2019 ވަނަ އަހަރު ސްރީލަންކާގެ އެކި ސަރަޙައްދުތަކަށް ދިން އީސްޓަރ ސަންޑޭ ހަމަލާތަކާ ގުޅިގެން ކުރިއަށްދާ ތަޙުޤީޤަށް، އެ ޤައުމުގެ ކުރީގެ ރައީސް ގޮތަބަޔާ ރާޖަޕަކްސާ ގައުމުން ބޭރަށް ފުރުން މަނާކުރުމުގެ އަމުރެއް ކޮލަމްބޯ ފޯޓް މެޖިސްޓްރޭޓް ކޯޓުން ނެރެފިއެވެ.
މި އަމުރު ނެރުއްވީ ކޮލަމްބޯ ފޯޓް މެޖިސްޓްރޭޓް ޕަސަން އަމަރަސޭކަރަ އެވެ. މި އަމުރު ނެރުއްވާފައިވަނީ އެތައް ބައެއްގެ ފުރާނަ ގެއްލިގެންދިޔަ މި ނުރައްކާތެރި ބޮމުގެ ހަމަލާތަކުގެ ތަޙުޤީޤު ކުރިއަށްގެންދާ ކްރިމިނަލް އިންވެސްޓިގޭޝަން ޑިޕާޓްމަންޓް (ސީ.އައި.ޑީ) އިން ކޯޓަށް ހުށަހެޅި މައްސަލައަކާ ގުޅިގެންނެވެ.
ކުރީގެ ރައީސްގެ އިތުރުން، އަސްކަރިއްޔާގެ ދެ އޮފިސަރަކު ވެސް ޤައުމުން ބޭރަށް ފުރުން ކޯޓުން ވަނީ މަނާކޮށްފައެވެ. އެއީ އާމީ ކާނަލް މުޙައްމަދު އަންސާރާއި، ކުރީގެ އިންޓެލިޖެންސް އޮފިސަރެއް ކަމަށްވާ ޕްރޭމަނަންދަ އުދަލަގަމާ (ސިލްވާ) އެވެ.
މި މައްސަލައިގެ ތަޙުޤީޤާ ގުޅިގެން ސްޓޭޓް އިންޓެލިޖެންސްގެ ކުރީގެ ޑިރެކްޓަރު، ރިޓަޔަރޑް މޭޖަރ ޖެނެރަލް ސުރޭޝް ސާލީ މިހާރު ވެސް ހުންނެވީ ބަންދުގައެވެ.
2019 ވަނަ އަހަރުގެ އޭޕްރިލް މަހު ދިން މި ހަމަލާތަކަކީ ސްރީލަންކާގެ ތާރީޚުގައި ވެސް ދިން އެންމެ ނުރައްކާތެރި އެއް ހަމަލާއެވެ. މި މައްސަލައިގެ ތަޙުޤީޤުތައް މިހާރު ވަނީ ވަރަށް ބޮޑަށް ވަރުގަދަކޮށްފައެވެ.
Advertisement
This content is created and paid for by advertisers and does not involve Voice Journalists
