ޣައްޒާގެ މެދުތެރޭގައި އޮންނަ ނުސީރާތު ރެފިއުޖީ ކޭމްޕުގެ އެޕާޓްމަންޓަކަށް އާދީއްތަ ދުވަހު އިސްރާއީލުން ދިން ވައިގެ ހަމަލާއެއްގައި، އެންމެ ހަ މަހުގެ ތުއްތު ކުއްޖަކާއި އެކުއްޖާގެ މައިންބަފައިން ޝަހީދުވެއްޖެ ކަމަށް ސިއްހީ އޮފިޝަލުން ހާމަކޮށްފިއެވެ.

މި ހަމަލާގައި ޝަހީދުވެފައިވަނީ މުޙައްމަދު އަބޫ މަައްލޫހް އާއި، އޭނާގެ އަނބިމީހާ އަލާ ޒަގްލާންގެ އިތުރުން، އެމީހުންގެ ހަ މަހުގެ ދަރިފުޅު އުސާމާއެވެ. މީގެ އިތުރުން، އާދީއްތަ ދުވަހުގެ ފަހުގެ ވަގުތެއްގައި ޖަބަލިއާ ރެފިއުޖީ ކޭމްޕުގައި ހުންނަ އދ. ގެ ކްލިނިކެއްގެ ކައިރިން އިސްރާއީލު ސިފައިން ދިން ބަޑީގެ ހަމަލާއެއްގައި ފަލަސްތީނުގެ ފިރިހެނަކު ވެސް ވަނީ ޝަހީދުވެފައެވެ.

ޝަހީދުވި އާއިލާގެ ހަށިތައް ދައިރު އަލް-ބަލާހްގައި ހުންނަ އަލް-އަޤްޞާ މާރޓީރސް ހޮސްޕިޓަލަށް ގެންދިއުމުން، އެމީހުންގެ އާއިލާގެ މެންބަރުން ވަނީ ފަހުގެ ވަދާއީ ސަލާމް ކުރުމަށް އެތަނަށް އެއްވެފައެވެ. ރޮމުން އިނދެ ޝަހީދުވި ތުއްތު ކުއްޖާގެ މާމަ، އުންމު ހަމްޒާ އަބޫ މަައްލޫހް ބުނީ، އޭނާގެ ދަރިފުޅާއި ޅީދަރިފުޅު އަދި ކާފަ ދަރިފުޅު ނިދާފައި ތިއްބާ އެނދަށް ރޮކެޓް އެރުމުގެ ސަބަބުން އެ ތިން މީހުން ވަކިވެދިޔައީ ދެމަފިރިންގެ އިތުރު ހަ އަންހެން ކުދިން ދުނިޔޭގައި ތިއްބާ ކަމަށެވެ.

ޝަހީދުވި މުޙައްމަދުގެ ބޭބެ ޔަޙްޔާ އަބޫ މަައްލޫހް ރޮއިޓާސްއަށް މައުލޫމާތު ދެމުން ބުނީ، އެއްވެސް އިންޒާރަކާ ނުލައި ދިން މި ހަމަލާގެ ސަބަބުން މުޅި އާއިލާ އަށް ބޮޑު ހިތާމައެއް ލިބިފައިވާ ކަމަށެވެ. އަދި ހަނގުރާމަ ހުއްޓާލުމުގެ ބޭނުމަކީ އަމާންކަން ގާއިމުކުރުން ކަމަށްވީ ނަމަވެސް، އިސްރާއީލުން ކުއްލި ހަމަލާތަކެއް ދެމުންދާ ކަމަށް އޭނާ ފާހަގަކުރިއެވެ.

އެމެރިކާގެ ރައީސް ޑޮނަލްޑް ޓްރަމްޕް މެދުވެރިވެގެން އޮކްޓޯބަރު މަހު އެކުލަވާލި ޤަތުލްއާއްމު ހުއްޓާލުމުގެ އެއްބަސްވުމާއެކު ވެސް، އިސްރާއީލުގެ ހަމަލާތައް ހުއްޓުމަކަށް އައިސްފައެއް ނުވެއެވެ. މި އެއްބަސްވުމުގެ ދަށުން ޣައްޒާގެ ދެބައިކުޅަ އެއްބަޔަށްވުރެ ބޮޑު ބައެއް އޮތީ އިސްރާއީލުގެ ބާރުގެ ދަށުގައެވެ.

2023 ވަނަ އަހަރުގެ އޮކްޓޯބަރު މަހުން ފެށިގެން އިސްރާއީލުން ޣައްޒާގައި ހިންގަމުންދާ ގަތުލުއާންމުގައި މިހާތަނަށް 72,000 އަށްވުރެ ގިނަ ފަލަސްތީނު ރައްޔިތުން ވަނީ ޝަހީދުވެފައެވެ. ޤަތުލުޢާއްމު ހުއްޓާލުމުގެ އެއްބަސްވުމަށް އަމަލުކުރަން ފެށި ފަހުން ވެސް އިސްރާއީލުގެ ހަމަލާތަކުގައި 880 އެއްހާ ފަލަސްތީނު މީހުން ވަނީ ޝަހީދުވެފައެވެ.