ހުޅުމާލޭ އެޕާޓްމަންޓެއްގައި ރޯވެ ދިރިނުއުޅެވޭ ވަރަށް އަނދައިފިއެވެ. މި ހާދިސާއާ ގުޅިގެން 5 މީހަކަށް ފަރުވާދެމުންދާއިރު އެކެއްގެ އަތާއި ފައިގެ 12 އިންސައްތަ ވަނީ ފިހިފައެވެ. 

ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) ބުނީ، އަލިފާނުގެ ހާދިސާ ހިނގީ ހުޅުމާލޭގެ ފްލެޓް ނަންބަރު 110 އެއްގައި ކަމަށާ، ހާދިސާ ހިނގީ ރޭ ދަންވަރުގެ ވަގުތެއްގައި ކަމަށެވެ.

އެމްއެންޑީއެފުން ބުނިގޮތުން ހާދިސާގެ މައުލޫމާތު އެ އިދާރާއަށް ލިބުނީ ރޭ 01:10 ހާއިރު އެވެ. އަދި ފަޔަރ ފައިޓަރުން ކުރި މަސައްކަތުން އަލިފާން ނިއްވާލެވުނީ 01:23 ހާއިރުއެވެ.

މި ހާދިސާއާ ގުޅޭގޮތުން ފުލުހުން މަޢުލޫމާތު ދީފައިވާ ގޮތުގައި، އަލިފާން ރޯވާން މެދުވެރިވީ އެޕާޓްމަންޓުގެ ސިޓިންގ ރޫމުގައި އޮތް 'ޓޫލް މެލްޓިންގ ޑިވައިސް' އެއްގައި ރޯވުމުގެ ސަބަބުން ކަމަށް ބެލެވެއެވެ.

މި ހާދިސާ ހިނގިއިރު އެ ގޭގައި ޖުމްލަ 7 ދިވެހިން ދިރިއުޅެމުންދިޔައެވެ. އޭގެ ތެރޭގައި ހިމެނެނީ 18 އަހަރުން ދަށުގެ ދެ ކުޑަކުދިންނާއި، 18 އަހަރުން މަތީގެ އަންހެނަކާއި ހަތަރު ފިރިހެނުންނެވެ.

ހުޅުމާލެ ހޮސްޕިޓަލުން ބުނި ގޮތުގައި، އަލިފާނުގެ ހާދިސާގައި އަނިޔާވެގެން 5 މީހަކަށް ދަނީ ފަރުވާދެމުންނެވެ. އޭގެ ތެރޭގައި ހިމެނެނީ ދެ ކުޑަކުދިންނާއި 3 ބޮޑެތި މީހުންނެވެ. އެތަނުން އެކެއްގެ އަތާއި ފައިގެ 12 އިންސައްތަ ފިހިފައިވާ ކަމަށް ހޮސްޕިޓަލުން މައުލޫމާތުދެއެވެ.

މި ހާދިސާގެ ސަބަބުން އެޕާޓްމަންޓަށް ބޮޑެތި ގެއްލުންތަކެއް ލިބި، އިތުރަށް ދިރިނޫޅެވޭ ވަރަށް ތަން ވަނީ ހަލާކުވެފައެވެ.

އެންޑީއެމްއޭ އިން ބުނީ އެ އޮތޯރިޓީން މިހާރު ދަނީ ހާލުގައި ޖެހުނު އެ އާއިލާއަށް ބޭނުންވާ ވަގުތީ ބޯހިޔާވަހިކަމާއި، ޒަރޫރީ އިންސާނީ އެހީތެރިކަން ފޯރުކޮށްދިނުމުގެ މަސައްކަތް ކުރަމުންނެވެ.