މިއަހަރުގެ ފުރަތަމަ ކުއާޓަރުގައި ބޭންކް އޮފް މޯލްޑިވްސްއަށް ސާފްފައިދާގެ ގޮތުގައި 631 މިލިއަން ރުފިޔާ ލިބިއްޖެއެވެ.

ބީއެމްއެލުން ނެރެފައިވާ އެ ބޭންކްގެ މިއަހަރުގެ ފުރަތަމަ ކުއާޓަރުގަ މާލީބަޔާނަށް ބަލާއިރު، މި ކުއާަރުގައި ބޭންކަށް އާމްދަނީގެ ގޮތުގައި ވަނީ 1.6 ބިލިއަން ރުފިޔާ ލިބިފައެވެ. މިދިޔަ އަހަރުގެ ފުރަތަމަ ކުއާޓަރުގައި މިއަދަދު ހުރީ 1.3 ބިލިއަން ރުފިޔާގައެވެ.

މި ކުއާޓަރުގައި ބީއެމްއެލްއަށް އާމްދަނީގެ ގޮތުގައި 1.6 ބިލިއަން ރުފިޔާ ލިބުނުއިރު، މީގެ ތެރޭގައި އިންޓްރަސްޓްގެ ގޮތުގައި 882.4 މިލިއަން ރުފިޔާ ލިބުނެވެ. ފީ އާއި ކޮމިޝަނުގެ ގޮތުގައި 662.7 މިލިއަން ރުފިޔާ ލިބުނުއިރު، ބޭންކް ހިންގައިގެން ލިބުނު ފައިދާ އުޅެނީ، 879.3 މިލިއަން ރުފިޔާގައެވެ.

ޓެކްސްގެ ކުރިން ބީއެމްއެލްގެ ފައިދާ 852.7 މިލިއަން ރުފިޔާގައި ހުރިއިރު ޓެކްސްއަށް ކެނޑުމަށްފަހު އެ ބޭންކުގެ ސާފްފައިދާ އުޅެނީ 631 މިލިއަން ރުފިޔާގައެވެ. 

މި ކުއާޓަރުގެ ބެލެންޝީޓްގެ އުސްއަލިތަކަށް ބަލާއިރު، ފުރަތަމަ ކުއާޓަރ ނިމުނުއިރު، ބޭންކުން ދޫކުރި ލޯނުގެ ޖުމްލަ އަދަދު 27.5 ބިލިއަން ރުފިޔާއަށް އަރާއިރު، ޖުމްލަ ޑިޕޮސިޓް 40.7 ބިލިއަން ރުފިޔާއަށް ވަނީ އަރާފައެވެ.