ނިޔަފަތި ކެއުމަކީ ގިނަ ބަޔަކު ނޭނގި ނަމަވެސް ކޮށް އުޅޭ ވަރަށް ޢާންމު އާދައެކެވެ. ދިރާސާތަކުން ދައްކާ ގޮތުގައި ފުރާވަރުގެ ކުދީންގެ ތެރެއިން ގާތްގަނޑަކަށް 45 އިންސައްތަ ކުދީން ނިޔަފަތި ކައެވެ. އަދި ކުޑަކުދީންގެ ތެރެއިން 30 އިންސައްތަ ކުދީންނާއި ޒުވާނުންގެ ތެރެއިން 25 އިންސައްތަ މީހުންނާއި ދޮށީ ޢުމުރުގެ ފަސް އިންސައްތަ މީހުންގެ ގައިގައި މި އާދަ ހުރެއެވެ.

ފެންނަ ފެނުމަށް ކުޑަ ކަމެއް ހެން ހީވިޔަސް ސިއްޙީ ގޮތުން މި އާދައިގައި ހީކުރާ ވަރަށްވުރެ ބޮޑެތި ނުރައްކާ އެކުލެވިފައިވެއެވެ.

ބައެއް މީހުން ފޫހިވެގެން ނިޔަފަތި ކެޔަސް ގިނަ ފަހަރަށް މި އާދައިގެ އަސްލަކީ ހާސްވުމާއި ކަންބޮޑުވުމާއި ނަފްސާނީ އެކި މައްސަލަތަކެވެ. ގިނަ ފަހަރަށް ނިޔަފަތި ކެވެނީ ނޭނގި ޚިޔާލެއް ފިކުރެއް ނެތި ސިކުނޑި އެހެން ކަމަކާ މަޝްޣޫލުވެގެން އިންނައިރުގައެވެ. އާއިލާ ތެރެއިން މީހަކު ނިޔަފަތި ކާތަން ފެނިގެން ކުޑަކުދީން އެ އާދަ ދަސްކުރުމަކީ ވެސް ވަރަށް ޢާންމު ކަމެއް ކަމަށް ތަޖުރިބާކާރުން ފާހަގަކުރައްވައެވެ.

ނިޔަފަތި ކެއުމުގެ ސަބަބުން ހަށިގަނޑަށް ލިބޭ ގެއްލުން ވަރަށް ބޮޑެވެ. ނިޔަފަތި ކެއުމުން ނިޔަފަތި ވަށައިގެންވާ ހަންގަނޑަށް ކުދި ޒަޚަމް ލިބި ބެކްޓީރިއާ އާއި ވައިރަސް އަދި ފަންގަސް ވަނުމަށް މަގު ހުޅުވައިދެއެވެ. މިކަމުގެ ސަބަބުން ޕެރޮނީކިއާ ކިޔާ އިންފެކްޝަނެއް ޖެހި ނިޔަފަތި ވަށައިގެން ދުޅަވެ ރިއްސައެވެ.

ނިޔަފަތި ކާ މީހުންނަށް ރޯގާ ޖެހުމާއި ހުން އައުމުގެ ފުރުޞަތު ވެސް ބޮޑެވެ. ސަބަބަކީ އަތުގައި ޚާއްޞަކޮށް ނިޔަފަތީގެ ދަށުގައި ބެކްޓީރިއާ ވަރަށް ގިނައިން ހުންނާތީއެވެ.

މީގެ އިތުރުން ނިޔަފަތި ކެއުމުގެ ސަބަބުން ދަތް ގާނާ ބަލި (ބްރަކްސިޒަމް) ޖެހުމުގެ ފުރުޞަތު ބޮޑުވެ ބޮލުގައި ރިއްސުމާއި ދަތުގެ އެކި މައްސަލަ ކުރިމަތިވެއެވެ.

ދެން އޮތީ މި އާދަ ހުއްޓައިލާނެ ގޮތެވެ. ޑާމަޓޮލޮޖިސްޓުން ލަފާ ދެއްވާ ގޮތުގައި ނިޔަފަތި ކުރުކޮށް ބެހެއްޓުމަކީ ވަރަށް މުހިންމު ކަމެކެވެ. ނިޔަފަތި ކުރު ވީ ވަރަކަށް ކާނެ ބައި މަދުވެ ޝައުޤު ވެސް ކެނޑެއެވެ.

ހިތި ރަހަ ދޭ ނެއިލް ޕޮލިޝް ނިޔަފައްޗަށް އުނގުޅުމަކީ ވެސް ގިނަ ބަޔަކަށް ކާމިޔާބުވެފައިވާ އުކުޅެކެވެ. ބޭސް ފިހާރަތަކުން ފަސޭހައިން ލިބެން ހުންނަ މި ޕޮލިޝް ގެ ނުބައި ރަހައިގެ ސަބަބުން ނިޔަފަތި ކެއުމާ ދުރުހެލިވެވެއެވެ.

ނިޔަފަތި ކާ ހިތްވާ ވަގުތު ސްޓްރެސް ބޯޅައެއް ނުވަތަ ފިޖެޓް ޓޯއީއެއް ކުޅުމަކީ ވެސް ރަނގަޅު ގޮތެކެވެ. އެއީ އަތް އެހެން ކަމެއްގައި ބިޒީކޮށް ބެހެއްޓޭތީއެވެ.

ނިޔަފަތި ކެވޭ ވަގުތުތައް ދެނެގަތުމަކީ ވެސް މުހިންމު ކަމެކެވެ. ފޫހިވެގެންތޯ ހާސްވެގެންތޯ ނޫނީ ނިޔަފަތީގައި ކެހުމެއް ހުރީމާތޯ ބެލުމަށް ފަހު އެ ޙާލަތާ ގުޅޭ ޙައްލެއް ހޯދޭނެއެވެ.

މީގެ އިތުރުން އެއްފަހަރާ ހުރިހާ ނިޔަފައްޗެއް ހުއްޓައިލުމުގެ ބަދަލުގައި މަޑުމަޑުން ފެށުން ވެސް ރަނގަޅެވެ. މިސާލަކަށް ފުރަތަމަ ބޮޑުވައި އިނގިލީގެ ނިޔަފަތި ކެއުން ހުއްޓައިލައި ކާމިޔާބު ވީމާ އެހެން އިނގިލިތައް ވެސް ހިމެނުމެވެ. އެންމެ ފަހު އަމާޒަކީ އެއްވެސް ނިޔަފައްޗެއް ނުކެވޭ ހިސާބަށް ދިއުމެވެ.

ގަވާއިދުން ކެއުމާއި ނިދުމާއި ކަސްރަތު ކުރުމަކީ ހަށިގަނޑާއި ސިކުނޑި ހަމަޖައްސައިދީ ނިޔަފަތި ކެއުމުގެ އާދަ ކަނޑުވައިލައިދޭނެ ކަންކަމެވެ. އަދި ނިޔަފަތި ކާ ހިތްވާ ވަގުތު ނޭވާލުމުގެ ކަސްރަތު ކުރުމާއި ހަމަޖެހުން ގެނެސްދޭ ކަންކަން ކުރުމުންވެސް އެކަން ހުއްޓާލުމަށް އެހީވެދެއެވެ. ނިޔަފަތި ކެއުމަކީ ހުއްޓައިލަން އުނދަގޫ ނަމަވެސް ކެތްތެރިކަމާ އެކު މަސައްކަތް ކޮށްފި ނަމަ ކާމިޔާބު ކުރެވޭނެ ކަމެކެވެ. ނަމަވެސް މި އާދަ މާ ބޮޑަށް ހައްދުން ނެއްޓިފައި ވާ ނަމަ ޑޮކްޓަރެއްގެ ލަފާ ހޯދައިގެން ކުރިއަށް ދިއުމަކީ އެންމެ ރައްކާތެރި ގޮތެވެ.