އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ އުދުވާނުގައި ބޭނުންކުރާ ހަތިޔާރު އުފެއްދުމަށް ބޭނުންވާ ސާމާނު އުފުލާ ކާގޯ ބޯޓެއްގެ ދަތުރަށް "ގްލޯބަލް ސުމޫދު ފްލޮޓިލާ“ގެ އެކްޓިވިސްޓުން އިއްޔެ ހުރަސްއަޅައިފިއެވެ.
މި ހަރަކާތުގައި ބައިވެރިވި އެކްޓިވިސްޓުން ހުރަސްއަޅާފައިވަނީ ދުނިޔޭގެ އެންމެ ބޮޑު އެއް ކާގޯ ބޯޓު ކަމަށްވާ "އެމް.އެސް.ސީ މާޔާ"އަށެވެ. އިޓަލީގެ ސިސިލީގެ ހުޅަނގު ދެކުނުން ދަތުރުކުރަމުންދިޔަ މި ބޯޓު މިސްރާބު ޖަހާފައިވަނީ އިޒްރޭލުގެ އަޝްދޫދު އަދި ހައިފާ ބަނދަރަށެވެ.
ޝިޕް ޓްރެކިންގ ވެބްސައިޓްތަކުން ދައްކާގޮތުގައި، މި ބޯޓަކީ ޣައިރު ގާނޫނީ އިސްރާއީލަށް މުދާ އުފުލާ ކަމަށް އަލްޖަޒީރާއިން ކަށަވަރުކޮށްދީފައިވާ މެޑިޓަރޭނިއަން ޝިޕިންގ ކޮމްޕެނީ އިން އޮޕަރޭޓްކުރާ ބޯޓެކެވެ.
ގްލޯބަލް ސުމޫދު ފްލޮޓިލާގެ 70 އަށްވުރެ ގިނަ އުޅަނދުގެ ތެރެއިން 13 އުޅަނދެއް ބޭނުންކޮށްގެން މި ބޯޓުގެ ދަތުރަށް ހުރަސްއަޅާފައިވަނީ، އިޒްރޭލުގެ "ޖެނޮސައިޑް ވޯ މެޝިން" ނުވަތަ ނަސްލު ނައްތާލުމުގެ ހަނގުރާމައަށް ބޭނުންވާ ތަކެތި ސަޕްލައިކުރުން ހުއްޓުވުމަށެވެ. މީސްމީޑިއާގައި އާންމުކޮށްފައިވާ ވީޑިއޯތަކުން ފެންނަ ގޮތުގައި، ކުދި ރިޔާލަ ދޯނިތަކެއްގައި ތިބި އެކްޓިވިސްޓުން ވަނީ ބިޔަ ކާގޯ ބޯޓު ވަށާލައި، އޭގެ ދަތުރަށް ބުރޫއަރުވާފައެވެ.
މިކަމާ ގުޅޭގޮތުން އެކްޓިވިސްޓުން ނެރުނު ބަޔާނެއްގައި ބުނެފައިވަނީ، ޖެނީވާ ކޮންވެންޝަނާއި، ނަސްލު ނައްތާލުން ހުއްޓުވުމާބެހޭ މުއާހަދާގެ ދަށުން، ފަލަސްތީނުގެ ބިންތަކަށް ވެރިވެގަނެގެން އުޅޭ އިޒްރޭލަށް ހަތިޔާރު ފޯރުކޮށްދިނުން ހުއްޓާލުމަކީ ދުނިޔޭގެ ގައުމުތަކަށް މަޖުބޫރު ކަމެއް ކަމަށެވެ. އަދި ބައިނަލްއަގުވާމީ ގާނޫނުތަކަށް އިހުތިރާމް ނުކޮށް، އިޒްރޭލުން ހިންގާ ޖަރީމާތަކަށް އެހީތެރިވާއިރު، ހިމޭނުން ނުތިބޭނެ ކަމަށްވެސް އެ ގްރޫޕުން ބުނެފައިވެއެވެ.
މިއީ ޣައްޒާއަށް އިންސާނީ އެހީ ފޯރުކޮށްދިނުމަށާއި އިޒްރޭލުގެ އަމަލުތަކާ ދެކޮޅަށް ގްލޯބަލް ސުމޫދު ފްލޮޓިލާއިން ކުރިއަށްގެންދާ ދެވަނަ މިޝަނެވެ. މިދިޔަ އަހަރު މި ގްރޫޕުން ކުރިއަށްގެންދިޔަ މިޝަންގައި ތިމާވެށީގެ ހަރަކާތްތެރިޔާ ގްރެޓާ ތުންބާގް ފަދަ މަޝްހޫރު ފަރާތްތައް ބައިވެރިވިއިރު، އެ ފަހަރު އިޒްރޭލު ސިފައިން ވަނީ އެމީހުން ހިފަހައްޓައި ޖަލަށްލާފައެވެ.
Advertisement
This content is created and paid for by advertisers and does not involve Voice Journalists
