ފަލަސްތީނުގެ ގާނޫނު ހަދާ މަޖިލީހުގެ އިންތިޚާބު މިއަހަރުގެ ނޮވެމްބަރު މަހުގެ 28 ވަނަ ދުވަހު ބޭއްވުމަށް ނިންމާފައިވާކަން ރައީސް މަހްމޫދު އައްބާސް، އިޢުލާނު ކުރައްވައިފިއެވެ.

ރައީސް އައްބާސް ބުރާސްފަތި ދުވަހު ނެރުއްވި ރިޔާސީ ގަރާރެއްގައިވާ ގޮތުން، މި އިންތިޚާބު ހުޅަނގު އައްސޭރި އާއި، އިރުމަތީ ގުދުސް އަދި ގާޒާ ހިމެނޭހެން ފަލަސްތީނުގެ ހުރިހާ ސަރަހައްދެއްގައި ކުރިއަށްދާނެއެވެ. މިއީ ފާއިތުވި 20 އަހަރު ދުވަހުގެ ތެރޭގައި ފަލަސްތީނުގައި ބާއްވާ މިފަދަ ފުރަތަމަ އިންތިޚާބެވެ.

ފަލަސްތީނުގައި އެންމެ ފަހުން ގާނޫނު ހަދާ މަޖިލީހުގެ އިންތިޚާބެއް ބާއްވާފައިވަނީ 2006 ވަނަ އަހަރެވެ. އެ އިންތިޚާބުގައި ހަމާސްއިން ހޯދި ކުއްލި ކާމިޔާބީއާ ގުޅިގެން، އައްބާސްގެ ފަތަހަ ޖަމާއަތާއި ހަމާސްއާ ދެމެދު ސިޔާސީ ބައިބައިވުން އުފެދި، 2007 ވަނަ އަހަރު ގާޒާގެ ފުރިހަމަ ކޮންޓްރޯލް ހަމާސްއިން ނެގިއެވެ.

މި ނިންމެވުމާ ގުޅޭގޮތުން އަލްޖަޒީރާގެ ރާމަالله ރިޕޯޓަރު ނޫރު އޫދާ ބުނީ، މިއީ ފަލަސްތީނުގެ ލީޑަރޝިޕާއި ބޭރުގެ ބާރުގަދަ ގައުމުތަކާ ދެމެދު ކުރެވުނު މަޝްވަރާތަކުގެ ނަތީޖާ ކަމަށެވެ. ޚާއްސަކޮށް ފަރަންސޭސިވިލާތާއި ސައުދީ އަރަބިއްޔާ ފަދަ ގައުމުތަކުން ބޭނުންވަނީ ފަލަސްތީނުގެ ސަރުކާރަށް ބޭނުންވާ އެހީތެރިކަން ފޯރުކޮށްދިނުމުގެ ކުރިން، އެ ސަރުކާރަށް އިސްލާހީ ބަދަލުތަކެއް ގެނައުމަށެވެ.

ނަމަވެސް، އިންތިޚާބު ބޭއްވުމުގެ ކުރިން ހައްލުކުރަންޖެހޭ ގިނަ ގޮންޖެހުންތަކެއް އެބަހުއްޓެވެ. މީގެ ތެރޭގައި އިރުމަތީ ގުދުސްގައި ދިރިއުޅޭ ފަލަސްތީނު ރައްޔިތުންނަށް ވޯޓުލުމުގެ ފުރުސަތު އިސްރާއީލުން ދިނުން ހިމެނެއެވެ. 2021 ވަނަ އަހަރު ބޭއްވުމަށް ހަމަޖެހުނު އިންތިޚާބުވެސް ކެންސަލްކުރީ އިސްރާއީލުން އެ ފުރުސަތު ނުދިނުމުންނެވެ.

މީގެ އިތުރުން، އިސްރާއީލުން ގާޒާގައި ހިންގަމުންދާ ގަތުލުއާންމުގެ ސަބަބުން އެ ސަރަހައްދުގެ 90 އިންސައްތަ އުމްރާނީ ވަސީލަތްތައް ވަނީ ހަލާކުވެފައެވެ. އަދި ގާޒާގެ 2.1 މިލިއަން ރައްޔިތުން ހާލުގައި ޖެހިފައިވާއިރު، އާބާދީގެ ރަޖިސްޓްރީ އާ ނުކުރެވި އޮތުމަކީވެސް ބޮޑު ގޮންޖެހުމެކެވެ.

ރައީސް އައްބާސް 2005 ވަނަ އަހަރު ވެރިކަމަށް އިންތިޚާބުވީ 4 އަހަރުގެ ދައުރަކަށެވެ. ނަމަވެސް، ފާއިތުވި 15 އަހަރު އޭނާ ވެރިކަން ކުރައްވަމުން ގެންދަވަނީ ރިޔާސީ ގަރާރުތަކުގެ ދަށުންނެވެ. މީގެ ސަބަބުން ކޮރަޕްޝަނާއި ބާރުގެ ބޭނުން ނަހަމަގޮތުގައި ހިފާކަމުގެ ތުހުމަތުތައް އޭނާއަށް ވަނީ އަމާޒުވެފައެވެ.

އަންނަ އަހަރުގެ ކުރީކޮޅު ރިޔާސީ އިންތިޚާބު ބާއްވާނެކަން އިއުލާނު ކުރެއްވި ނަމަވެސް، އައްބާސް އަލުން އިންތިޚާބުގައި ވާދަކުރައްވާނެކަން އަދި ކަށަވަރެއް ނުވެއެވެ. ފަލަސްތީނުގެ ރައްޔިތުން ލީޑަރޝިޕަށް ބަދަލެއް ބޭނުންވި ނަމަވެސް، މި އިންތިޚާބު ހަގީގަތުގައި ބޭއްވިދާނެކަމާމެދު ގިނަ ބަޔަކު ސުވާލު އުފައްދައެވެ.