވަދޫގައި އެފްއެސްއެމްގެ ފިއުލް ސްޓޭޝަނެއް ގާއިމްކޮށް، ހިދުމަތްދޭން ފަށައިފިއެވެ.
މި ފިއުލް ސްޓޭޝަންގެ ހިދުމަތްދޭން ފަށައިފައިވަނީ މިއަދުއެވެ. އަދި މިކަން އިއުލާންކޮށްފައިވަނީ، އެފްއެސްއެމުންނެވެ. ކުޑަހުވަދޫއަކީ މިގޮތުން ފިއުލްޝެޑް ގާއިމްކުރި ހަވަނަ ސަރަހައްދެވެ.
މުޅި ރާއްޖޭގައި ތެއޮ ލިބޭނެ އިންތިޒާމު ފަސޭހަކުރުމަށް ސަރުކާރުން ފަށާފައިވާ މަސައްކަތުގެ ދަށުން، ރާއްޖޭގެ އެކި ކަންކޮޅުތަކުގައި ޖުމްލަ 18 ފިއުލް ސްޓޭޝަން ތަރައްޤީކުރުމުގެ މަސައްކަތް ދަނީ ކުރިއަށެވެ. މި މަޝްރޫޢުގެ މައިގަނޑު ސިޔާސަތަކީ ރާއްޖޭގެ ކޮންމެ އަތޮޅެއްގައި މަދުވެގެން އެއް ފިއުލް ސްޓޭޝަން ޤާއިމުކުރުމެވެ.
މި މަޝްރޫޢުގެ ދަށުން މިހާތަނަށް 6 ސަރަޙައްދެއްގައި ސްޓޭޝަންތައް ހުޅުވައި ޚިދުމަތް ދޭން ފަށާފައިވާއިރު، ބާކީ ހުރި ސްޓޭޝަންތަކުގެ މަސައްކަތްތައް ވެސް ރާއްޖޭގެ އެކި އަތޮޅުތަކުގައި މިހާރު ދަނީ ކުރިއަށެވެ. އެފްއެސްއެމުން މިހާތަނަށް ޝެޑް ގާއިމްކުރި ރަށްތަކުގެ ތެރޭގައި ހިމެނެނީ، ހއ.އިހަވަންދޫ، ހދ.ހަނިމާދޫ، ށ.މިލަންދޫ، ރ.ދުވާފަރު، ބ.ޭދަފުށީގެ އިތުރުން ފ.ނިލަންދޫއެވެ.
މި މަސައްކަތްތައް ކުރިއަށްދަނީ ރާއްޖޭގެ ހުރިހާ އަތޮޅަކަށް ތެޔޮ ލިބުމުގެ ދަތިކަން ޙައްލުކޮށް، އެކަށީގެންވާ އިންތިޒާމެއްގެ ދަށުން ތެޔޮ ފޯރުކޮށްދިނުމަށް ސަރުކާރުން ގެންގުޅޭ ތަޞައްވުރާ އެއްގޮތްވާ ގޮތުގެ މަތިންނެވެ.
Advertisement
This content is created and paid for by advertisers and does not involve Voice Journalists
