މާލެ ސިޓީ ކައުންސިލުން ހިދުމަތް ހޯދާފައި ވެމްކޯއަށް ދޭންޖެހޭ ފައިސާގެ އަދަދު 116.4 މިލިއަން ރުފިޔާއަށް އަރާކަމަށް ވޭސްޓް މެނޭޖްމަންޓް ކޯޕަރޭޝަން ލިމިތެޑް، ވެމްކޯއިން ހާމަކޮށްފިއެވެ.
ވެމްކޯއިން މާލެސިޓީ ކައުންސިލަށް ފޯރުކޮށްދޭ ކުނި އުކާލުމުގެ ހިދުމަތާ ގުޅޭގޮތުން، ޔުޓިލިޓީ ރެގިއުލޭޓަރީ އަށް މައްސަލަ ހުށަހެޅޫމަށް ކައުންސިލުން މަޝްވަރާކުރަމުންދާކަމަށް މީޑިއާގައި ދެކެވެމުންދާ ވާހަކަތަކާ ގުޅޭގޮތުން ވެމްކޯއިން މިރޭ ވަނީ ބަޔާނެއް ނެރެފައެވެ. ވެމްކޯގެ ބަޔާނުގައި ބުނީ މާލެސިޓީ ކައުންސިލްގެ އިދާރާތައް ވެމްކޯގައި ރަޖިސްޓްރީކޮށް ކަނދައެޅިފައިވާ އުސޫލްތަކުގެ ތެރެއިން ހިދުމަތް ހޯދުމަށް އަބަދުވެސް މަރުހަބާ ކިޔާކަމަށެވެ. ނަމަވެސް 2024 ވަނަ އަހަރުން ފެށިގެން މިއަދާ ހަމަޔަށް މާލެސިޓީ ކައުންސިލުން ވެމްކޯއަށް ހިދުމަތް ހޯދުމަށްފަހު ދައްކަންޖެހޭ ފައިސާގެ ތެރެއިން 116.4 މިލިއަން ރުފިޔާ މިހާތަނަށް ނުދައްކާ އޮތްކަމަށް ވެމްކޯއިން ވަނީ ފާަހަގަކޮށްފައެވެ.
ވެމްކޯއިން ބުނީ ކަނޑައެޅިފައިވާ އުސޫލުން ފީ ނުދެއްކުމުން އާންމު އުސޫލުން ކަސްޓަމަރުން ރަޖިސްޓްރީ ކުރުމުގައި އަމަލުކުރަންޖެހޭ އިޖުރާއަތްތައް ފުރިހަމަކުރުމަށް ހުރަސް އެޅިފައިވާކަމަށެވެ. ވެމްކޯއިން ބުނީ އެކުންފުންޏަށް މާލީ ގޮތުން ހީނަރުކަން އައުމަށް ދިމާވާ އެންމެބޮޑު ސަބަބަކީ ބޮޑެތި ކަސްޓަމަރުން ވެމްކޯއަށް ދައްކަންޖެހޭ ފައިސާ ނުދައްކާ ލަސްވުންކަމަށެވެ. އެގޮތުން ވެމްކޯގެ މުއައްޒަފުންގެ ޕެންޝަން ފައިސާ ނުދެއްކި ލަސްވަމުންދަނީވެސް އެގޮތަށް ފައިސާ ނުލިބި ލަސްވަމުންދާތީކަމަށް ވެމްކޯގެ ބަޔާނުގައި ބުންޏެވެ.
ވެމްކޯއިން ބުނީ ކަސްޓަމަރުން ހިދުމަތް ހޯދާފައި ފައިސާ ނުދައްކާތާ ދެމަސްވެއްޖެނަމަ އަމަލުކުރާ އުސޫލްގެ ދަށުން ދެމުންގެންދާ ހިދުމަތްތައް މެދުކަނޑާލުމުގެ އިހުތިޔާރު ލިބިގެންވާކަމަށެވެ.
މާލެސިޓީ ކައުންސިލުން ހިދުމަތް ހޯދުމަށްފަހު ނުދައްކާ ހުރި ފައިސާ ހޯދުމަށް މެދުކެނޑި ކުރިއަށްދިއުމަށްޓަކައި މިދިޔަ ދެއަހަރުމަތިން އެކި ފަހަރު މަސައްކަތްކޮށްފައިވާކަން ވެމްކޯއިން ވަނީ ފާހަގަކޮށްފައެވެ. ފައިސާ ދެއްކުމަށް ތާވަލެއް ހެދުމުންވެސް އެއަށްވެސް މާލެސިޓީ ކައުންސިލުން އަމަލުކުރަމުން ގޮސްފައި ނުވާކަން ވެމްކޯއިން ވަނީ ފާަހަގަކޮށްފައެވެ.
Advertisement
This content is created and paid for by advertisers and does not involve Voice Journalists
