ޣައްޒާގެ ޤަތުލްޢާއްމާއި އިސްރާއީލުގެ އަސްކަރިއްޔާއާ ގުޅޭގޮތުން އާޓިފިޝަލް އިންޓެލިޖެންސް (އޭއައި) މޮޑެލްތަކުން މީހުންނަށް ދޭ މައުލޫމާތުތައް އެ ޖަމާއަތަށް ފަހިވާނޭހެން ބަދަލުކުރުމަށް އިސްރާއީލުން ސިއްރު ކެމްޕޭނެއް ފަށައިފިއެވެ.

ނޫސް މަޖައްލާ 'ޕޮލިޓިކޯ' އިން ހާމަކޮށްފައިވާ ގޮތުގައި، ޗެޓްޖީޕީޓީ އަދި ޕާޕްލެކްސިޓީ ފަދަ ލާޖް-ލެންގުއޭޖް މޮޑެލްތަކުން ޣައްޒާއާ ގުޅޭގޮތުން ކުރެވޭ ސުވާލުތަކަށް ޖަވާބު ދިނުމުގައި ބޭނުންކުރާ މަސްދަރުތަކަށް ނުފޫޒު ފޯރުވުމުގެ މަސައްކަތް އިސްރާއީލުން ވަނީ ފަށާފައެވެ. މިއީ ދުނިޔޭގެ ރައުޔު ބަދަލުކުރުމަށް ސަރުކާރުތަކުން ކުރަމުންދާ މަސައްކަތުގައި ޓެކްނޮލޮޖީގެ އައު ހަނގުރާމައެއްގެ ގޮތުގައި ބެލެވެއެވެ.

މި ކެމްޕޭނުގެ މައިގަނޑު ހަރަކާތްތައް ހިންގަނީ 'ހެނޯވާ އިންސްޓިޓިއުޓް ފޯ ޕަބްލިކް ޕޮލިސީ' ކިޔާ ވެބްސައިޓެއް މެދުވެރިކޮށެވެ. މި ސައިޓުގައި ޣައްޒާގެ ހާލަތާއި، އިސްރާއީލުގެ އަސްކަރިއްޔާއިން ހިންގާ ޖަރީމާތަކާ ގުޅޭގޮތުން ސުވާލާއި ޖަވާބުގެ ސިފައިގައި ގިނަ ލިޔުންތަކެއް ވަނީ ޝާއިއުކޮށްފައެވެ. އޭގެ ތެރޭގައި ޣައްޒާގައި އިސްރާއީލުން ބަނޑަށްޖެއްސުމުގެ ސިޔާސަތެއް ގެންގުޅޭތޯ އަދި އެ ޖަމާއަތުގެ އަސްކަރިއްޔާއަކީ އަޚުލާގީ ގޮތުން އެންމެ ރަނގަޅު ލަޝްކަރުތޯ ފަދަ ސުވާލުތައް ހިމެނެއެވެ.

އެމެރިކާގެ ޖަސްޓިސް ޑިޕާޓްމަންޓަށް ހުށަހަޅާފައިވާ ފޮރިން އޭޖެންޓްސް ރެޖިސްޓްރޭޝަން އެކްޓް (ފާރާ) ގެ ލިޔުންތަކުން ދައްކާ ގޮތުގައި، ފްރާންސްގެ ޕަބްލިކް ރިލޭޝަންސް ކުންފުންޏެއް ކަމަށްވާ ހަވާސް މީޑިއާ އާއި ޕީރޯ އިންކް ގުޅިގެން ހިންގާ މި ކެމްޕޭނަކީ އިސްރާއީލުގެ ސަރުކާރުގެ އެޑްވަޓައިޒިން އޭޖެންސީ (ލަޕާމް) އިން ޚަރަދުކޮށްގެން ހިންގާ 100،000 ޑޮލަރުގެ މަޝްރޫއެކެވެ. މީގެ އިތުރުން 46.5 މިލިއަން ޑޮލަރުގެ ބޮޑު ކެމްޕޭނެއްގެ ދަށުން އޭއައި ސިސްޓަމްތަކުގައި އިސްރާއީލަށް ފަހިވާނޭހެން "ޖީޕީޓީ ފްރޭމިންގ ރިޒަލްޓްސް" ނެރުމަށް މަސައްކަތްކޮށްފައިވާ ކަންވެސް އެ ލިޔުންތަކުން ހާމަވެއެވެ.

މި ވެބްސައިޓުގައި ލިޔުންތައް އެކުލަވާލާފައިވަނީ އާންމު އިންސާނުންނަށް ވުރެ ބޮޑަށް، އޭއައި އަލްގޮރިޒަމްތަކަށް ފަސޭހައިން ދެނެގަނެވޭ އަދި އޭއައި އިން ސޯސްގެ ގޮތުގައި ބޭނުންކުރެވޭނެ 'ޖެނެރޭޓިވް އިންޖީން އޮޕްޓިމައިޒޭޝަން' އުކުޅުތައް ބޭނުންކޮށްގެންނެވެ. ޕޮލިޓިކޯއިން ކުރި ޓެސްޓުތަކުން ދައްކާ ގޮތުގައި، ޗެޓްޖީޕީޓީ އަދި ޕާޕްލެކްސިޓީން ޣައްޒާއާ ގުޅޭ ސުވާލުތަކަށް ޖަވާބު ދިނުމުގައި ހެނޯވާ އިންސްޓިޓިއުޓްގެ ލިޔުންތައް މަސްދަރުގެ ގޮތުގައި ބޭނުންކޮށްފައިވެއެވެ.

މިކަމާ ގުޅިގެން ޕީރޯ ކުންފުނީގެ ކޯ-ފައުންޑަރ ޑެނިއަލް ރޮސެންބާގް ބުނެފައިވަނީ މިއީ އިސްރާއީލާ ދެކޮޅަށް ފަތުރާ ދޮގު މައުލޫމާތުތަކަށް ރައްދު ދިނުމަށް ސައްހަ މައުލޫމާތު ފޯރުކޮށްދިނުމުގެ މަސައްކަތެއް ކަމަށެވެ.

ޣައްޒާގައި އިސްރާއީލުން ހިންގަމުންދާ ގަތުލުއާންމުތަކާ ގުޅިގެން ބައިނަލްއަގުވާމީ ފެންވަރުގައި އެ ޖަމާއަތަށް ފާޑުކިޔުން އަމާޒުވެފައިވާ މި ދަނޑިވަޅުގައި، މިއީ ހަގީގަތް އޮޅުވާލުމަށް ޒަމާނީ ޓެކްނޮލޮޖީގެ ނަހަމަ ބޭނުން ހިފުމުގެ ނުރައްކާތެރި އަމަލެއްގެ ގޮތުގައި މާހިރުން ސިފަކުރެއެވެ. އަދި އޭއައި ބޭނުންކުރާ ފަރާތްތަކަށް ލިބޭ ޖަވާބުތަކަކީ މިނިވަން މައުލޫމާތު ނޫންކަމާއި، ސިޔާސީ ނުފޫޒު ފޯރުވާފައިވާ މައުލޫމާތުކަން ދެނެގަންނަން އުނދަގޫވާނެތީ މިއީ ބޮޑު ކަންބޮޑުވުމެކެވެ.