ވއަތޮޅު އަލިމަތާ ކައިރީގައި އޮންނަ ކޭވްއަށް ޑައިވިނަށްދިޔަ ބައެއްގެ ފުރާނަ ގެއްލި ހިނގި ހިތާމަވެރި ހާދިސާގައި ޑައިވަރުން ހޯދުމުގައި ދިވެހިންގެ ފަރާތުން ފެނިގެންދިޔަ މަސައްކަތްތަކަށް ސްރީލަންކާގެ ކުރީގެ ރައީސް، އަދި ކުރީގެ ބޮޑުވަޒީރު މަހިންދަ ރާޖަޕަކްސާގެ ދޮށީ ދަރިކަލުން ނަމަލް ރާޖަޕަކްސާ ޝުކުރު އަދާކުރައްވައިފިއެވެ.

ކޭވްއަށް ދިޔަ ފަސް ޑައިވަރުން ހޯދުމުގެ މަސައްކަތުގައި އެމްއެންޑީއެފުން ވަނީ ހާއްސަ އޮޕަރޭޝަނެއް ކުރިއަށްގެންގޮސްފައެވެ. މި އޮޕަރޭޝަނުގައި އެ މީހުން ހޯދަން އެ ސަރަހައްދަށް ފީނަން ދިޔަ އެމްއެންޑީއެފްގެ އެންމެ މޮޅު އެއް ޑައިވަރު ވަނީ ނިޔާވެފައެވެ. އޭނާ ނިޔާވީ ގެއްލުނު މީހުން ހޯދުމުގެ މަސައްކަތުގައި ކޭވް ކައިރިއަށް ޑައިވިނަށް ގޮސް އުޅެނިކޮށެވެ.

މި ހާދިސާ އާ ގުޅޭގޮތުން އެކްސްގައި ކުރެއްވި ޕޯސްޓެއްގައި ނަމަލް ވިދާޅުވީ، އެ ހާދިސާއަކީ މުޅި ރާއްޖެއަށް ލިބުނު ފުން ހިތާމައެއް ކަމަށެވެ. ސަލާމަތްކުރުމުގެ މަސައްކަތްތައް ނުހަނު ނުރައްކާތެރި އަދި ދަތި ހާލަތްތަކެއްގައި ކުރިއަށް ގެންދަން ޖެހުނުއިރު، އެ ހިތާމަވެރިވަގުތުގައި ދިވެހި ރެސްކިއު ޑައިވަރަކު މަރުވެފައިވާކަން ނަމަލް ވަނީ ފާހަގަކުރައްވާފައެވެ.

ނަމަލް ވިދާޅުވީ، ދިވެހި ސަރުކާރުގެ ކަމާބެހޭ އިދާރާތަކާއި، ދިވެހި ސިފައިން އަދި އިމަޖެންސީގައި މަސައްކަތްކުރި އެންމެހާ ފަރާތްތަކުން، މި ދަތި އުނދަގޫ ވަގުތުގައި ފެނިގެންދިޔައީ ހިތްވަރުގަދަ އަދި ވަރުބަލިކަމެއް ނެތް މަސައްކަތްތަކެއް ކަމަށެވެ. އެގޮތުން ނަމަލް ވަނީ އެ ހުރިހާ ފަރާތްތަކެއްގެ މަސައްކަތްތައް ފާހަގަކޮށް ޝުކުރުއަދާކޮށްފައެވެ. އަދި މި ހާދިސާގައި ވަކިވެދިޔަ ފަރާތްތަކުގެ އާއިލާތަކަށާއި ގާތްތިމާގެ މީހުންނަށް ނަމަލް ވަނީ ތައުޒިޔާ ދަންނަވަމެވެ.