ނޫސްވެރިކަމުގެ މިނިވަންކަމުގެ ހައްގަށް އުނިކަން އަންނަ ގޮތަށް ނޫސްވެރިން ހައްޔަރުކޮށް ނޫސްވެރިކަމަށް ހުރަސްއަޅަމުންދާ ކަމަށް ވިދާޅުވެ، ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބަލައި ނުގަނެ، ބޭރުކޮށްލައިފިއެވެ.

މި މައްސަލަ ހުށަހެޅުއްވީ، ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމެވެ.

އެ މައްސަލާގައި ބުނީ "އަދަދު" ނޫހުގެ ނޫސްވެރިއަކު ރައީސުލްޖުމްހޫރިއްޔާއާ ކުރި ސުވާލަކާ ގުޅިގެން އެ ނޫސްވެރިޔާ ހައްޔަރުކޮށްފައިވާ ކަމަށާ، އެ ނޫހުގެ ނޫސްވެރިންނަށް ރައީސް އޮފީހުގެ ނޫސްވެރިންގެ ބައްދަލުވުންތަކުގައި ބައިވެރިނުވެވޭނެކަންވެސް ރަސްމީކޮށް އަންގާފައިވާ ކަމަށެވެ.

އަދި އެފަދަ ޢަމަލުތަކަކީ، ނޫސްވެރިކަމުގެ މިނިވަންކަމަށް ހުރަސްއެޅުން ކަމަށްވެސް ބުންޏެވެ. 

މީގެ އިތުރުން، އެ ނޫހުގައި ޝާއިއުކުރި ބަޔާނަކާ ގުޅިގެން ނޫސްވެރިއަކު ކުއްލި ގޮތަކަށް ހައްޔަރުކޮށް ބަންދުގައި ބަހައްޓާފައިވާ ކަމަށާ، އެކަމުގެ ސަބަބުން ކަންބޮޑުވުންތަކެއް އުފެދިފައިވާ ކަމަށްވެސް ބުނެފައިވެއެވެ.

މި މައްސަލަ ހުށަހެޅުމުން ރިޔާސަތުގައި އިންނެވި މަޖިލީހުގެ ރައީސް އަބްދުއްރަޙީމް އަބްދުالله ވަނީ، މަޖިލީހަށް ހުށަހަޅާ ކުއްލި މައްސަލައަކީ ހަގީގަތާ އެއްގޮތަށް ހިނގާފައިވާ ކަމަކަށް ވާންޖެހޭނެ ކަން ފާހަގަކުރައްވާފައެވެ.

ނަމަވެސް، މީކާއިލް ހުށަހެޅުއްވި މައްސަލައަކީ އެއްވެސް ހަގީގަތެއް ނެތް މައްސަލައެއް ކަމަށް ވިދާޅުވެ މައްސަލަ ބަލައިނުގަނެ ވަނީ ބޭރުކޮށްލާފައެވެ.