ކުރިއަށް އޮތްތަނުގައި އެއްވެސް ގައުމަކަށް ހައްޖު ކޯޓާ އިތުރު ކުރެވޭނަމަ، ރާއްޖެއަށް އެ ފުރުސަތު ލިބިގެންދާނެ ކަމަށް އިސްލާމީކަންތައްތަކާއި އައުޤާފާ ބެހޭ ވަޒީރު، ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި ރައްޔިތުންގެ މަޖިލީހުގައި އައްޑޫ މީދޫ ދާއިރާގެ މެމްބަރު، އަބްދުއްރަހްމާން ވަނީ ހައްޖު ކިޔުގައި ގިނަ ބަޔަކު ތިއްބާ، ކުންފުނިތަކަށް ދެވޭ ފުރުސަތުގައި މީހުން ހައްޖަށް ދެވޭތީ އެކަމާ ކަންބަޮޑުވުންފާޅުކުރައްވާފައެވެ.
އެކަމާގުޅިގެން ވަޒީރު ވިދާޅުވީ، ކުންފުނިތަކުން ގުރުނަގައިގެން ހޮވޭ މީހުން ހައްޖަށް ފޮނުވުމަކީ ވަރަށް ކުރިން ފެށިގެން ކުރަމުން އަންނަ ކަމެއް ކަމަށެވެ.
ނަމަވެސް މި ސަރުކާރު އައި ފަހުން އެގޮތަށް އެކަން ކުރަން ފުރުސަތު ދިނުން ވަރަށް މަދު ކޮށްފައިވާ ކަމަށް ޝަހީމް ވިދާޅުވިއެވެ. އެގޮތުން މި އަހަރުވެސް އެ ފުރުސަތު ދިނީ މަދު ބަޔަކަށް ކަމަށާ އެގޮތަށް އެކަން ކުރީ ކިޔުގައި ޖެހިގެން ތިބި މީހުންނަށް ފުރުސަތު ދިނުމަށް ކަމަށް ވިދާޅުވުއެވެ.
ޝަހީމް ވިދާޅުވިގޮތުގައި، ކިޔުގައި މީހުން ޖެހިގެން ތިއްބާ ކުންފުނިތަކަށް އެފަދަ ފުރުސަތެއް ދިނުމަކީ އިންސާފުވެރި ގޮތް ކަމަށް އޭނާ ގާބޫލެއްނުކުރައްވައެވެ.
އެފަދައިން ފުރުސަތު ދިނުމުގެ ބަދަލުގައި، އެފަރާތްތަކުންވެސް ފައިސާ ދެއްކުމަށްފަހު ކިޔުއަށް އެރުމަށް ޝަހީމް ވަނީ ލަފާދެއްވާފައެވެ. އެގޮތުން، ކުންފުނިތަކުން އެ މުވައްޒަފަކަށް ފައިސާދީގެން މުވައްޒަފު ކިޔުގައި ޖައްސެމަކީ އެދެވޭ ކަމެއް ކަމަށާ، މިހާރުވެސް ވަކި މިންވަރަކަށް ފައިސާ ދެއްކުމުން ކިޔުގައި ޖެހެވޭނެ ކަމަށް ވަޒީރު ވިދާޅުވިއެވެ.
އެގޮތަށް ކިޔުގައި ޖެހިގެން ތިބުމުން، ކުއްލިއަކަށް ކޯޓާ އިތުރުވެއްޖެ ނަމަވެސް، އެބަޔަކަށް ފުރުސަތު ލިބޭނެ ކަމަށެވެ. އަދި، މިވަގުތު އެއްވެސް ގަމަކަށް އިތުރު ކޯޓާ ދިނުން މަޑުޖައްސާލާފައިވަނީ މައްކާއާއި މަދީނާގައި ކުރިއަށްދާ މަޝްރޫޢުތަކުގެ ސަބަބުން ކަމަށާ، އެހެން އެއްވެސް ގައުމަކަށް ކޯޓާ އިތުރުކުރެވޭ ޙާލަތެއްގައި ރާއްޖެއަށްވެސް އިތުރު ވާނެ ކަމަށް ވަޒީރު ވިދާޅުވިއެވެ.
”އިއްޒަތްތެރި ރަޢީސް މުޢިއްޒުވެސް އަދި އަޅުގަނޑުގެ ފަރާތުންވެސް ވަރަށް ބޮޑަށް މަސައްކަތްކުރަމުން އެބަދަން ސައުދީ ސަރުކާރާ އެންމެ މަތީ ފެންވަރުގައި އެބަ ވާހަކަދައްކެވޭ މިކަމާ (ކޯޓާ އިތުރުކުރުމާ) ބެހޭގޮތުން. ރާއްޖެއަށް އިރާދަކުރެއްވިއްޔާ ކޯޓާ އިތުރުވެގެންދާނެ އެއްވެސް ގައުމަކަށް ކޯޓާ އިތުރުކުރެވޭ ޙާލަތުގައި. އަދި އޮތީ އެއްވެސް ގައުމަކަށް އިތުރުނުކުރެވޭގޮތަށް“ ވަޒީރު ޝަހީމް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
