ޣައްޒާގައި އިސްރާއީލުން ހިންގަމުންދާ ލާއިންސާނީ ގަތުލުއާންމަށް ފާޅުގައި ތާއީދުކޮށް، އެ ތަން ސުންނާފަތިކޮށްލުމަށް ގޮވާލި އެމެރިކާގެ ނުފޫޒުގަދަ ސެނެޓަރު ލިންޑްސީ ގްރަހަމް، ”ކުއްލި ބައްޔަކަށް“ ފަރުވާ ހޯދަމުންދަނިކޮށް މަރުވެއްޖެއެވެ.

އޭނާގެ އޮފީހުގެ ކޮމިއުނިކޭޝަންސް ޑައިރެކްޓަރު މީސްމީޑިއާގައި ހާމަކޮށްފައިވާ ގޮތުގައި، ސައުތު ކެރޮލައިނާގެ ސީނިއާ ރިޕަބްލިކަން ސެނެޓަރު މަރުވީ ކުއްލިގޮތަކަށް ޖެހުނު ބައްޔެއްގައި ހޮނިހިރު ދުވަހުގެ ރޭގެ ވަގުތެއްގައެވެ. ނަމަވެސް އެއީ ކޮން ބައްޔެއްކަން ހާމަ ނުކުރެއެވެ.

ލިންޑްސީ ގްރަހަމްއަކީ އެމެރިކާގެ ރައީސް ޑޮނަލްޑް ޓްރަމްޕްގެ އަރިސް މީހެއްގެ އިތުރުން، އެމެރިކާގެ ޚާރިޖީ ސިޔާސަތުތަކާއި ގައުމީ ސަލާމަތާ ބެހޭ ކަންކަމުގައި އަޑުއުފުލި މީހެކެވެ.

މަރުވުމުގެ މަދު ދުވަސްކޮޅެއް ކުރިން އޭނާ ވަނީ ޔޫކްރެއިންގެ ކިއޭވްއަށް ޒިޔާރަތްކޮށް، ރަޝިޔާ-ޔޫކްރެއިން ހަނގުރާމަ ހުއްޓުވުމަށް ޗައިނާގެ ނުފޫޒު ބޭނުންކުރުމަށް ގޮވާލާފައެވެ. އަދި ރަޝިޔާއާ ދެކޮޅަށް ހަރުކަށި ދަތިކުރުމުގެ ފިޔަވަޅު އެޅުމަށް ވަކާލާތު ކުރިއެވެ.

ނަމަވެސް، ގްރަހަމް އެންމެ ބޮޑަށް ފާހަގަކުރެވިފައިވަނީ ފަލަސްތީނުގެ ޣައްޒާގައި އިސްރާއީލުން ހިންގަމުންދާ ނަސްލު ނައްތާލުމުގެ އަމަލުތަކަށް އެންމެ ބޮޑަށް ހިތްވަރުދިން އެއް މީހާގެ ގޮތުގައެވެ.

އެގޮތުން ޣައްޒާއަށް ހިތުހުރި ގޮތެއް ހެދުމަށް ހިތްވަރުދީފައިވެއެވެ.

"އަހަރެން މިހުރީ އިސްރާއީލާއެކު. އެތަން [ޣައްޒާ] ސުންނާފަތިކޮށްލާ، ކަލޭމެން ކުރަން ބޭނުން ކޮންމެ ކަމެއް ކުރޭ،" އޭނާ ބުނެފައިވެއެވެ.

މީގެ އިތުރުން، ދެވަނަ ބޮޑު ހަނގުރާމައިގައި ޓޯކިޔޯއާއި ބާލިންއަށް ހެދި ގޮތަށް ޣައްޒާއަށް ހެދުމަށް ގޮވާލައި، އެ ސިޓީ މުޅިން ބިމާ ހަމަކޮށްލުމަށް އޭނާ ވަނީ ގޮވާލާފައެވެ.