މައިވަންތަކަމަކީ އިންސާނާގެ ދިރިއުޅުމަށް އަންނަ އެންމެ ބޮޑު އެއް ބަދަލެވެ. ދަރިއަކު ލިބުމާއެކު، މަންމަގެ އިހުސާސްތަކާއި، އިސްކަންދޭ ކަންތައްތަކަށް ބޮޑެތި ބަދަލުތަކެއް އާދެއެވެ. ނިދާފައި އޮންނަ ތުއްތު ދަރިފުޅު ރަނގަޅަށް އޮތްތޯ ބެލުމާއި، ދަރިފުޅު ރޮއިގަންނަ އަޑަށް ހޭލެވުމާއި، އަބަދުވެސް ދަރިފުޅާ ގާތުގައި ހުންނަން ބޭނުންވުމަކީ އެއްވެސް ވިސްނުމަކާ ނުލައި އިޚުތިޔާރުން ބޭރުގައި މަންމައެއްގެ ކިބައިގައި އުފެދޭ ވަރުގަދަ އިހްސާސްތަކެކެވެ.

އިނގިރޭސި ސައިކޯތެރަޕިސްޓް ނައޯމީ ސްޓޭޑްލެން ސިފަކުރައްވާފައިވާ ގޮތުގައި، މައިވަންތަކަމަކީ މެދުކެނޑުމެއްނެތް، ބޮޑު މަސްއޫލިއްޔަތެކެވެ. މުޅި ދުނިޔެއަކީ އެ މީހެއް ކަމަށް ދެކޭ ކުޑަކުޑަ ފުރާނައެއްގެ ހުރިހާ ބޭނުންތަކެއް ފުއްދައިދިނުމަށް މަންމައަކު އަތުކުރި އޮޅާލައެވެ.

ކުރި ދިރާސާތަކުން ދައްކާގޮތުގައި، ހުރިހާ ޖަނަވާރުންގެ ސިކުނޑިވެސް، ދަރިން ބެލުމަށްޓަކައި އަމިއްލައަށް ބަދަލުވެ ރީވަޔާވެއެވެ. މިއީ ދަރިފުޅުގެ ބޭނުންތައް އެހެން ހުރިހާ ކަމަކަށްވުރެ އިސްކުރުމަށް ސިކުނޑި ތައްޔާރުވާ ގޮތެވެ.

މީދަލުގެ ސިކުނޑި ބޭނުންކޮށްގެން ކުރި ދިރާސާއަކުން ދައްކާގޮތުގައި، މަންމައަކު އޭނާގެ ދަރިފުޅާ މުޢާމަލާތްކުރަން ބޭނުންވާ ބޭނުންވުން ކޮންޓްރޯލްކުރާ ޚާއްޞަ ސަރަޙައްދެއް ސިކުނޑީގައިވެއެވެ.

ސިކުނޑީގެ 'މީޑިއަލް ޕްރީއޮޕްޓިކް އޭރިއާ' އަކީ މައިވަންތަކަމުގެ އުޅުމަށް ބާރުފޯރުވާ މައިގަނޑު މަރުކަޒެވެ. މި ސަރަޙައްދުގައި ހުންނަ ނިއުރޯންތަކަކީ މާބަނޑު ދުވަސްވަރު އުފެދޭ 'ޕްލެސެންޓަލް ލެކްޓޯޖަން' ހޯރމޯންއާއި، ކިރު އުފެއްދުމަށް އެހީވާ 'ޕްރޮލެކްޓިން' ހޯރމޯންއަށް ވަރަށް ބޮޑަށް އިޖާބަދޭ އެއްޗެކެވެ. މި ހޯރމޯންތަކުގެ ސަބަބުން ދަރިފުޅަށް އަޅާލުމަކީ ހަމައެކަނި ކުރަންޖެހޭ މަޖުބޫރު ކަމެއްގެ ބަދަލުގައި، އުފާވެރިކަން ލިބޭ ކަމަކަށް ބަދަލުވެގެންދެއެވެ.

ދިރާސާގައި ބޭނުންކުރި މީދާތަކުގެ ސިކުނޑި ބެލިއިރު، ތުއްތު މީދާތަކާ މުޢާމަލާތްކުރާ ވަގުތު މި ނިއުރޯންތައް ވަރަށް ބޮޑަށް ހަރަކާތްތެރިވާކަން ފާހަގަކުރެވުނެވެ. މި ހަރަކާތްތެރިކަން އެންމެ ބޮޑަށް ފެނިގެންދިޔައީ އަލަށް ވިހާފައިވާ މަންމަ-މީދާތަކުގެ ކިބައިންނެވެ. މި ނިއުރޯންތައް ގުޅިފައިވަނީ ސިކުނޑީގެ 'ރިވޯޑް ސިސްޓަމް' ނުވަތަ އުފާވެރިކަން އިޙްސާސްކޮށްދޭ ނިޒާމާއެވެ. މީގެ ސަބަބުން ދަރިފުޅާ އެކު އުޅޭ ވަގުތު 'ޑޯޕަމިން' ކިޔާ ކެމިކަލެއް އުފެދި، މަންމައަށް ނުހަނު ބޮޑު އުފާވެރިކަމެއް ލިބެއެވެ.

އިލްމީ ގޮތުން މި ނިޒާމު ހުއްޓުވައިލުމުން، މަންމަ-މީދާ އޭގެ ދަރިންނަށް އަޅާލުން ކުޑަވާކަން ފާހަގަކުރެވުނެވެ. އަދި މި ނިޒާމު ހަރަކާތްތެރި ކުރުވުމުން، ދުވަހަކުވެސް ވިހާފައިނުވާ މީދާތައްވެސް އާ މަންމައެއް ފަދައިން ކުދި މީދާތަކަށް އަޅާލައި، އެއާ ގާތްވާން މަސައްކަތްކުރާކަން ފާހަގަވިއެވެ.

މި ދިރާސާއަކީ ޖަނަވާރުންނަށް އަމާޒުކޮށް ހެދި ދިރާސާއެއް ނަމަވެސް އިންސާނުންގެ ސިކުނޑީގައިވެސް ހަމަ މި ނިޒާމު މަސައްކަތްކުރާކަން ވަނީ ފާހަގަވެފައެވެ. އެގޮތުން، ދަރިންނާމެދު އަޅާލަން އުނދަގޫވާ ބައެެއް މައިންނަށް އެފަދައިން ދިމާވާ އެއް ސަބަބަކީ އެކަމަށްޓަކައި އޭނާގެ ސިކުނޑި ތައްޔާރު ކުރުމަށް ސިކުނޑީގެ ނިޒާމުތައް ބަދަލުވާންޖެހޭ ގޮތަށް ބަދަލުނުވުމުން ދިމާވާ ބައޮލޮޖިކަލް ކަމެއްކަމަށް ދިރާސާތަކުން ވަނީ ހޯދިފައެވެ.

ނަމަވެސް، މާބަނޑު ދުވަސްވަރު ސިކުނޑިއަށް އަންނަ މިފަދަ ބޮޑެތި ބަދަލުތަކާ ބެހޭގޮތުން ކުރެވިފައިވާ ދިރާސާތައް ވަރަށް މަދެވެ.

ދުނިޔޭގެ ޞިއްޙަތު ޖަމްޢިއްޔާ ގެ ތަފާސްހިސާބުތައް ދައްކާގޮތުން، މާބަނޑު މީހުންގެ 10 އިންސައްތަ އަދި ވިހާފައިވާ މީހުންގެ 13 އިންސައްތަ މީހުން ނަފްސާނީ ބަލިތަކަށް، ޚާއްޞަކޮށް ޑިޕްރެޝަނަށް ހުށަހެޅެއެވެ. ތަރައްޤީވަމުން އަންނަ ޤައުމުތަކުގައި މި ޢަދަދު މިއަށްވުރެވެސް މަތީގައި އުޅޭއިރު، މިކަމަށް ދެވޭ ފަރުވާތައް ވަނީ ވަރަށް މަދުވެފައެވެ.

މި ދިރާސާގެ މައިގަނޑު މަޤްޞަދަކީ މާބަނޑު ދުވަސްވަރު ސިކުނޑި ބަދަލުވާ ގޮތް ދެނެގަނެ، ނަފްސާނީ ގޮތުން ދިމާވާ މައްސަލަތަކަށް ރަނގަޅު ފަރުވާ ހޯދުމެވެ. އަދި ދަރިފުޅާ ގުޅުން އުފެއްދުމަށް ދަތިވާ މައިންނަށް މުޖުތަމަޢުން ކުރިމަތިވާ މަލާމާތާއި ދެރަބަސްތައް ހުއްޓުވައި އެކަން ހައްލު ކުރުމަށް މަސައްކަތްކުރުމެވެ. އަދި އެފަދަ ކަންކަމަކީ މީހާގެ ނުކުޅެދުންތެރިކަމެއް ނޫން ކަމާއި، އެއީ ސިކުނޑީގެ ނިޒާމުތައް ބަދަލުވާންޖެހޭ ގޮތަށް ބަދަލުނުވުމުން ދިމާވާ ބައޮލޮޖިކަލް ކަމެއްކަން ދެނެގަތުމެވެ.

މާބަނޑު ދުވަސްވަރާއި ވިހެއުމަށްފަހު އަންނަ މި ނާޒުކު ދުވަސްވަރު، މައިންނަށް ފުރިހަމަ އަޅާލުމާއި، އެހީތެރިކަމާއި، އެކަށީގެންވާ ފަރުވާ ލިބުމަކީ ކޮންމެހެން ބޭނުންތެރި ކަމެކެވެ.