މަޖިލީހުގެ ނާއިބު ރައީސްގެ މަގާމަށް ބޭފުޅަކު އައްޔަންކުރުމަށް މިއަދު މެންދުރު އިތުރު ޖަލްސާއެއް ބާއްވަން ނިންމައިފިއެވެ. މި ޖަލްސާ ބާއްވަން ނިންމާފައިވަނީ މެންދުރު އެކެއް ޖަހާއިރު އެވެ.

މަޖިލީހުގެ ދައުރު މިއަދާ ހަމައަށް ދަންމާލުމަށްފަހު، މިއަދު 9:00 ގައި ތާވަލް ކޮށްފައި އޮތީ ނާއިބު ރައީސް ކަމުގެ މަގާމުގައި ހުންނެވި ދިއްގަރު ދާއިރާގެ މެމްބަރު އަހުމަދު ނާޒިމް މަގާމުން ވަކިކުރުމުގެ މައްސަލަ ކުރިއަށް ގެންދާ ޖަލްސާއެވެ.

ނަމަވެސް އެ ޖަލްސާ ތާވަލްކޮށްފައިވަނިކޮށް ނާޒިމް ވަނީ މަގާމުން އިސްތިއުފާ ދެއްވާފައެވެ.

އެހެންކަމުން މައްސަލަ ކުރިއަށް ނުގެންދަވާނެކަން އިއުލާން ކުރައްވަމުން މަޖިލީހުގެ ރައީސް ވަނީ މެންދުރު އިތުރު ޖަލްސާއެއް އޮންނާނެކަން އިއުލާން ކުރައްވާފައެވެ. 

ޖަލްސާގައި ކުރައްވާ މަސައްކަތް އިއުލާން ނުކުރެއްވި ނަމަވެސް، ބެލެވޭ ގޮތުގައި މިއީ އައު ނާއިބަކު އައްޔަނު ކުރެއްވުމަށް ބާއްވާ ޖަލްސާއެކެވެ.

މަޖިލީހުގެ ނައިބު ރައީސްގެ މަގާމުން ނާޒިމް ވަކިކުރުމަށް އޭނާ ނިސްބަތްވާ ކޮންގްރެސް ޕާޓީން ހުށަހަޅާފައިވަނީ މިމަހުގެ 14 ވަނަ ދުވަހު އެވެ. އެ ޕާޓީން ވަނީ ވަނީ ނާޒިމް މަގާމުން ވަކިކުރުމަށް 72 މެމްބަރުންގެ ސޮއި ހޯދާފަ އެވެ.

ނާޒިމްގެ މައްޗަށް ދެ ތުހުމަތެއް ކުރެއެވެ. އެއީ ފިތުނަ އުފެއްދުމާއި މަސްލަހަތު ނަގާލުމުގެ ތުހުމަތެވެ.

މަގާމުން އިސްތިއުފާ ދެއްވައި ފޮނުއްވި ސިޓީގައި ނާޒިމް ވަނީ އެ ތުހުމަތުތައް ދޮގުކުރައްވާފައެވެ. 

އެގޮތުން ވިދާޅުވީ، އޭނާ މަޤާމުން ވަކިކުރުމަށް ހުށަހަޅާފައިވާ ޤަރާރުގައި ކޮށްފައިވާ ތުހުމަތުތައް ސާބިތުކޮށްދިނުމަށް އެއްވެސް ހެއްކެއް ނުވަތަ ޤަރީނާއެއް އެ ޤަރާރުގައި ބަޔާންކޮށްފައި ނުވާ ކަމަށެވެ. 

އަދި މިހާތަނަށްވެސް މަޖިލީހުގެ ނައިބުރައީސްގެ ހައިސިއްޔަތުން ނުވަތަ މެމްބަރެއްގެ ހައިސިއްޔަތުންވިއަސް ކޮށްފައިވާ ނުވަތަ ނުކޮށް ދޫކޮށްލާފައިވާ ކަމަކާއި ގުޅިގެން އެއްވެސް މެމްބަރަކު ނުވަތަ އެހެންވެސް ފަރާތަކުން ޤާނޫނުއަސާސީއާއި ނުވަތަ މަޖިލީހުގެ ޤަވާއިދާ ޚިލާފުވެއްޖެކަމުގެ ޝަކުވާއެއް އުފުލާފައި ނުވާ ކަމަށެވެ. އެހެންކަމުން، މިހުރިހާ ތުހުމަތުތަކަކީ އެއްވެސް އަސާސެއްނެތް ކަންތައްތަކެއްކަމަށް އޭނާ ވިދާޅުވިއެވެ.

ނާޒިމް އިތުރަށް ވިދާޅުވީ، އިސްތިއުފާ ދެއްވަނީ ތުހުމަތުތައް ތެދުކަމަށްވާތީ ނޫން ކަމަށެވެ. އެހެނެއްކަމަކު، އިންތިހާބީ މަގާމަށް ވޯޓުލީ ގިނަ މެމްބަރުންތަކެއް އޭނާ ވަކިކުރަން ހުށަހެޅުމުން އިސްތިއުފާ ދެއްވުމަކީ ޑިމޮކްރަސީގެ ހަމަތަކުގެ މަތީން އެންމެ ތަހުޒީބީ ގޮތް ކަމަށް ވާތީ ކަމަށެވެ.