ގަނާ ކުރުމަކީ ގާނޫނީ ކުށަކަށް ހަދަން "އެންޓި-ބުލީ" ބިލެއް މަޖިލީހަށް ހުށަހަޅަން ނިންމަވާފައިވާކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވެފައިވަނީ، މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
ރައީސް ވިދާޅުވި ގޮތުގައި، ގަނާ ކުރުމަކީ މިހާރު ވެސް އަދި މީގެ ކުރިންވެސް މުޖުތަމައުގައި ބޮޑުވެފައިވާ މައްސަލައެއް ކަމަށެވެ. އަދި މި ސަރުކާރުން އެއީ ވަރަށް މުހިންމު މައްސަލައެއްގެ ގޮތުގައި ބަލާ މައްސަލައެއްކަން ރައީސް ވަނީ ފާހަގަކޮށްފައެވެ. ރައީސް ވިދާޅުވީ، ގަނާ ކުރުން ހުއްޓުވުމަށްޓަކައި ސަރުކާރުން އިތުރު މަސައްކަތްތަކެއް ވެސް ކުރިއަށްގެންދާކަމަށެވެ.
މިކަން އިތުރަށް ގާނޫނީ ނިޒާމު ތެރެއިން ހުއްޓުވަމަށްޓަކައި އަދި މިފަދަ އަމަލުތައް ކުރާ ފަރާތްތަކަށް ފިޔަވަޅު އެޅުން އިތުރަށް ހަރުދަނާކުރުމަށްޓަކައި ބުލީ ކުރުން އެއީ ގާނޫނީ ކުށެއް ކަމަށް ކަނޑައެޅުމަށް އެކަމާއި ގުޅޭ ހާއްސަ ގާނޫނެއް، އެންޓި ބުލީ ގާނޫނެއް ތައާރަފު ކުރުމަށް ސަރުކާރުން މިހާރު މަސައްކަތް ފަށައިފިން
ރައީސް ވިދާޅުވިއެވެ.
ރައީސް ވިދާޅުވީ މި ބިލު ހުށެހެޅުމުގެ މަސައްކަތް މިހާރު އެޓާނީ ޖެނެރަލްގެ އޮފީހުން ކުރަމުންގެންދާކަމަށެވެ. އަދި މި ބިލު ފަރުމާކޮށް މަޝްވަރާގެ ހުރިހާ ޕްރޮސެސްތަކެއް ނިމުމަށްފަހު މަޖިލީހަށް މި ބިލު ހުށަހަޅުއްވާނެކަމަށް ރައީސް ވަނީ ވިދާޅުވެފައެެވެ.
ގަނާ ކުރުމުގެ މައްސަލަ މިފަހަކަށް އައިސް ވަރަށް ބޮޑުވެފާވާއިރު، ރައީސް ފާހަގަކުރެއްވި ގޮތުގައި އާސަންދައިގެ ދަށުން ސައިކޮލޮޖިކަލް ފަރުވާ ލިބޭނެ އިންތިޒާމު މި އަހަރުގެ ޖަނަަވަރީ މަހުގެ 1 ވަނަ ދުވަހުން ލިބޭނެ އިންތިޒާމު ހަމަޖައްސާފައިވާއިރު، ގިނަ ބަޔަކު ފަރުވާ ހޯދާފައިވާކަމަށެވެ. އެގޮތުން މިހިނގާ އޭޕްރިލް 23 އާއި ހަމައަށް 10،954 ފަރާތްތަކުން ފަރުވާ ހޯދާފައިވާކަމަށް ރައީސް ވަނީ ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
