ދިވެހިރާއްޖެއާއި ސައުދީ އަރަބިއްޔާ އާ ދެ ޤައުމުގެ ދެމެދުގައި އޮތީ ވަރަށް ވަރުގަދަ ގުޅުމެއްކަމަށް ސައުދީ އަރަބިއްޔާގެ ޝޫރާ ކައުންސިލްގެ ރައީސް ޝައިޚް ޑރ. ޢަބްދުﷲ ބިން މުޙައްމަދު ބިން އިބްރާހީމް އާލް އައްޝައިހް ވިދާޅުވެއްޖެއެވެ.

ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲގެ ދައުވަތަކަށް، ވަފުދަކާ އެކު ރާއްޖެއަށް މިހާރު ކުރައްވަމުންގެންދަވާ ރަސްމީ ދަތުރުފުޅާ ގުޅޭގޮތުން ޝައިޚް ޑރ. ޢަބްދުﷲ ވިދާޅުވީ، އެމަނިކުފާނުގެ މި ދަތުރުފުޅުގެ ބޭނުމަކީ ދެ ޤައުމުގެ ދެމެދުގައި އޮތް އަޚުވަންތަ ގުޅުން ބަދަހިކޮށް، ތަފާތު ދާއިރާތަކުން ގުޅިގެން މަސައްކަތްކުރުމުގެ އައު ފުރުސަތުތައް ހުޅުވައިލުން ކަމަށެވެ.

މި ދަތުރުފުޅު ރަމްޒުކޮށްދެނީ ސައުދީ އަރަބިއްޔާ އާއި ދިވެހިރާއްޖެއާ ދެމެދު އޮތް ވަރުގަދަ ގުޅުން" ކަމަށާއި، ދެ ޤައުމުގެ ލީޑާޝިޕުން ތިބީ ދެ ޤައުމުގެ މަސްލަހަތަށް ޓަކައި ގުޅުން ބަދަހިކޮށް މަޝްވަރާ ކުރިއެރުވުމަށް ސާބިތުވެ ކަމަށް ޝައިހް ޑރ.އަބްދުﷲ ވިދާޅުވިއެވެ.

ޕާލަމެންޓަރީ ޑިޕްލޮމަސީގެ މުހިންމުކަމުގެ މައްޗަށް އަލިއަޅުއްވައިލައްވަމުން، ޝައިޚް ޑރ. ޢަބްދުﷲ ވިދާޅުވީ އެއީ ދެ ޤައުމުގެ ދެމެދުގައި ދެނެގަތުން ބަދަހިކޮށް، ވިސްނުންތައް ގާތްކޮށް، ރަޙްމަތްތެރިކަމުގެ ކޮމިޓީތަކާއި ޕާލަމެންޓަރީ ގުޅުންތައް ހަރަކާތްތެރިކުރުވައިގެން ގުޅިގެން މަސައްކަތްކުރުމުގެ ދާއިރާތައް ތަރައްޤީ ކުރުމަށް ބާރުވެރި ފާލަމެއް ކަމަށެވެ. މި ދަތުރުފުޅުގެ ސަބަބުން ޝޫރާ ކައުންސިލާއި ރައްޔިތުންގެ މަޖިލީހާ ދެމެދު ޕާލަމެންޓަރީ ގުޅުމަށް އައު ދިރުމެއް ލިބި، ދެ ޤައުމާއި ދެ ރައްޔިތުންގެ ގުޅުން އެކި ދާއިރާތަކުން ބަދަހިވެގެންދާނެ ކަމުގެ ޔަޤީންކަން އެބައޮތް ކަމަށް ވެސް ވިދާޅުވިއެވެ.

މި ދަތުރުފުޅުގައި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އާ ރަސްމީ މަޝްވަރާ ބައްދަލުވުމެއް ބާއްވަވައި، ރާއްޖޭގެ އިސް ބައެއް ބޭފުޅުންނާ ބައްދަލުކުރެއްވުމަށް ވަނީ ހަމަޖެހިފައެވެ. ޝޫރާ ކައުންސިލްގެ ރައީސްގެ އަރިހުގައި ވަޑައިގެންނެވި ވަފުދުގައި ހިމެނިވަޑައިގަންނަވަނީ ޑރ. މުޙައްމަދު ބިން ޢަލީ މުބާރަކް، އިންޖިނިއަރ މަހްދީ ބިން ނާސިރް އައްދައުސަރީ، ޑރ. ލުލުވާ ބިންތު ޢަބްދުލްޣައްފާރު ފަދަ، އަދި ޑރ. ދަލާލް ބިންތު މުޙިއްދީން މަނަފާނީ އެވެ.