ހުޅުމާލޭ ދެވަނަ ފިޔަވަހީގެ ހިޔާ އަދި ވިނަރެސް ބައެއް ޓަވަރުތަކުން ކަރަންޓު ކެނޑިއްޖެއެވެ.

ސްޓެލްކޯއިން މިކަން ހާމަކޮށްފައިވަނީ، އެ ކުންފުނީގެ ރަސްމީ އެކްސް އެކައުންޓްގައި ކުރި ޕޯސްޓަކުންނެވެ.

ކަރަންޓްގެ ހިދުމަތް މެދުކެނޑިފައިވަނީ، ހިޔާ ޓަވަރު 5، 6، އަދި 7 ގެ އިތުރުން ވިނަރެސްގެ 10 ޓަވަރުންނެވެ. މީގެ އިތުރުން އަމާންދޯދި 12، 13، 14، 15، އަދި 16 އަދި އަމާން އުދަރެސް 5، އަދި 6 ކުންވެސް ވަނީ ކަރަންޓް ކެނޑިފައެވެ.

ސްޓެލްކޯއިން މައުލޫމާތު ދޭ ގޮތުގައި، އެ ސަރަހައްދުން ކަރަންޓު ކެނޑިފައިވަނީ ދިމާވި ޓެކްނިކަލް މައްސަލެއްގެ ސަބަބުންނެވެ. އަދި މިހާރު މައްސަލަ ދެނެގަނެ، ކަރަންޓުގެ ހިދުމަތް އެ ސަރަހައްދަށް އަލުން ދިނުމުގެ މަސައްކަތް ކުރަމުންދާކަމަށް ސްޓެލްކޯއިން މައުލޫމާތު ދެއެވެ.

މިމަހުގެ 12 ވަނަ ދުވަހުވެސް ހުޅުމާލެ ފޭސް ދޭއްގެ ބޮޑު ބަޔަކުން ވަނީ ކަރަންޓްގެ ހިދުމަތް ގިނަ ވަގުތުތަކަކަށް ވަނީ މެދުކެނޑިފައެވެ. އެފަހަރު ކަރަންޓް ކެނޑުމުގެ މައްސަލަ ދިމާވީ ދެވަނަ ފިޔަވައްސަށް ކަރަންޓް ދިނުމަށް ބޭނުންކުރާ ކޭބަލްތަކުގެ ތެރެއިން މައި ކޭބަލަކަށް ގެއްލުންވުމުންކަމަށް ސްޓެލްކޯއިން ވަނީ ބުނެފައެވެ.