އަރިދަފުސް ރޯގާ އިތުރުވަމުންދާތީ ސަމާލުވުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އެދިއްޖެއެވެ.

އެޗްޕީއޭއިން މިހެން އިލްތިމާސްކޮށްފައިވަނީ، މިދުވަސްވަރު އަރިދަފުސް ރޯގާގެ ކޭސްތައް ރާއްޖޭގެ އެކިކަންކޮޅުތަކުގައި އިތުރުވެފައިވާތީ، މިއަދު އެ އިދާރާއިން އެކްސްގައި ކުރި ޕޯސްޓަކުންނެވެ.

އެޗްޕީއޭއިން އަރިދަފުސް ރޯގާއިން ރައްކާތެރިވުމުގެ ގޮތުން އެޅުމަށް އިލްތިމާސްކޮށްފައިވާ ފިޔަވަޅުތައް:

- އަރިދަފުސް ރޯގާގެ އެއްވެސް އަލާމާތެއް ހުރިނަމަ ވީހާވެސް އަވަހަށް ޓެސްޓު ކުރުން

- ބަލީގެ އަލާމާތެއް ހުރިނަމަ އަނގައާއި ނޭފަތް ނިވާ ވާނެހެން ރަނގަޅަށް މާސްކް އެޅުން

- ރޯގާޖެހިފައިވާނަމަ ކުޑަކުދިން ކައިރިއަށް ނުދިޔުމާއި އެ ކުދިން އުރާ ނުހެދުން

- ބަލި ޖެހުމުން، ނުރައްކާ ވުމުގެ ފުރުސަތު ބޮޑު މީހުން އިންފްލުއެންޒާ ވެކްސިން ޖެހުން

އެޗްޕީއޭއިން މި ހަފުތާ ކުރީކޮޅު ނެރުނު ތަފާސްހިސާބުތަކުން ދައްކާ ގޮތުންވެސް، 2026 މާރިޗު މަހުން ފެށިގެން އަރިދަފުސް ރޯގާ ޖެހިގެން ރިޕޯރޓް ކޮށްފައިވާ އަދަދު އިތުރުވެފައިވެއެވެ. އެހެންކަމުން، މި ދުވަސްވަރު އަރިދަފުސް ރޯގާ ޖެހިގެން އެންމެ ގިނައިން ރިޕޯރޓްކޮށްފައިވަނީ އަތޮޅު ތެރެއިންނެވެ.

އެގޮތުން އަތޮޅުތެރެއިން އަރިދަފުސް ރޯގާގެ 11،792 ރިޕޯޓްކޮށްފައިވާއިރު، މާލެއިން 9،894 ކޭސް ރިޕޯޓްކޮށްފައިވެއެވެ. އަދި ޖުމްލަ 21،687 ކޭސް މުޅި ރާއްޖެއިން ރިޕޯޓްކޮށްފައިވެއެވެ.

އަރިދަފުސް ރޯގާ އިތުރުވަމުންދިޔުމާއި ގުޅިގެން އެޗްޕީއޭއިން ވަނީ ކޮންމެހެން ހޮސްޕިޓަލަށް ދާންޖެހޭ ހާލަތެއްގައި މެނުވީ ހޮސްޕިޓަލަށް ނުދިޔުމަށާއި، މާނބަޑު އަންހެނުންނާއި އުމުރުން ދުވަސްވީ މީހުންގެ އިތުރުން ކުޑަކުދިން ގޮވައިގެން ބަލިމީހުންނަށް ޒިޔާރަތްކުރަން ނުދިޔުމަށް އިލްތިމާސްކޮށްފައެވެ. މީގެ އިތުރުން، ހޮސްޕިޓަލަށް ދާނަމަ ބަލި މީހާއެކީ ވީހާވެސް މަދު މީހުން ހޮސްޕިޓަލަށް ދިއުމަށް އެޗްޕީއޭއިން އިލްތިމާސް ކުރެއެވެ.