އިމްތިޙާނު ދުވަސްވަރަކީ ދަރިވަރުންނަށް ނަފްސާނީ ގޮތުންނާއި ޖިސްމާނީ ގޮތުން ބޮޑެތި ގޮންޖެހުންތަކަކާއި ކުރިމަތިލާންޖެހޭ ދުވަސްވަރެކެވެ. ބައެއް ކުދިންނަކީ ނުތަނަވަސްވާ ކުދިންނެވެ. އަނެއްބައި ކުދިން ވަރުބަލިކަން އިހުސާސްކުރާއިރު، އިމްތިހާނަށް ތައްޔާރުވާނެ ރަނގަޅު ގޮތް ނޭނގޭ ކުދިންވެސް އުޅެއެވެ. މިފަދަ ދަނޑިވަޅެއްގައި ބެލެނިވެރިންގެ ދައުރަކީ ނުހަނު މުހިންމު ދައުރެކެވެ. ކުއްޖަކަށް ހަމައެކަނި ބޭނުންވަނީ ފޮތްތަކާއި ފިލާވަޅުތަކެއް ނޫނެވެ. އޭގެ ބަދަލުގައި، އެކުދިންނަށް ބޭނުންވަނީ ބެލެނިވެރިންގެ ލޯތްބާއި އަޅާލުމާއި، އެހީތެރިކަމާއި، މަގުދެއްކުމުގެ އިތުރުން އަމިއްލަ ނަފްސަށް އޮންނަ އިތުބާރު ބިނާކޮށްދިނުމެވެ.

ގޭތެރެ ހަމަހިމޭން އަދި ކިޔެވުމަށް ފަހި މާޙައުލަކަށް ވުމަކީ ކުދިންނަށް ފިލާވަޅުތައް ދަސްކުރުމަށް ފަސޭހަވެގެން ދާނެކަމެކެވެ. އެހެންކަމުން ބެލެނިވެރިން ސަމާލުކަން ދޭންޖެހޭ އެންމެ މުހިންމު އެއް ކަމަކީ، ކިޔެވުމަށް ފަހި މާޙައުލެއް ކުދިންނަށް ހޯދައިދިނުމެވެ. މި ތަނަކީ އެކަށީގެންވާ އަލިކަން ހުރި، އަޑުމަޑު ހަމަހިމޭން މާޙައުލަކަށް ވުމަކީ ވަރަށް މުހިންމުކަމެކެވެ. މިކަމުގެ ސަބަބުން ކުއްޖާއަށް ފިލާވަޅުތައް ފަސޭހައިން ފަހުމްވުމަށް މަގުފަހިވެގެންދެއެވެ.

އިމްތިޙާނާއި ކައިރިކޮށް ހުރިހާ ފިލާވަޅެއް އެއްފަހަރާ ދަސްކުރަން އުޅުމުން ކުދިންގެ ސިކުޑިއަށް ބުރަ ބޮޑުވެގެންދެއެވެ. އެހެންކަމުން، ބެލެނިވެރިންނަށް އެހީތެރިވެދެވޭނެ އެންމެ ރަނގަޅު ގޮތަކީ ކުދިންނާއިއެކު، ކުދިންނަށް ކިޔެވުމަށް ފަސޭހަ ތާވަލެއް ހެދުމުގައި އެހީތެރިވެދިނުމެވެ. ފިލާވަޅުތައް ކުދި ބައިތަކަށް ބަހާލައިގެން، ކޮންމެ ދުވަހަކުވެސް ކޮންމެވެސް މިންވަރަކަށް މުޠާލިއާކުރުމަށް ބާރުއެޅިދާނެއެވެ. މިފަދަ ރޭވުންތެރި އުޞޫލަކުން ކަންކަން ކުރުމުން، އިމްތިޙާނަށް ތައްޔާރުވުމަކީ ބުރަ ކަމަކަށް ނުވެ، ކުދިންނަށް ފަސޭހައިން ކުރެވޭނެ ކަމަކަށް ވެގެންދެއެވެ.

ގިނަ ވަގުތުތަކެއް ވަންދެން ކިޔެވުމަކީ ކުއްޖާގެ ސިކުނޑި ވަރުބަލިކުރުވާނެ ކަމެއް ކަމުން ކިޔެވުމުގެ ތެރެއިން ހުސްވަގުތު ދިނުމަކީ ސިކުނޑި ތާޒާކޮށްލުމަށް ކުދިންނަށް ލިބޭނެ ފުރުޞަތެކެވެ. ކިޔެވުމުގެ ދޭތެރެއިން ހުސް ވަގުތު ކޮޅަކަށް ހިނގާލުން ނުވަތަ ފެންބޯލުން ނުވަތަ ކުޑަ ވަގުތު ކޮޅަކަށް އަރާމުކޮށްލުމަށް ބާރުއެޅުމަކީ ބެލެނިވެރިންނަށް ކުރެވިދާނެ ކަމެކެވެ. މިކަމުގެ ސަބަބުން ކުދިންގެ ކިޔެވުމުގައި ސަމާލުކަން ދެމެހެއްޓި ފިލާވަޅުތައް ފަހުމު ވުމަށް ފަސޭހަވެގެންދާނެއެވެ.

އާއިލާއެއް ފޮޓޯ: އޭއައި

އިމްތިޙާނު ދުވަސްވަރު ކުދިންނަށް ސިއްޙަތަށް ފައިދާ ހުރި ކާނާއާއި އެކަށީގެންވާ ވަރަށް ފެން އަދި ނިދި ބޭނުންވެއެވެ. މާ ލަސްވަންދެން ރޭގަނޑު ހޭލާ ހުރުމަކީ ކުއްޖާ ވަރުބަލިކޮށް، ހަނދާން ބަލިކުރުވާ ކަމެކެވެ. ބެލެނިވެރިން ކުދިންނަށް އަވަހަށް ނިދުމަށާއި، ހަށިގަނޑަށް ހަކަތަ ލިބޭ ފައިދާހުރި ކާނާ ބޭނުންކުރުމަށް ހިތްވަރު ދޭންވާނެއެވެ.

ބެލެނިވެރިން ބޭނުންކުރާ ބަސްމަގަކީ ކުއްޖާގެ އަމިއްލަ ނަފްސަށް އޮންނަ އިތުބާރަށް ސީދާ ގޮތުން އަސަރުކުރުވާ ކަންކަމެކެވެ. "ދަރިފުޅަށް ތިކަން ކުރެވޭނެ"، "ދަރިފުޅު ކުރާ މަސައްކަތާމެދު މަންމަ/ބައްޕަ ފަޚުރުވެރިވަން" ފަދަ ހިތްވަރުދޭ ބަސްތަކުން ކުއްޖާގެ ހިތްވަރު އާވެގެންދެއެވެ. އެހެންކަމުން ބެލެނިވެރިން ކުދިންނަށް ހަޅޭއްލެވުމާއި، ކުށްވެރިކުރުމާއި، ނުވަތަ އެހެން ކުދިންނާ އަޅާކިޔުންފަދަ ކަންކަމުން ދުރުހެލިވާންޖެހެއެވެ. ކޮންމެ ކުއްޖަކީވެސް ތަފާތު ކުއްޖެއްކަމުން އެކި ކުދިންނަށް ކަންކަން ޙާޞިލުކުރެވޭ މިންވަރު ތަފާތު ވާނެއެވެ. އެހެންކަމުން މި ކަންކަމަށް ވިސްނައިގެން ކުދިންނާއި ވާހަކަ ދެއްކުމަށް ޚާއްޞަ ސަމާލުކަމެއް ދޭންވާނެއެވެ.

މަންމައަކު ކުއްޖަކަށް ފިލާވަޅު ހެދުމުގައި އެހީތެރިވަނީ.. ފޮޓޯ: އޭއައި

ބެލެނިވެރިންނާއި ކުދިންނާއި އޮންނަ ގުޅުން ރަނގަޅުކުރުމަށް ވިސްނަންވާނެއެވެ. ބެލެނިވެރިންނާއި އޮންނަ ގުޅުން ރަނގަޅު ނަމަ ކުއްޖާ ޖެހިލުމެއްނެތި ބެލެނިވެރިންނާއި ކަންކަން ޙިއްސާކުރުމަށް ފަސޭހަވެގެންދެއެވެ. އެކުގައި ފިލާވަޅުތައް ބެލުމަކީ ކުދިންނަށް ބެލެނިވެރިޔާވެސް ކިޔެވުމުގެ ކަންކަމަށް ސަމާލުކަން ދޭ މިންވަރު އިޙްސާސް ކުރުވާ ކަމެކެވެ. ބައެއް ކުދިންނަކީ ފިލާވަޅެއް ނޭނގޭކަމަށް ބުނަން ލަދުގަންނަ ނުވަތަ ޖެހިލުންވާ ކުދިންނަށް ވެދާނެއެވެ. އެހެންކަމުން އުނދަގޫވަނީ ކޮން މާދާއެއްތޯ ނުވަތަ ކޮން ފިލާވަޅެއްތޯ އަހައި އޮޅުންފިލުވަންވާނެއެވެ. އަދި މުދައްރިސެއްގެ އެހީތެރިކަން ހޯދައިދިނުމަކީ މުހިންމު ކަމެކެވެ. އެހީތެރިވާނެ މީހަކު ހުރިކަން އެނގުމުން ކުއްޖާގެ ހާސްކަން ކުޑަވެގެންދާނެއެވެ.

އިމްތިޙާނު ދުވަސްވަރު ފޯނު، ޓީވީ، އަދި ގޭމް ކުޅުމަށް ގިނަ ވަގުތު ހޭދަކުރުމަކީ ކުއްޖާގެ ސަމާލުކަން ގެއްލޭނެ ކަމެކެވެ. ބެލެނިވެރިންނަށް މިފަދަ ތަކެތި ބޭނުންކުރުމުގައި ވަކި މިންގަނޑެއް ކަނޑައެޅިދާނެއެވެ. ކުއްލިއަކަށް ހުރިހާ ކަމެއް ހުއްޓުވުމުގެ ބަދަލުގައި، ކިޔެވުމާއި، އަރާމުކުރުމާއި، އަދި ކުޑަ ވަގުތުކޮޅަކަށް ސްކްރީން ބޭނުންކުރުން ހިމެނޭ ހެންކަންކަން ތާވަލު ކުރެވިދާނެއެވެ.

ބެލެނިވެރިން ކުދިންނަށް ދަސްކޮށްދޭންޖެހޭ އަނެއް މުހިންމު ކަމަކީ ތެދުވެރިކަމާއި ދީނީ އަޅުކަންތައްތައް އަދާކުރުމށް ފަރުވާތެރި ވުމާއި އެކު އިމްތިޙާނަށް ތައްޔާރުވުމެވެ. އިމްތިހާނަކީ ހަމައެކަނި މާކްސް ހޯދުން ނޫންކަމާއި އެއީ ޒިންމާދާރުވުމާއި، އަޚުލާގާއި، އަދި ބުރަ މަސައްކަތް ކުރަން ދަސްކޮށްދޭ ކަމެކެވެ. އިޚުލާޞްތެރިކަމާއިއެކު މަސައްކަތްކުރަން ކުދިންނަށް ދަސްވާންޖެހެއެވެ.

ކުދިން އިމްތިޙާނަށް ތައްޔާރުވާއިރު ބެލެނިވެރިންގެ ސަމާލުކަން ނުހަނު ބޭނުންވެއެވެ. އެހެންކަމުން ބެލެނިވެރިންގެ އެހީތެރިކަމަކީ ކުދިންނަށް އިތުބާރު ލިބިދޭނެ ކަމެކެވެ. ލޯތްބާއި، ހިތްވަރުދޭ ބަސްތަކާއި ސިއްޙީ އާދަތަކަކީ ކުދިން އިމްތިޙާނާއި ކުރިމަތިލާއިރު ނަފްސާނީ ހަމަޖެހުން ލިބިދޭނެ ކަންކަމެވެ. މި ކަންކަމުގެ ސަބަބުން އިމްތިޙާނަކީ ބުރަ އުނދަގޫ ކަމެއް ގެ ބަދަލުގައި އާ ކަންތައްތަކެއް ދަސްވާ ރަނގަޅު ތަޖުރިބާއެއް ކަމަށް ކުދިންނަށް އިޙްސާސް ވެގެންދެއެވެ.