އެމެރިކާގެ ރައީސް ޑޮނަލްޑް ޓްރަމްޕް ފީފާގެ ރައީސް ޖިއާނީ އިންފަންޓީނޯއަށް ގޮވާލެއްވުމާ އެކު އެމެރިކާގެ ފޯވާޑް ފޮލަރިން ބަލޮގަންގެ ރަތް ކާޑު ސަސްޕެންޝަން ފީފާއިން ހުއްޓުވައިފިއެވެ. މިއީ ފީފާގެ ތާރީޚުގައިވެސް މީގެ ކުރިން ނުނިންމާ ފަދަ ނިންމުމެކެވެ.

ބޮސްނިއާއާ ދެކޮޅަށް ކުޅުނު މެޗުގައި އެމެރިކާގެ ފަލޮރިން ބެލޮގަން އަށް ރަތް ކާޑު ދެއްކީ ބޮސްނިއާގެ ޑިފެންޑަރު ތާރިގް މުހަރެމޯވިޗްގެ ފައިގެ ފަހަތަށް އެރުމުންނެވެ. މި ހާދިސާ ހިނގި ވަގުތު ރެފްރީ އެއްވެސް ފިޔަވަޅެއް އަޅާފައި ނުވި ނަމަވެސް، ވީއޭއާރު މެދުވެރިކޮށް ރެފްރީ ރަފައެލް ކްލައުސްއަށް އެ މަންޒަރު ދަނޑު ކައިރީގައި ހުރި މޮނިޓަރުން ބެލުމަށް އިރުޝާދު ދިނެވެ.

މަންޒަރުތައް އަލުން ބަލައި މައްސަލަ ދިރާސާކުރުމަށްފަހު، އެއީ އިދިކޮޅު ކުޅުންތެރިޔާގެ ސަލާމަތަށް ނުރައްކާވާ ފަދަ "ނުރައްކާތެރި ފައުލެއް" ކަމަށް ނިންމައި، ބަލޯގަންއަށް ރަތް ކާޑު ދައްކައި ދަނޑުން ފޮނުވާލިއެވެ.

މި ނިންމުމުގެ ސަބަބުން ބަލޮގަންއަށް ހޯމަ ދުވަހު ވޯލްޑް ކަޕްގެ ގަދަ 16 ގެ ބުރުގައި ބެލްޖިއަމާ ދެކޮޅަށް ކުޅުމުގެ ފުރުސަތު ވަނީ ލިބިފައެވެ.

ރަތް ކާޑު ސަސްޕެންޝަނެއް މި ގޮތަށް ހުއްޓުވުމަކީ ފީފާގެ ޑިސިޕްލިނަރީ ޤަވާއިދުތަކުގެ ދަށުން އާންމުކޮށް ހިނގާ ކަމެއް ނޫނެވެ. ނަމަވެސް އެމެރިކާގެ ރައީސް ޓްރަމްޕް ސީދާ ފީފާގެ ރައީސަށް ގޮވާލެއްވުމާ އެކު މި ނިންމުން ވަނީ ބަދަލުވެފައެވެ.

ފީފާގެ ޑިސިޕްލިނަރީ ޕްރޮސެސްގެ ތެރެއަށް ސިޔާސީ ނުފޫޒު ވަނުމާ ގުޅިގެން ބެލްޖިއަމުން ވަނީ މި ނިންމުމާ މެދު ވަރަށް ބޮޑަށް ހިތްހަމަނުޖެހުން ފާޅުކޮށްފައެވެ. ފުޓުބޯޅައިގެ މައިދާނުގައި ހުރިހާ ޤައުމުތަކަށް ހަމަހަމަ ފުރުސަތު ލިބެންޖެހޭ ކަމަށާއި ސިޔާސީ ބާރުގެ ބޭނުންކޮށްގެން ކުޅިވަރުގެ ޤަވާއިދުތައް ބަދަލުކުރުމަކީ ބަލައިގަނެވޭނެ ކަމެއް ނޫން ކަމަށް ބެލްޖިއަމުން ވަނީ ބުނެފައެވެ.

މި މައްސަލައާ އެކު މި ވޯލްޑް ކަޕްގެ އެންމެ ބޮޑު އެއް ބަހުސަކަށް ވެފައި ވަނީ ޓެކްޓިކްސް ނުވަތަ ޓީމު ހޮވުމުގެ މައްސަލައެއް ނޫނެވެ. އެއީ ފުޓުބޯޅައިގެ މައި ޖަމާޢަތާއި ސިޔާސީ ބާރުތަކާ ދެމެދު އޮންނަ ގުޅުމާ މެދު އުފެދިފައިވާ ކަންބޮޑުވުމެވެ.