އެޓެންޝަން-ޑެފިސިޓް ހައިޕަރއެކްޓިވިޓީ ޑިސްއޯޑަރ ނުވަތަ އެޑީއެޗްޑީ ހުންނަ ކުދިންނަށް ބޭނުންވާ ބޭހެއް ރާއްޖެ އެތެރެކުރުމުގެ ހުއްދަ ދިނުމަށް ރައްޔިތުންގެ މަޖިލީހުން މިއަދު ރުހުން ދީފިއެވެ.
މަސްތުވާތަކެތީގެ ގާނޫނު އޮތްގޮތުން އޭޑީއެޗްޑީ ހުންނަ ކުދީންނަށް ދޭންޖެހޭ މުހިއްމު ބޭހެއް އެތެރެ ނުކުރެވޭކަމަށް މޯލްޑިވްސް ފުޑް އެންޑް ޑްރަގް އޮތޯރިޓީން ފާހަގަކުރުމުން މަނާ ބޭސް ލިސްޓުން އެ ބޭސް އުނިކުރަން ސަރުކާރުގެ ފަރާތުން މަޖިލީހަށް ފޮނުވުނު މައްސަލަ ބަލައިގަނެ އެ ދިރާސާަކުރީ ސަލާމަތީ ޚިދުމަތްތަކާބެހޭ ކޮމިޓީންނެވެ.
ނުކުޅެދުންތެރިކަން ހުންނަ ކުދިންނަށް ޤާނޫނީ ގޮތުން ލިބިދޭންޖެހޭ އިނާޔަތްތައް ލިބުމުގައި އިހުމާލުވެފައިވާތީ އެކަމާ ގުޅިގެން ހުށަހަޅާފައިވާ ޕެޓިޝަންއާ ގުޅޭގޮތުން، ރައްޔިތުންގެ މަޖިލީހުގެ ޕެޓިޝަން ކޮމިޓީގައި އެމްއެފްޑީއޭގެ ސީނިއާ ފާމަސިސްޓް އައިޝަތު ޖަލީލާ ވަނީ އޭޑިއެޗްޑީ ހުންނަ ކުދިން ބޭނުންކުރާ ވަރަށް މުހިއްމު ބޭހެއް ރާއްޖެ އެތެރެނުކުރެވޭކަން ފާހަގަކުރައްވާ ފައެވެ. އެ ބޭހަކީ މިތައިލްފެނިޑޭޓް އެވެ. ޖަލީލާ ވިދާޅުވީ އެ ބޭސް އެތެރެނުކުރެވެނީ މަސްތުވާތަކެތީގެ ޤާނޫނުގެ ޖަދުވަލްގެ މާއްދާއެއްގައި ރާއްޖެ އެތެރެކުރުން މަނާ ބާވަތެއްގެ ގޮތުގައި އޮންނާތީއެވެ.
ނަމަވެސް އޭރު އޮތީ ގާނޫނަށް އިސްލާހު ހުށައަޅާފަ އެވެ. އަދި އެ އިސްލާހު ފާސްކުރުމާއި ގުޅޭގޮތުން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީން ދިޔައީ މަސައްކަތް ކުރަމުންނެވެ. އެ ކޮމެޓީން މިމަހު 6 ވަނަ ދުވަހު ވަނީ މަނާ ބޭސް ލިސްޓުން މިތައިލްފެނިޑޭޓް އުނިކުރަން ފާސްކޮށްފަ އެވެ. އެ ގޮތަށް ފާސްކުރީ މެންބަރުންގެ އިއްތިފާގުންނެވެ.
އެފަހުން މަޖިލީހުން މައްސަލަ ބަލައިގަތުމާމެދު މިއަދު ވޯޓު ނަގާފައިވާއިރު، ވޯޓު ދެއްވި 51 މެންބަރުންވަނީ ބޭސް އެތެރެކުރަން ހުއްދަދޭން ފެންނަ ކަމަށް ވޯޓު ދެއްވާފައެވެ.
Advertisement
This content is created and paid for by advertisers and does not involve Voice Journalists
