ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގެ ފެކަލްޓީ އޮފް ހޮސްޕިޓެލިޓީ އެންޑް ޓޫރިޒަމް ސްޓަޑީޒް އިން "ފަތުރު ވާހަކަ" ގެ ނަމުގައި ފަތުރުވެރިކަމާ ބެހޭ މަޝްވަރާ ސިލްސިލާއެއް މިއަދު ފަށައިފިއެވެ.

މި ސިލްސިލާގެ ފުރަތަމަ ބައްދަލުވުން ބާއްވާފައިވަނީ ހޮނިހިރު ދުވަހު ޤައުމީ ޔުނިވަރސިޓީގައެވެ. މި ބައްދަލުވުމުގެ ޝިޢާރަކީ "ޓޫރިޒަމް އިން ޓާބިއުލެންސް: ގްލޯބަލް ޝޮކްސް އެންޑް ދަ ފިއުޗާ އޮފް ޓްރެވެލް ޓްރޭޑް އިން ދަ މޯލްޑިވްސް" އެވެ. މި ހަރަކާތުގެ ޝަރަފުވެރި މެހެމާނެއްގެ ގޮތުގައި ބައިވެރިވެވަޑައިގެންނެވީ މިނިސްޓަރ އޮފް ސްޓޭޓް ފޮރ ޓޫރިޒަމް ޑރ. ޢަބްދުﷲ ނިޔާޒެވެ.

މި ހަރަކާތުގައި ފަތުރުވެރިކަމުގެ ދާއިރާގެ އިސް ފަރާތްތަކާއި ސިޔާސަތު ކަނޑައަޅާ ފަރާތްތަކާއި އެކެޑެމިކް ތަޖުރިބާކާރުން ބައިވެރިވެފައިވެއެވެ. މި ބައްދަލުވުމުގައި ދާއިރާގެ ތަޖުރިބާކާރުން އިސްވެ ތިއްބަވައި ޕެނެލް ޑިސްކަޝަން ސެޝަންތައް ބާއްވާފައިވެއެވެ.

މަޝްވަރާތައް އެނބުރުނީ މައިގަނޑު ތިން ދާއިރާއެއްގެ މައްޗަށެވެ. އެއީ ދަތުރުފަތުރާއި ފަތުރުވެރިކަމާއި ދެމެހެއްޓެނިވި ތަރައްޤީ އާއި ކާބޯތަކެތީގެ ދާއިރާއެވެ. މި ސެޝަންތަކުގައި ދުނިޔެއަށް ކުރިމަތިވެފައިވާ ހީނަރުކަމާއި އިޤުތިޞާދީ ނުތަނަވަސްކަމާއި ތިމާވެށީގެ ގޮންޖެހުންތަކާއި ދަތުރުފަތުރުގެ ވައްޓަފާޅިއަށް އަންނަ ބަދަލުތަކުގެ ސަބަބުން ރާއްޖޭގެ ފަތުރުވެރިކަމުގެ މުސްތަޤުބަލަށް ކުރާ އަސަރުތަކާ ބެހޭ ގޮތުން މަޝްވަރާ ކޮށްފައިވެއެވެ.

"ފަތުރު ވާހަކަ" ސިލްސިލާ ބިނާކޮށްފައިވަނީ ކުރިއަށް އޮތް ތާނގައި ވެސް ދެމެހެއްޓެނިވި ގޮތެއްގައި ކުރިއަށް ގެންދެވޭނެ މަޝްވަރާ ޕްލެޓްފޯމެއްގެ ގޮތުގައެވެ. މި ސިލްސިލާ ރަމްޒުކޮށްދެނީ ތައުލީމީ ދާއިރާ އާއި ފަތުރުވެރިކަމުގެ ސިނާޢަތާ ދެމެދު ގުޅުން ބަދަހިކޮށް ރާއްޖޭގެ ފަތުރުވެރިކަން ކުރިއެރުވުމަށް ބިނާކުރަނިވި މަޝްވަރާތައް ކުރިއަށް ގެންދިޔުމަށް ފެކަލްޓީ އޮފް ހޮސްޕިޓެލިޓީ އެންޑް ޓޫރިޒަމް ސްޓަޑީޒް އިން ދޭ އަހައްމިއްޔަތުކަމެވެ.