ދިވެހިރާއްޖެއާއި އަޒަރުބައިޖާނާ ދެމެދު ގާއިމުކޮށްފައިވާ "މިއުޗުއަލް ވިސާ އެގްޒެމްޕްޝަން" އެއްބަސްވުމަށް މިއަދުން ފެށިގެން ރަސްމީކޮށް އަމަލުކުރަން ފަށައިފިއެވެ.
މިއާއެކު، ދިވެހި ރައްޔިތުންނަށް އެއްވެސް ވިސާއަކާ ނުލައި އަޒަރުބައިޖާނަށް އެތެރެވުމުގެ މަގު ވަނީ ތަނަވަސްވެފައެވެ.
ކުރިން އޮތް އެއްބަސްވުމުގެ ދަށުން، އަޒަރުބައިޖާނުގައި ވިސާއަކާއި ނުލައި ހުރެވޭނީ ހަމައެކަނި ދިވެހި އޮފިޝަލް ނުވަތަ ޑިޕްލޮމެޓިކް ޕާސްޕޯޓް ހުންނަ ފަރާތްތަކަށެވެ. ނަމަވެސް، މި އާ އުސޫލުގެ ދަށުން ދިވެހި ޕާސްޕޯޓު އޮންނަ ކޮންމެ މީހަކަށްވެސް އަޒަރުބައިޖާނަށް އެތެރެވާ ތާރީޚުން ފެށިގެން 90 ދުވަހުގެ މުއްދަތަށް އެ ގައުމުގައި މަޑުކުރެވޭނެއެވެ.
މި އެއްބަސްވުމުގެ ދަށުން، އަޒަރުބައިޖާނުގެ ރައްޔިތުންނަށްވެސް ރާއްޖެއަށް އެތެރެވާއިރު ވިސާގެ ހަމަހަމަ ލުއިތަކެއް ލިބިގެންދާނެއެވެ. މިފަދަ ނިންމުންތަކުގެ ސަބަބުން ދެ ގައުމުގެ ދެމެދުގައި ވިޔަފާރިއާއި، ފަތުރުވެރިކަމުގެ އިތުރުން ސަގާފީ ގުޅުންތައް ބަދަހިވުމަށް ބޮޑު އެހީތެރިކަމެއް ލިބޭނެ ކަމަށް ބެލެވެއެވެ.
ނަމަވެސް، 90 ދުވަހަށްވުރެ ދިގު މުއްދަތަކަށް އެ ގައުމުގައި މަޑުކުރަން ބޭނުންވާނަމަ އެ ގައުމުން ވިސާ ނަގަންޖެހޭނެއެވެ.
Advertisement
This content is created and paid for by advertisers and does not involve Voice Journalists
