ދިވެހި ފުލުހުންގެ ޚިދުމަތުގެ އިދާރީ ހިންގުން ހަރުދަނާކޮށް، މަސައްކަތުގެ ފެންވަރު މަތިކުރުމުގެ މަގުސަދުގައި އެ މުއައްސަސާގެ ހިންގުމުގެ އޮނިގަނޑަށް ބޮޑެތި ބަދަލުތަކެއް ގެނެސްފިއެވެ.
ފުލުހުންގެ އިދާރާއިން މައުލޫމާތު ދޭ ގޮތުގައި، އަލަށް އެކުލަވައިލި އޮނިގަނޑަށް އަމަލުކުރަން ފަށާފައިވަނީ އިއްޔެއިން ފެށިގެންނެވެ.
މި ބަދަލަކީ ފުލުހުންގެ ޚިދުމަތް ދިނުމުގައި މިހާރަށްވުރެ ފުރިހަމަ ނަތީޖާއެއް ހާސިލުކުރުމަށްޓަކައި ގެނެވުނު ބަދަލެއް ކަމަށް އެ މުއައްސަސާއިން ބުނެއެވެ. އައު އޮނިގަނޑާ އެއްގޮތަށް މަގާމުތަކަށް އޮފިސަރުން އައްޔަންކުރުމާއި، ހިންގުމުގެ ސިޔާސަތުތަކަށް ގެންނަންޖެހޭ ބަދަލުތައް ގެނެސް، އޮނިގަނޑު ތަންފީޒުކުރުމުގެ އަމަލީ މަސައްކަތްތައް މިހާރު ދަނީ ކުރަމުންނެވެ.
އަލަށް ގެނައި ބަދަލާއެކު، ފުލުހުންގެ ޚިދުމަތްތަކާއި ތަހުގީގީ ދާއިރާ، އިންޓެލިޖެންސް، ފޮރެންސިކް، އޮޕަރޭޝަނަލް ސަޕޯޓް، ޓެކްނޮލޮޖީ، ޓްރޭނިންގ އަދި ކޯޕަރޭޓް ސަޕޯޓް ފަދަ މުހިންމު މަސައްކަތްތައް ވަނީ ކޮމާންޑްތަކެއްގެ ދަށުން އަލުން ތަރުތީބުކޮށްފައެވެ. ކުރިން 17 ކޮމާންޑެއްގެ މައްޗަށް ބެހިފައި އޮތް އޮނިގަނޑު، މިހާރު ވަނީ 14 ބަޔަކަށް ބަދަލުކޮށްފައެވެ.
އައު އޮނިގަނޑުގައި ހިމެނޭ 14 ކޮމާންޑް:
އޮފީސް އޮފް ދަ ކޮމިޝަނަރ
ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓް
ޕްރޮފެޝަނަލް ސްޓެންޑަރޑްސް
ނޭޝަނަލް އިންޓެލިޖެންސް ސަރވިސް
އިންޓަރނަލް ސެކިއުރިޓީ އެންޑް އޮޕަރޭޝަނަލް ސަޕޯޓް
ފޮރެންސިކް ސަރވިސަސް
ސެންޓްރަލް އިންވެސްޓިގޭޝަންސް
މާލޭ ޕޮލިސް
ހުޅުމާލޭ ޕޮލިސް
ނޮދަން ޕޮލިސް
ސަދަން ޕޮލިސް
ސަރވިސް ޑިވެލޮޕްމަންޓް
ސަރވިސް ސަޕޯޓް
ޑިޖިޓަލް ޑޭޓާ އެންޑް ޓެކްނޮލޮޖީ
ފުލުހުންގެ އިދާރާއިން ފާހަގަކުރި ގޮތުގައި، މި އޮނިގަނޑު ފަރުމާކޮށްފައިވަނީ ތަފާތު ދާއިރާތަކުގެ މެދުގައި އޮންނަ ގުޅުން ބަދަހިކޮށް، އޮޕަރޭޝަނަލް ހިންގުން ހަރުދަނާކުރުމަށެވެ. އަދި ރައްޔިތުންނާ ގާތުން ޚިދުމަތް ފޯރުކޮށްދޭ ފުލުހުންގެ ނިޒާމެއް ގާއިމުކުރުމާއި، އިސް ސަފުގައި ހަރަކާތްތެރިވާ ފަރާތްތަކުގެ ދައުރު ފުޅާކުރުމަކީވެސް މި ބަދަލުގެ މައިގަނޑު މަގުސަދެކެވެ.
މީގެ އިތުރުން، ރާއްޖޭގެ އަމަންއަމާންކަމާއި ރައްކާތެރިކަމުގެ މާހައުލަށް އަންނަ ބަދަލުތަކަށް ރިއާޔަތްކޮށް، މުއައްސަސާގެ ވަސީލަތްތަކުގެ ބޭނުން އެންމެ ފުރިހަމަ ގޮތުގައި ހިފުން ކަށަވަރުކުރުމަށް މި އައު އޮނިގަނޑުގެ ސަބަބުން މަގުފަހިވެގެންދާނެ ކަމަށް ފުލުހުން ބުނެއެވެ. މީގެ ކުރިން އަމަލުކުރަމުން ދިޔައީ 2025 އޮކްޓޯބަރު 1 ވަނަ ދުވަހުން ފެށިގެން އަމަލުކުރަން ފެށި އޮނިގަނޑަކަށެވެ.
Advertisement
This content is created and paid for by advertisers and does not involve Voice Journalists
