ސްޓޭޓް އިލެކްޓްރިކް ކޮމްޕެނީ ލިމިޓެޑްގެ މެނޭޖިންގ ޑިރެކްޓަރުގެ މަގާމަށް، ސ. ފޭދޫ / ނެސްޕްރޯވިލާ، ޑރ. އަލީ އަޒްވަރު، އައްޔަނުކުރައްވައިފި އެވެ.
ކުންފުނިތަކުގެ ބެލެނިވެރިޔާ ކަމުގައިވާ ޕީސީބީން ބުނީ ސަަރުކާރުގެ ކަރަންޓް ކުންފުނި -- ސްޓްލެކޯގެ އެމްޑީގެ މަގާމަށް އަލީ އަޒްވަރު އައްޔަނު ކުރައްވާފައިވާ ކަމަށެވެ. އެ މަގާމަށް އަޒްވަރު އައްޔަނު ކުރެއްވީ މިއަދު އެވެ.
ސްޓެލްކޯގެ އެމްޑީގެ މަގާމުގައި ކުރީން ހުންނެވި އަޙްމަދު ޝަމާޙް ރަޝީދު ވަކިކުރެއްވުމަށް ފަހު ކުންފުނި ހިންގެވުން ވަގުތީ ގޮތުން ހަވާލުކުރެއްވީވެސް އަޒްވަރުއާ އެވެ. އަޒްވަރު ހުންނެވީ ޑީއެމްޑީގެ މަގާމުގަ އެވެ.
ޑރ. އަޒްވަރު ސްޓެލްކޯއާ ގުޅިވަޑައިގަތީ 1997 ވަނަ އަހަރު ޓްރޭނީއެއްގެ ގޮތުގަ އެވެ. އެއަށްފަހު، ކުންފުނީގެ ފަންނީ އަދި އިދާރީ އެކި ފަންތީގެ މަގާމުތައް ފުރުއްވާފައިވެ އެވެ. އަދި ކުންފުނީގެ އެންމެ އިސް މަގާމުތައްވެސް ވަނީ އަދާކުރައްވާފަ އެވެ. އެގޮތުން ސޭލްސް އެންޑް މާކެޓިން، ބިލިން ސާވިސަސް، އަދި ބިޒްނަސް ޑިވެލޮޕްމަންޓް ފަދަ މުހިންމު ދާއިރާތައް ހިންގަވާފަ އެވެ. ޑެޕިއުޓީ މެނޭޖިން ޑައިރެކްޓަރުގެ މަގާމާއި، ޗީފް އޮޕަރޭޓިންގ އޮފިސަރުގެ (ސީއޯއޯ) މަގާމު ވެސް ފުރުއްވި އެވެ.
ޑރ. އަޒްވަރު ވަނީ ރައީސުލްޖުމްހޫރިއްޔާ އައްޔަންކުރައްވާ އެގްޒެކެޓިވް ޑައިރެކްޓަރެއްގެ ހައިސިއްޔަތުން ސްޓެލްކޯގެ ބޯޑު މެންބަރުކަން ވެސް ކުރައްވާފަ އެވެ. އަދި ފިއުލް ސަޕްލައި މޯލްޑިވްސް (އެފްއެސްއެމް) ގެ ނޮން-އެގްޒެކެޓިވް ޑައިރެކްޓަރުގެ މަގާމު ވެސް އަދާކުރެެއްވި އެވެ.
އަޒްވަރު ވަނީ ނިއުޒީލެންޑުގެ ވިކްޓޯރިއާ ޔުނިވަރސިޓީ އޮފް ވެލިންގޓަނުން ޑޮކްޓަރ އޮފް ފިލޯސަފީ (ޕީއެޗްޑީ) ހާސިލުކުރައްވާފަ އެވެ. އޭނާގެ ޕީއެޗްޑީ ދިރާސާ ބިނާކުރެއްވީ ކުދި ޖަޒީރާ ޤައުމުތަކުގައި އިއާދަކުރަނިވި ހަކަތައިގެ ވަސީލަތްތައް ފެތުރުމާ ގުޅޭގޮތުންނެވެ.
Advertisement
This content is created and paid for by advertisers and does not involve Voice Journalists
