ފާމަސީ ތަކުގައި ސްޓޮކްގައި ހުރި ބޭސްތަކުގެ މައުލޫމާތު ހޮސްޕިޓަލުތަކަށް ފެންނާނެ ނުވަތަ ބަލާލެވޭނެ ނިޒާމެއް އަދި ނެތް ކަމަށް ސްޓޭޓް ފާމާއިން މިއަދު ބުނެފިއެވެ.

މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީގެ މިއަދުގެ ބައްދަލުވުމުގައި މެންބަރަކު ވަނީ ފާމަސީ ތަކުގައި ހުންނަ ބޭސްތަކުގެ އަދާހަމަ ޑޮކްޓަރުންނަށް ބެލޭނެ ނިޒާމެއް ހަމަޖެހިފައި ވޭތޯ ސުވާލު ކުރައްވާފައެވެ. 

އެ ސުވާލަށް ޖަވާބުދެއްވަމުން އެސްޓީއޯ ފާމަސޫޓިކަލްސްގެ ޕްލޭނިންގ މެނޭޖަރު ލިމްޔާ ވިދާޅުވީ، ފާމަސީ ތަކުގެ ސްޓޮކް ހުރި މިންވަރެއް އެސްޓީއޯ އަށް ފެންނާނެ ކަމަށެވެ. ނަމަވެސް ލިބެން ހުރި ބޭސްތައް ޑޮކްޓަރުންނަށް ބެލޭނެ ނިޒާމެއް ނެތް ކަމަށެވެ.

ލިމްޔާ އިތުރަށް ވިދާޅުވީ، ބޭސް ސްޓޮކްގައި ނެތް ނަމަ، އެ ބޭސް ހުރި ރަށަކުން ނެތް ރަށަކަށް ފޮނުވުމުގެ ކަންކަންވެސް ހަމަޖައްސަވާ ކަމަށާ، އެހެން ނަމަވެސް އެސްޓީއޯއިން ނުބަލަހައްޓާ ބޭހެއް ނަމަ، އަދި އެ ބޭސް ރާއްޖެއިން ލިބެން ނެތް ނަމަ، ބޭސް ގެންނަނީ ބޭރުން ކަމަށެވެ. 

ލިމްޔާ ވިދާޅުވިގޮތުގައި މީހާގެ ބަލީގެ ގޮތުން ރާއްޖޭގައި ލިބެން ނުހުންނަ ބޭސްވެސް ޑޮކްޓަރުން ލިޔެދެއެވެ. އަދި ރާއްޖެއަށް އެފަދަ 5000 އެއްހާ ބޭސް އެތެރެ ކުރަން ބޭނުންވެގެން ބޭސް އެތެރެކުރާ އިމްޕޯޓަރުން މިހާރުވެސް އެދިފައިވާ ކަމަށެވެ.

ކަންމިހެން ހުރުމުން ބޭސް އެތެރެކޮށް ފޯރުކުރުމަށް ދަތިތަކެއް ހުރި ކަމަށޤ ފާމަސީތަކުގައި ބޭސް ވިއްކޭނީވެސް އެ ބޭސް ފޯރުކޮށްދިނުމަށް ބޭނުންވާ ސްޓޮކް ލިބިގެން ކަމަށް އޭނާ ވިދާޅުވުއެވެ.