ރައްޔިތުންގެ މަޖިލީހުގެ ނައިބު ރައީސްގެ މަގާމަށް އޭދަފުށީ ދާއިރާގެ މެންބަރު އަހްމަދު ސަލީމް (ރެޑްވޭވް ސަލީމް) އަދި ވައިކަރަދޫ ދާއިރާގެ މެމްބަރު އިބްރާހިމް ޒިޔާދު (ފިއްޓެ)ގެ ނަން ހުށަހަޅައިފިއެވެ.

މަޖިލީހުގެ ނާއިބް ރައީސްގެ މަގާމު ހުސްވީ އެމަގާމުގައި ހުންނެވި ދިއްގަރު ދާއިރާގެ މެންބަރު އަހުމަދު ނާޒިމް މަގާމުން އިސްތިއުފާ ދެއްވުމުންނެވެ. އޭނާ އިސްތިއުފާ ދެއްވީ އިތުބާރު ނެތްކަމުގެ މައްސަލައެއް އޭނާ ނިސްބަތްވެވަޑައިގަންނަވާ ޕީއެންސީން ހުށަހަޅައި މައްސަލަ ކުރިއަށް ގެންދަން ތައްޔާރުވެފައިވަނިކޮށެވެ. 

އެއާއެކު މިއަދު މަޖިލިސް ނާއިބު ރައީސް އަކު ހޮވުމުގެ މަސައްކަތް ފަށާފައިވާއިރު، މަޖިލީހުގެ މިހާރު ކުރިއަށްދާ ޖަލްސާގައި ސަލީމް މަޖިލީހުގެ ނައިބު ރައީސްގެ މަގާމަށް ގެންނަން ހުށަހެޅީ ވެރިކަންކުރާ ޕީއެންސީގެ ޕީޖީ ލީޑަރު އިބްރާހިމް ފަލާހްއެވެ.

ޕީއެންސީގެ ފަރާތުން ސަލީމް ނޫން އެހެން ބޭފުޅެއްގެ ނަން ހުށަހަޅާފައެއް ނުވެއެވެ. 

އެ މަގާމަށް ފިއްޓެ ގެންނަން ހުށަހެޅުއްވީ ހަނިމާދޫ ދާއިރާގެ އެމްޑީޕީގެ މެމްބަރު އަބްދުލްޣަފޫރު މޫސާ އެވެ.

މަޖިލީހުގެ ނާއިބު ރައީސް އަކު ހޮވަނީ މެންބަރުންގެ ސިއްރު ވޯޓަކުންނެވެ. އެހެންކަމުން، މަޖިލީހުގެ ޖަލްސާގައި ފުރަތަމަ ކުރިއަށް ގެންދިޔައީ ވޯޓު ގުނުމަށް 5 މެންބަރުންގެ މައްޗަށް އެކުލެވޭ ކޮމިޓީއެއް ހޮވުމުގެ މަސައްކަތެވެ. އެކޮމިޓީގައި މަޖިލީހުގައި ހިމެނޭ ހުރިހާ ސިޔާސީ ޕާޓީއެއްގެ މެންބަރުން ހިމެނަން އިސްކަންދޭންޖެހެއެވެ. 

ވޯޓު ގުނާ ކޮމިޓީ ހޮވުމަށް ނަން ހުށަހެޅުއްވީ ފަލާހް އެކަންޏެވެ. ކޮމިޓީއަށް އޭނާ ހުށަހެޅުއްްވި މެންބަރުންނަކީ؛ 

1) މަނަދޫ ދާއިރާގެ މެންބަރު ހުސްނީ މުބާރިކް (ޕީއެންސީ)

2) ބާރަށު ދާއިރާގެ މެންބަރު އިބްރާހިމް ޝުޖާޢު (ޕީއެންސީ)

3) ހުރާ ދާއިރާގެ މެންބަރު ޑރ. އަނާރާ ނަޢީމް (ޕީއެންސީ)

4) ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް (އެމްޑީޕީ)

5) ތުޅާދޫ ދާއިރާގެ މެންބަރު އަބްދުލް ހަންނާން (އަމިއްލަ)

ވޯޓު ގުނުމަށް އެ ފަސް މެންބަރުންގެ ކޮމިޓީ ހޮވުމަށް މަޖިލީހުގެ އަޣުލަބިއްޔަތުން ވަނީ ފާސްކޮށްފައެވެ.