އެމަނިކުފާނުގެ އަމާޒަކީ އަލުން އެމްޑީޕީއަށް ވެރިކަން ހޯދައިދިނުންކަމަށް ރައީސް ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވެފައިވަނީ، މިއަދު އިހަވަންދޫގެ ރައްޔިތުންނާއި އެކު އެ ރަށުގައި ބޭއްވި ބައްދަލުވުމެއްގައި ވާހަކަދައްކަވަމުންނެވެ.

2023 ވަނަ އަހަރުގެ ރިޔާސީ އިންތިޚާބު ނިމުނުތާ މާ ގިނަ ދުވަހެއް ނުވަނީސް ރައީސް ނަޝީދު ވަނީ ރާއްޖެ ދޫކޮށް އެފްރިކާގެ ގާނާ އަށް ފުރައިވަޑައިގަންނަވާފައެވެ.

3 އަހަރު ވަންދެން އެފްރިކާގައި ވަޒީފާ އަދާކުރުމަށްފަހު، ރައީސް ނަޝީދު ވަނީ އަލުން އެމްޑީޕީއާއި ގުޅިވަޑައިގެން ސިޔާސީ ހަރަކާތްތަކުގައި އަލުން ބައިވެރިވާން ފަށާފައެވެ.

ކުރިއަށް އޮތް އެމްޑީޕީގެ ޗެއަރޕާސަން ހޮވުމުގެ އިންތިޚާބު ކާމިޔާބުކުރުމަށްޓަކައި ރައީސް ނަޝީދު ދަނީ ފައްޔާޒު އިސްމާއިލާއި ގުޅިގެން ކެމްޕެއިން ކުރަމުންނެވެ. އެގޮތުން، ހދ. ކުޅުދުއްފުށްޓައް ގޮސް އެ ބޭފުޅުން ދަނީ މިހާރު އިހަވަންދޫގައި ކެމްޕެއިން ކުރުމުގެ ހަރަކާތްތައް ކުރިއަށްގެންދަމުންނެވެ.

މީގެ އިތުރުން، 2028 ގެ ރިޔާސީ އިންތިޚާބުގައި ފައްޔާޒު ވާދަކުރެއްވުމަށް ނަޝީދު ތާއިދު ކުރައްވާއިރު، ވެރިކަން ލިބިއްޖެ ނަމަ، ދައުލަތާއި ސަރުކާރަކީ ވަކި ދެ ބާރުގެ ގޮތުގައި ހަދައި، ދައުލަތުގެ ވެރިއަކަށް ފައްޔާޒު އަދި ސަރުކާރުގެ ވެރިއަކަށް ނަޝީދު ހެއްދެވުމުގެ މަސައްކަތް ކުރައްވާނެ ކަމަށް ދެބޭފުޅުން ވަނީ ވިދާޅުވެފައެވެ.