ސްކޫލްތަކުގައި ކިޔަވައިދޭ ޓީޗަރުން އިތުރު ގަޑީ ފައިސާ މައްސަލާގައި ޓީޗަރުން ކަންބޮޑުވުން ފާޅުކޮށްފިއެވެ.
އިތުރުގަޑީގެ ފައިސާ އާ ގުޅޭގޮތުން ޓީޗަރުން ކަންބޮޑުވުން ފާޅުކޮށްފައިވަނީ، މަސައްކަތްތެރިންގެ ދުވަހާއި ގުޅިގެން އިއްޔެ ބޭއްވި ހިނގާލުމުގައެވެ.
ހިނގާލުމުގައި ޝުއޫރު ފާޅުކުރި ބައެއް ފަރާތްތަކުން ވަނީ، އިތުރު ގަޑިތަކުގައި މަސައްކަތް ކުރި ނަމަވެސް، ޓީޗަރުން ކުރާ މަސައްކަތައް އެކަށީގެންވާ ގޮތެއްގައި މުސާރަ ނުލިބޭކަން ފާހަގަކޮށްފައެވެ. އެގޮތުން ރާއްޖޭގައި މަސައްކަތްކުރާ ދިވެހި ޓީޗަރުންގެ އިތުރުން ބިދޭސީ ޓީޗަރުންނަށް ވެސް މި ކަމުގެ ސަބަބުން އެކެށީގެންވާ މިންވަރަކަށް އާމްދަނީއެއް ލިބެމުން ނުދާކަން ވަނީ ފާހަގަކޮށްފައެވެ.
ހިނގާލުމުގައި ޓީޗަރުން ވަނީ، ސްކޫލްތަކުން އިންތިޒާމުކުރާ އިތުރު ހަރާކާތްތަކުގައި ޓީޗަރުން ބައިވެރިކުރުން ހުއްޓާލުމަށް ގޮވާލާފައެވެ. އެގޮތުން، އިތުރު ހަރަކާތްތަކުގައި ޓީޗަރުން ބައިވެރި ކުރުވުމުގެ ސަބަބުން އާއިލާތަކަށް ދޭންޖެހޭ ވަގުތު ނުދެވޭ ކަމަށް ވަނީ ބުނެފައެވެ.
ޓީޗަރުން މި ހިނގާލުމުގައިވާހަކަދެއްކި ބައެއް ޓީޗަރުން ބުނީ ހެނދުނު 6:45 އަށް ޓީޗަރުން ސްކޫލަށް ރިޕޯޓް ކުރަން ޖެހޭއިރު، އެ ވަގުތުގައި ކުދިން ބަލަހައްޓާ ތަންތަން ބަންދުކޮށްފައި ހުރުމުގެ ސަބަބުން އެ ބޭފުޅުންގެ ކުދިން ބަލަހައްޓާނެ މީހަކު ގިނަ ފަހަރު ނުހުންނަ ކަމަށެވެ. އެގޮތުން އެ ފަރާތްތަކުން ވަނީ، ސްކޫލްތަކުގައި ދަރިން ބެލެހެއްޓުމަށް ހާއްސަކޮށް "ޑޭ-ކެއަރ" ފެސިލިޓީތައް ސްކޫލްތަކުގައި ގާއިމުކުރުމަށް އެދި ސަރުކާރަށް ގޮވާލާފައެވެ.
އިތުރު ގަޑިއަށް މުސާރަ ނުލިބުމުގެ ކަންބޮޑުވުން ޓީޗަރުން ދަނީ ވަރަށް ގިނަ ދުވަސްތަކެއް ވަންދެން ފާޅުކުރަމުންނެވެ. ނަމަވެސް، އެއްވެސް ސަރުކާރަކުން މި ކަމަށް ހައްލެއް ހޯދައިދީފައިނުވާކަމަށް ބައެއް ޓީޗަރުން ފާހަގަކުރެއެވެ.
Advertisement
This content is created and paid for by advertisers and does not involve Voice Journalists
