މޯލްޑިވްސް ސިވިލްއޭވިއޭޝަން އޮތޯރިޓީގެ 2024 ވަނަ އަހަރުގެ މާލީ މުއާމަލާތްތައް ހިންގާފައިހުރީ ދައުލަތުގެ މާލިއްޔަތުގެ އުސޫލްތަކާ އެއްގޮތަށްކަމަށް އޮޑިޓަރ ޖެނެރަލް ރިޕޯޓްގައި ބުނެފިއެވެ.
އޮޑިޓަރ ޖެނެރަލްގެ އޮފީހުން ނެރެފައިވާ މޯލްޑިވްސް ސިވިލް އޭވިއޭޝަނުގެ 2024 ވަނަ އަހަރުގެ ކޮމްޕްލަޔަންސް އޮޑިޓްގައި ބުނެފައިވަނީ، ސިވިލް އޭވިއޭޝަން އޮތޯރިޓީއަށް 2024 ވަނަ އަހަރު ހަރަދުތައް ކުރުމަށް ފާސްކޮށްދިން ބަޖެޓްގެ މުއާމަލާތްތައް ކުރިއަށް ގެންގޮސްފައިހުރީ ކަނޑައެޅިފައިވާ އުސޫލްގެ ތެރެއިން ކަމަށެވެ. އެގޮތުން ފާސްކުރެވުނު ބަޖެޓާއި، އެބަޖެޓުން ހޭދަކުރެވުނުގޮތުގެ ބަޔާނުގައި ހިމަނާފައިވާ އަދަދުތަކާއި ޕަބްލިކް އެކައުންޓިން ސިސްޓަމްގައި ހުރި ރެކޯޑްތަކުގައި އުނިއިތުރުކަމެއް ހުރިކަމަށް ފާހަގަކުރެވިފައި ނެތްކަމަށް އޮޑިޓުގައި ވަނީ ފާހަގަކޮށްފައެވެ.
ސިވިލް އޭވިއޭޝަން އޮތޯރިޓީއަށް 2024 ވަނަ އަހަރު 48.6 މިލިއަން ރުފިޔާގެ ބަޖެޓެއް ފާސްކޮށްދިންއިރު، ރިކަރަންޓް ހަރަދުގެ ގޮތުގައި 27.2 މިލިއަން ރުފިޔާ ހޭދަވިއެވެ. ކެޕިޓަލް ހަރަދަށް ހޭދަވި 217،361 ރުފިޔާ އާއެކު އެ އަހަރު ޖުމްލަ ހަރަދުގެ ގޮތުގައި ރެކޯދްކުރެވުނު އަދަދަކީ، 27.4 މިލިއަން ރުފިޔާއެވެ. އެއަހަރު ހަރަދުތައް ކަނޑާފައި 21.2 މިލިއަން ރުފިޔާ ބާކީވިއެވެ.
ސިވިލް އޭވިއޭޝަނުެގ އޮޑިޓް ރިޕޯޓަށް ބަލާއިރު، 2024 ވަނަ އަހަރު އެއަރކްރާފްޓް ޕައިލެޓް އަދި އެއަރޓްރެފިކް ކޮންޓްރޯލާ ގުޅޭ 791 ލައިސަންސް ވަނީ ދޫކޮށްފައެވެ. އަދި 529 އޯވަރ ފްލައިޓް ޕާމިޓާއި 1721 ލޭންޑިން ޕާމިޓް ވަނީ ދޫކޮށްފައެވެ.
Advertisement
This content is created and paid for by advertisers and does not involve Voice Journalists
