ފަލަސްތީނުގެ ކުށެއްނެތް މުސްލިމް އަޚުންނާއި އުޚުތުންނަށް ކުރިމަތިވެފައިވާ ލާއިންސާނީ އިސްތިޢުމާރީ އަނިޔާތަކުން ސަލާމަތްކުރުމަށާއި، ބަނޑުހައިހޫނުކަމުގައި ތިބި ރައްޔިތުންނަށް އިންސާނީ އެހީ ފޯރުކޮށްދިނުމަށްޓަކައި ދަތުރުކުރި "ގްލޯބަލް ސުމޫދު ފްލޮޓިއްލާ" އަށް އިސްރާއީލުގެ އަސްކަރިއްޔާއިން ވަނީ ބައިނަލްއަޤުވާމީ ކަނޑުގެ ސަރަހައްދުން ހުރަސްއަޅައި، ބާރުގެ ބޭނުންކޮށްފައެވެ.

މި ހާދިސާ ހިނގާފައިވަނީ އިސްރާއީލުގެ ސަރަޙައްދީ ރޮނގާ އެތައް ސަތޭކަ މޭލެއް ދުރުގައި، ބައިނަލްއަޤުވާމީ ކަނޑުގެ ސަރަޙައްދުގައެވެ.

ފްލޮޓިލާގެ އިންތިޒާމުކުރާ ފަރާތްތަކުން މަޢުލޫމާތުދޭ ގޮތުގައި، އިސްރާއީލުގެ އަސްކަރީ ލޯންޗުތަކުން އައިސް، އުޅަނދުތަކުގައި ތިބި މީހުންނަށް އަމާޒުކޮށް ހަތިޔާރު ދިއްކޮށް، ކަކޫ މައްޗަށް ތިރިވުމަށް ވަނީ އަމުރުކޮށްފައެވެ. އަދި ޑްރޯންތަކާއި މުއާސަލާތީ ޚިދުމަތް ކަނޑާލާ ޓެކްނޮލޮޖީ ބޭނުންކޮށްގެން އުޅަނދުތަކުގެ މުއާސަލާތީ ގުޅުން ވަނީ މެދުކަނޑާލާފައެވެ.

އިސްރާއީލުގެ މީޑިއާތަކުން ރިޕޯޓްކޮށްފައިވާ ގޮތުގައި، ގާޒާއަށް މިސްރާބުޖަހާފައިވާ 58 އުޅަނދުގެ ތެރެއިން 7 އުޅަނދެއް މިހާރު ވަނީ ގްރީސްގެ ކްރީޓް ރަށާ ކައިރިން އިސްރާއީލުގެ ބާރުގެ ދަށަށް ގެންގޮސްފައެވެ.

ފްލޮޓިލާގެ ތަރުޖަމާނު ގުރް ތްސަބާރު ފާހަގަކުރެއްވި ގޮތުގައި، މިއީ އެއްވެސް ހަތިޔާރެއް ނެތް މަދަނީ އުޅަނދުތަކަކަށް ދިން ހަމަލާއެކެވެ. އަދި މިއީ ބައިނަލްއަޤުވާމީ ކަނޑުގެ ސަރަޙައްދުގައި ހިންގި "ވަގަށް ނެގުމުގެ" އަމަލެއްގެ ގޮތުގައި އޭނާ ސިފަކުރެއްވިއެވެ.

މި ފްލޮޓިލާއަކީ އިޓަލީން ފުރައިގެން ގާޒާއަށް އިންސާނީ އެހީ ފޯރުކޮށްދިނުމަށް ދަތުރުކުރި، ތަފާތު އެކި ޤައުމުތަކުގެ އެކްޓިވިސްޓުން ހިމެނޭ ބޯޓުތަކެކެވެ.

ގާޒާގައި އިސްރާއީލުން ހިންގަމުންދާ ނަސްލު ނައްތާލުމުގެ ޤަތުލްއާއްމުގައި މިހާތަނަށް 72,599 އަށްވުރެ ގިނަ މީހުން ވަނީ ޝަހީދުވެފައިވާއިރު 172،411 އަށްވުރެ ގިނަ މީހުންނަށް ވަނީ އަނިޔާވެފައެވެ.