ހުސްވި އޭޕްރިލްމަހު ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީއަށް އާމްދަނީގެ ގޮތުގައި 2.63 ބިލިއަން ރުފިޔާ ބަލައިގަނެފައިވާކަމަށް އެ އިދާރާގެ ތަފާސްހިސާބުތަކުން ދައްކައިފިއެވެ.

މީރާއިން ނެރެ އާއްމުކޮށްފައިވާ އޭޕްރިލްމަހު އެ އިދާރާއަށް ބަލައިގަތް އާމްދަނީގެ ތަފާސްހިސާބަށް ބަލާއިރު، ހުސްވިމަހު 2.63 ބިލިއަން ރުފިޔާ ބަލައިގަނެފައިވާއިރު މިއީ މި މުއްދަތުގައި ލިބޭނޭކަމަށް އަންދާޒާކުރި އަދަދަށްވުރެ 16.6 އިންސައްތަ އިތުރުވުމެކެވެ. ނަމަވެސް މި މުއްދަތުގެ ތެރޭގައި ޓޫރިޒަމް ދާއިރާގެ ޖީއެސްޓީން ލިބޭނޭކަމަށް އުއްމީދު ކުރި އާމްދަނީ ވަނީ ދަށަށް ގޮސްފައެވެ. މީގެ މައިގަނޑު ސަބަބަކީ މެދުއިރުމަތީގައި ހިނގަމުންދާ ހަނގުރާމައިގެ ސަބަބުން އިގްތިސާދީ އެކިއެކި ދާއިރާތަކަށް ކުރިމަތިވެފައިވާ ހީނަރުކަމެވެ.

މީރާއަށް އޭޕްރިލްމަހު އެންމެގިނައިން އާމްދަނީ ލިބިފައިވަނީ، ޖީއެސްޓީންނެވެ. ޖީއެސްޓީގެ ގޮތުގައި 1.6 ބިލިއަން ރުފިޔާ ލިބުނުއިރު ދެން އެންމެބޮޑު އާމްދަނީއެއް ލިބިފައިވަނީ، ގްރީން ޓެކުހުންނެވެ. މި މުއްދަތުގެ ތެރޭގައި ގްރީން ޓެކުހުގެ ގޮތުގައި ލިބުނު އާމްދަނީ އުޅެނީ، 185 މިލިއަން ރުފިޔާ ގައެވެ.

އޭޕްރިލްމަހު މީރާއަށް ބަލައިގަތް އާމްދަނީ.. މައުލޫމާތު: މޯލްޑިވްސް އިންލަންޑް އޮތޯރިޓީ

ދައުލަތަށް ނުލިބިވާ ޓެކްސް ފައިސާ ހޯދުމަށް ކުރެވުނު މަސައްކަތްތަކުން މިދިޔަ މަހުގެ ތެރޭގައި ވަނީ 543 މިލިއަން ރުފިޔާ ލިބިފައެވެ. 

މިދިޔަ މަހު އެމެރިކާ ޑޮލަރުން މީރާއަށް 120.7 މިލިއަން ޑޮލަރު ލިބިފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު، 7.6 މިލިއަން ޑޮލަރުގެ ދަށް ވުމެކެވެ. އޭޕްރިލްމަހު ބޭރުފައިސާގެ ގޮތުގައި އެންމެގިނައިން އާމްދަނީ ލިބިފައިވަނީ، ޓޫރިޒަމް ޖީއެސްޓީންނާއި، ގްރީން ޓެކްސް އަދި އެއާޕޯޓް ޑިވެލޮޕްމަންޓް ފީންނެވެ. 

މިދިޔަ މަހު ޓޫރިޒަމް ޖީއެސްޓީން 71 މިލިއަން ޑޮލަރު ލިބުނުއިރު، ގްރީން ޓެކުހުން ވަނީ، 12 މިލިއަން ޑޮލަރު އަދި އެއާޕޯޓް ޑިވެލޮޕްމަންޓް ފީން ވަނީ 9.8 މިލިއަން ޑޮލަރު ލިބިފައެވެ.