މިއަދު ހުޅުމާލޭ ދެވަނަ ފިޔަވެހީގެ ބައެއް ސަރަހައްދުތަކުން ކަރަންޓު ކެނޑުނީ މަގު ހެދުމުގެ މަސައްކަތްތަކުގެ ތެރެއިން ކޭބަލަކަށް ލިބުނު ގެއްލުމެއްގެ ސަބަބުންކަމަށް ސްޓެލްކޯއިން ބުނެފިއެވެ.

މިއަދު މެންދުރުފަހު ދޭއްގެ ފަހުން ހުޅުމާލެ ފޭސް ދޭއްގެ ގިނަ ޓަވަރުތަކަކުން ވަނީ ކަރަންޓް ކެނޑިފައެވެ. މިކަމާ ގުޅިގެން ސްޓެލްކޯއިން ބުނީ މިފަހަރުވެސް ކަރަންޓް ކެނޑިފައިވަނީ މަގު ކޮނުމުގެ ތެރޭގައި އަޅާފައި އޮތް ހައި ވޯލްޓޭޖް ކޭބަލަކަށް ގެއްލުން ވުމުގެ ސަބަބުން ކަަމަށެވެ. ގެެއްލުން ލިބުނު ކޭބަލް މަރާމާތުކުރުމުގެ މަސައްކަތް ފަށާފައިވާކަމަށް ސްޓެލްކޯއިން ވަނީ ބުނެފައެވެ.

މިމަހުގެ 12 ވަނަ ދުވަހުވެސް ހުޅުމާލެ ފޭސް ދޭއްގެ ބޮޑު ބަޔަކުން ވަނީ ކަރަންޓްގެ ހިދުމަތް ގިނަ ވަގުތުތަކަކަށް ވަނީ މެދުކެނޑިފައެވެ. އެފަހަރު ކަރަންޓް ކެނޑުމުގެ މައްސަލަ ދިމާވީ ދެވަނަ ފިޔަވައްސަށް ކަރަންޓް ދިނުމަށް ބޭނުންކުރާ ކޭބަލްތަކުގެ ތެރެއިން މައި ކޭބަލަކަށް ގެއްލުންވުމުންކަމަށް ސްޓެލްކޯއިން ވަނީ ބުނެފައެވެ. 

މިއަދު ކަރަންޓްގެ ހިދުމަތް މެދުކެނޑިފައިވަނީ، ހިޔާ ޓަވަރު 5، 6، އަދި 7 ގެ އިތުރުން ވިނަރެސްގެ 10 ޓަވަރުންނެވެ. މީގެ އިތުރުން އަމާންދޯދި 12، 13، 14، 15، އަދި 16 އަދި އަމާން އުދަރެސް 5، އަދި 6 ކުންވެސް ވަނީ ކަރަންޓް ކެނޑިފައެވެ.