ހުޅުމާލޭގެ މަގުތަކުގައި ހިނގާބިނގާވެ އުޅޭ މީހުންނަށް ޚާއްޞަކޮށްފައިވާ ދުވާރުތަކުގައި ޕާކުކޮށްފައިވާ އުޅަނދުތައް ޓޯވކުރުމުގެ މަސައްކަތް ފުލުހުން ފަށައިފިއެވެ.
ފުލުހުން ބުނެފައިވާ ގޮތުގައި ހުޅުމާލޭގެ އެކި ސަރަހައްދުތަކުގެ ދުވާރުތަކުގައި ގިނަ އަދަދެއްގެ އުޅަނދުތައް ޕާކުކޮށްފައި ހުރުމުގެ ސަބަބުން ހިނގާބިނގާވެ އުޅޭ މީހުންނަށް ބޮޑެތި ދަތިތަކާ ކުރިމަތިލާން ޖެހިފައިވެއެވެ. އެހެންކަމުން މި މައްސަލައިގައި ފިޔަވަޅު އެޅުމުގެ ގޮތުން ދުވާރުތަކުގައި ޕާކުކޮށްފައިވާ އުޅަނދުތައް ޓޯވކުރުމުގެ މަސައްކަތް ކުރިއަށް ގެންދާ ކަމަށް ފުލުހުން ބުނެފައިވެއެވެ.
ފުލުހުން ވަނީ ހިނގާބިނގާވެ އުޅޭ މީހުންނަށް ޚާއްޞަކޮށްފައިވާ ދުވާރުތަކާއި ސަރަހައްދުތަކުގައި ކުޑަކުދިންގެ ޕްރޭމާއި ނުކުޅެދުންތެރިކަން ހުންނަ ފަރާތްތަކުން ބޭނުންކުރާ އިންސާނީ ހަކަތަ ބޭނުންކޮށްގެން ދުއްވާ ފުރޮޅުލީ ގޮނޑި ފިޔަވައި އެހެން އެއްވެސް ބާވަތެއްގެ އުޅަނދެއް ދުއްވުމާއި ޕާކުކުރުމަކީ ޤާނޫނީ ގޮތުން މަނާ ކަމެއް ކަން ހަނދާންކޮށްދީފައެވެ.
މީގެ އިތުރުން ދުވާރުތަކަކީ ހިނގާ މީހުންގެ ސަލާމަތާއި ރައްކާތެރިކަމަށް ޚާއްޞަކޮށްފައިވާ ތަންތަން ކަމަށާއި ޚާއްޞަކޮށް ކުޑަކުދިންނާއި އުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ ފަރާތްތަކަށް ރައްކާތެރިކަމާ އެކީ ހިނގާބިނގާވެ އުޅެވޭނެ މާހައުލެއް ފޯރުކޮށްދިނުމަކީ މުހިންމު ކަމެއް ކަމަށް ފުލުހުން ބުނެފައިވެއެވެ.
އެހެންކަމުން މިފަދަ ސަރަހައްދުތަކުގައި އުޅަނދު ޕާކުނުކުރުމަށް ފުލުހުން ވަނީ އެންމެހައި ފަރާތްތަކަށް އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
