2026 ވަނަ އަހަރުގެ ފީފާ ވޯލްޑް ކަޕްގެ ހަރަކާތްތަކުގައި ބައިވެރިވެވަޑައިގަތުމަށް އެމެރިކާއަށް ދަތުރުކުރެއްވުމަށް ފަލަސްތީނުގެ ފުޓްބޯޅަ އެސޯސިއޭޝަންގެ ރައީސަށް އެމެރިކާގެ ވިސާ ނުލިބި، އޭނާ މެކްސިކޯގައި މަޑުކުރައްވަން ޖެހިއްޖެއެވެ.
ފަލަސްތީނުގެ ފުޓްބޯޅަ އިދާރާގެ ރައީސް ޖިބްރީލް ރަޖޫބް މިވަގުތު މެކްސިކޯ ސިޓީގައި މަޑުކުރައްވަމުން ގެންދަވަނީ އެމެރިކާއަށް އެތެރެވުމުގެ ހުއްދަ ލިބޭނެ ދުވަހެއްގެ އިންތިޒާރުގައެވެ. ވިސާ ނުލިބުމުން ދުނިޔޭގެ އެކި ގައުމުތަކުގެ ފުޓްބޯޅަ ފެޑެރޭޝަންތަކުގެ ވެރިންނާއެކު ވޯލްޑް ކަޕްގެ ކަންކަމުގައި ބައިވެރިވެވަޑައިގަތުމަށް އޭނާއަށް ފުރުސަތެެއް ނުލިބުނެވެ.
ޖިބްރީލް ރަޖޫބް ވަނީ ބުރާސްފަތި ދުވަހު މެކްސިކޯ އާއި ދެކުނު އެފްރިކާ ބައްދަލުކުރި މެޗު ބައްލަވާލެއްވުމަށް ވަޑައިގެންފައެވެ. ނަމަވެސް، އެމެރިކާގެ ވިސާ ނުލިބުމުގެ ސަބަބުން އޭނާ ހިމެނިވަޑައިގަންނަވަނީ ވޯލްޑް ކަޕްގެ އެކްރެޑިޓޭޝަން ލިބިފައިވީ ނަމަވެސް އެމެރިކާއަށް އެތެރެވުމުގެ ހުއްދަ ނުލިބި ތިއްބެވި ބޭފުޅުންގެ ތެރޭގައެވެ.
މިކަމާ ގުޅޭގޮތުން ރަޖޫބް ވިދާޅުވީ، ދުނިޔޭގެ އެކި ކަންކޮޅުތަކުގައި ތިބި ފުޓްބޯޅަ އާއި ގުޅުންހުރި ފަރާތްތަކަށް މިފަދަ ހަރަކާތްތަކުގައި ބައިވެރިވުމަށް އޮންނަ ހައްގަށް ހުރަސްއަޅައި، އެކަމުގެ ނާޖާއިޒު ފައިދާ ނެގުމަކީ އިންސާފެއް ކަމަށް ގަބޫލުނުކުރައްވާ ކަމަށެވެ.
ފަލަސްތީނަކީ މިއަހަރުގެ މުބާރާތަށް ކޮލިފައިވި ގައުމަކަށް ނުވި ނަމަވެސް، ފީފާގެ އާދަކާދައިގެ މަތިން ދުނިޔޭގެ ހުރިހާ ގައުމެއްގެ ފުޓްބޯޅަ އެސޯސިއޭޝަންތަކުގެ ރައީސުންނަށް މިފަދަ ބޮޑެތި މުބާރާތްތަކަށް ދައުވަތު އަރުވައެވެ. މިއީ ފުޓްބޯޅައިގެ ތެރެއިން ދުނިޔެ އެއްބައިވަންތަކުރުމަށް ކުރިއަށްގެންދާ ހަރަކާތެކެވެ.
ވިސާގެ މި މައްސަލަ ހަމައެކަނި ފަލަސްތީނުގެ އިސްވެރިޔާއަށް އެކަނި ކުރިމަތިވި މައްސަލައެއް ނޫނެވެ. ސޯމާލިއާގެ ރެފްރީއަކަށާއި، އިރާގުގެ ގައުމީ ޓީމާއެކު ދަތުރުކުރި ފޮޓޯގްރަފަރަކަށް ވެސް އެމެރިކާގެ ވިސާ ނުލިބުމުގެ ސަބަބުން ވަނީ ދަތިތަކާ ކުރިމަތިވެފައެވެ.
Advertisement
This content is created and paid for by advertisers and does not involve Voice Journalists
